Camille N. Johnson

Kuo fakaʻaongaʻi ʻe Kamila N. Sionisoni ʻa ʻene moʻuí ki hono ako ʻo e ngaahi leá, fokotuʻutuʻu kinautolu, pea fakaʻaongaʻi kinautolu ke tokoniʻi e kakaí ke nau fakaleleiʻi e ngaahi palopalemá lolotonga ʻa e taʻu ʻe 30 ʻo ʻene hoko ko ha loeá. Pea kuó ne maʻu maʻu pē ha melino lahi ʻi he ngaahi lea ʻo e folofolá. ʻOkú ne lau ʻa e kakai ʻi he folofolá ko ha konga ia ʻo hono ngaahi kaungāmeʻa lelei tahá.

Ka, ʻi he taimi naʻá ne hiki ai mo hono husepānití ki ʻAmelika Tonga ke taki ʻi he Misiona Peru Arequipa mei he 2016 ki he 2019, naʻá ne fakaʻānaua ke ne lava ʻo fetuʻutaki. Koeʻuhí ko e teʻeki ʻaupito ke ne ako ʻa e lea faka-Sipeiní, naʻá ne lotua ai ke ne malava ʻo fetuʻutaki mo ʻene kau faifekaú pea mo e kakaí koeʻuhí kae lava ke nau ongoʻi ʻa ʻene ʻofa ʻiate kinautolú pea mo ʻene fakamoʻoni ki he Tohi ʻa Molomoná.

“Naʻá ku falala ki he ʻEikí pea fakafalala ki he Laumālié ke Ne fakafetuʻutaki ʻa ʻeku ʻofá mo e fakamoʻoní ʻi he taimi naʻe ʻikai ke u ʻilo ai ha lea feʻungá. Ko ha lēsoni mālie mo ongo moʻoni ia ne u ako ke ‘ʻoua naʻá [ku] faʻaki ki [hoku] poto ʻoʻokú’ [Lea Fakatātā 3:5] ka ke foaki kotoa ia maʻa hoku Fakamoʻuí.”

Naʻá ne toe ako ha moʻoni mahinongofua ʻo e ongoongoleleí ʻi heʻene moʻuí: “ʻOku fekauʻaki ia mo e ʻofa ki he Fakamoʻuí, ʻofa ʻo hangē ko e Fakamoʻuí, pea tuku ʻa e ʻofa mo e Fakalelei ʻa Sīsū Kalaisí ke ngāue ʻi heʻetau moʻuí.”

Naʻe tāpuekina ʻa Sisitā Sionisoni ʻaki ʻa e ʻofa ki he kau faifekau ʻe toko 552 ʻo e misioná pea ʻokú ne ongoʻi he taimí ni ʻa e fakalahi ʻo ʻene ʻofá ki he longaʻifānau ʻe taha miliona ʻa ia ʻokú ne fatongia fakatauhi ki aí.

Naʻá ne pehē, “ʻOku ou houngaʻia ʻi he faingamālie ko ʻení ke ako ai mei he fānau ʻoku nau hoko ko ha ʻata ʻo e ʻofa haohaoa ʻa Sīsū Kalaisí.”

Naʻe fāʻeleʻi ʻa Kamila Nito Sionisoni ʻi he ʻaho 12 ʻo Sepitema 1963, kia Hala mo Tolofī Nito ʻi Pokatelo, ʻAitahō, USA. Naʻá ne mali mo Takilisi R. Sionisoni ʻi he 1987 ʻi he Temipale Salt Lake. ʻOkú na maʻu ha fānau ʻe toko tolu. Naʻá ne ʻosi mei he ʻUnivēsiti ʻo ʻIutaá ʻi he lēsoni faka-Pilitāniá ʻi he 1985 pea mo e ʻUnivēsiti ʻo ʻIutā ʻApiako Lao ʻa S. J. Quinney ʻi he 1989.

Kuo hoko ʻa Sisitā Sionisoni ko ha palesiteni ʻo e Kau Finemui ʻi he uōtí, kuó ne ngāue ʻi he kau palesitenisī ʻo e Fineʻofá mo e Palaimeli ʻi he uōtí, peá ne hoko ko ha faiako Tokāteline ʻo e Ongoongoleleí.