Ngaahi Uiuiʻi Foʻoú
ʻEletā Paul V. Johnson
Kau Palesitenisī ʻo e Kau Fitungofulú
Ko e taha ʻo e ngaahi lēsoni mahuʻinga kuo ako ʻe ʻEletā Paula V. Sionisoni mei he ngaahi taʻu lahi ʻo ʻene ngāue ʻi he akoʻanga ʻa e Siasí ko kinautolu ʻoku nau tauhi ʻenau ngaahi fuakavá, ʻoku tauhi ʻe he ʻEikí ʻEne ngaahi talaʻofa kiate kinautolú—ʻo tatau ai pē pe ko e hā e ngaahi faingataʻa ʻi he moʻuí.
Naʻá ne pehē kimuí ni mai, “Neongo ʻoku tau fehangahangai mo e taʻepauʻiá ʻi he ngaahi tafaʻaki pau ʻo e moʻuí, ka ʻoku tau maʻu ha ngaahi talaʻofa ʻoku paú. He ʻikai lava ke tau tuku e ngaahi fakakaukau taʻepaú ke ne fakatupunga haʻatau loto-veiveiua ki he ngaahi talaʻofa pau ʻa e ʻEikí.”1
ʻI he ʻaho ní, ʻoku fehangahangai e fānau ʻa e ʻOtuá mo ha mahaki fakaʻauha fakaemāmani lahi, māvahevahe fakasosaieti mo ha ngaahi fakamatala kehekehe ʻi he mītia fakasōsialé. Ka ʻi heʻetau moʻui ʻaki ʻetau ngaahi fuakavá, naʻe pehē leva ʻe ʻEletā Sionisoni ʻoku ʻomi ʻe he ʻEikí ha fakahinohino, mālohi mo e fakafiemālie.
ʻI he ʻaho 3 ʻo ʻEpeleli 2021, naʻe hikinimaʻi ʻa ʻEletā Sionisoni ke hoko ko ha mēmipa ʻo e Kau Palesitenisī ʻo e Kau Fitungofulú, ʻa ia ʻe toki kamata ʻi he ʻaho 1 ʻo ʻAokosi 2021. Naʻe hoko ʻa ʻEletā Sionisoni ko e Komisiona hono 16 ʻi he Polokalama Ako ʻa e Siasí mei he 2008 ki he 2015, peá ne toe hoko atu pē ʻi he lakanga tatau ʻi he 2019.
Naʻe fāʻeleʻi ʻa Paula Vea Sionisoni ʻi he ʻaho 24 ʻo Sune 1954 ʻi Keinesivili, Folōlita, USA kia Vea mo Uinifeleti Sionisoni. Hili ʻene tupu hake ʻi Lōkeni, ʻIutā, USA, naʻá ne ngāue ʻi he Misiona Norway Oslo. Hili ʻene ngāue fakafaifekaú, naʻá ne mali mo Lesilī Sili Uasipeni ʻi he Temipale Logan Utah ʻi he 1976. ʻOku ʻi ai haʻana fānau ʻe toko 9 mo e makapuna ʻe toko 40.
Naʻe maʻu ʻe ʻEletā Sionisoni ha mataʻitohi BA ʻi he ako ki he saienisi ʻo e fanga monumanú mo e ʻakaú mei he ʻUnivēsiti Pilikihami ʻIongí ʻi he 1978, MA ʻi he faiakó mei BYU ʻi he 1982, mo ha toketā ʻi he faiako ʻi he meʻa fakatekinolosiá mei he ʻUnivēsiti ʻo ʻIutaá ʻi he 1989.
Naʻá ne faiako semineli ʻi ha taʻu ʻe 12 ʻi ʻAlesona mo ʻIutā kimuʻa peá ne ngāue ʻi hono faʻu e naunau fakalēsoní mo e ngaahi lakanga pule ʻi he Polokalama Ako ʻa e Siasí ʻi Sōleki Sití.
Naʻe hikinimaʻi ʻa ʻEletā Sionisoni ko ha mēmipa ʻo e Kōlomu ʻUluaki ʻo e Kau Fitungofulú ʻi he ʻaho 2 ʻo ʻEpeleli 2005. Kuó ne hoko foki ko ha Fitungofulu Fakaʻēlia, tokoni ʻi he kau palesitenisī fakasiteiki, aleaʻanga māʻolunga fakasiteikí, pīsope, mo ha palesiteni ʻo e Kau Talavou ʻi he uōtí.