Amy A. Wright

ʻI he taʻu ʻe nima kuo hilí, naʻe maʻu ai ʻa Sisitā ʻEimī A. Laiti ʻe he tuʻunga hono 4 ʻo e kanisā ʻo e taungafanaú. Naʻá ne pehē ko e founga pē ʻe taha naʻe matuʻuaki ai ʻe hono fāmilí ʻa e ngaahi faitoʻo fakamamahí, ko e tukutaha ʻenau tokangá ʻi he Fakamoʻui ko Sīsū Kalaisí.

Naʻá ne pehē, “Ko e taimi ne u tokanga taha ai pē kiate aú, naʻe hoko ʻa e māmaní ko e feituʻu fakapoʻuli mo fakataʻelata moʻoni kiate au. Ka ko e taimi pē naʻe liliu ai ʻeku tokangá ʻo u faifeinga ke tokoni ki he niʻihi kehé mo ʻaʻeva ʻi he founga ne ʻaʻeva ai ʻa Kalaisí, naʻe ʻi ai ha maama mo e fiefia, naʻa mo e taimi lolotonga e mamahí mo e faingataʻa lahi tahá.”

Naʻe fakamatalaʻi ʻe Sisitā Laiti ʻa ʻene fefaʻuhi mo e kanisaá ko ha “aʻusia faifakamaʻa mo fakahaohaoaʻi”—ko ha meʻa naʻe “fakafeʻungaʻi makehe” ke tokoniʻi ia ke ne ʻiloʻi ʻa e Fakamoʻuí ʻi ha founga fakamaatoato mo fakatāutaha. Naʻe akoʻi foki kiate ia ʻoku maʻu ha mālohi makehe ʻi he fekumi ke ako mo mahino ʻa e ngaahi pole kehekehe ʻo e niʻihi kehé.

Naʻá ne pehē, “ʻOku tau ngāue kotoa pē ʻi he ngaahi tafaʻaki kehekehe ʻo e ngoue vaine ʻa e ʻEikí ʻi he ngaahi taimi kehekehe ʻo ʻetau moʻuí. Ka ko e ngoue vaine tatau pē mo e ʻEiki tatau pē.

ʻOku tatau foki mo ʻetau ngaahi ʻamanakí, ʻa ia ko e moʻui taʻengatá mo e hākeakiʻí. Ko e meʻa ia ʻoku tau fakaʻānaua maʻá e fānau iiki pelepelengesi ko ʻení, ke hoko ʻa e Fakamoʻuí ko ha konga ʻo ʻenau fonongá, pea ke nau foki hake ki ʻapi kiate Ia.”

Naʻe fāʻeleʻi ʻa ʻEimī ʻAiline ʻEnitasoni Laiti ʻi he ʻaho 6 ʻo Sānuali 1972, ʻi Sōleki Siti, ʻIutā, USA kia Lōpeti mo Sioi ʻEnitasoni. Naʻá ne mali mo Sēmisi Makongikī Laiti ʻi he 1994 ʻi he Temipale Salt Lake. ʻOkú na maʻu ha fānau ʻe toko tolu.

Naʻe ʻosi ʻa Sisitā Laiti mei he ʻUnivēsiti ʻo ʻIutaá ʻi he 1998 mo hano mataʻitohi BA ʻi he fakalakalaka ʻa e moʻui ʻa e tangatá mo e ako ki he fāmilí. Kuó ne ngāue ko ha faiako laukonga mo e pule ʻōfisi pea naʻá ne hoko ko e tokotaha fie tokoni ʻi he Kautaha ʻa e Mātuʻá mo e Kau Faiakó [PTA]. Naʻá ne tokoni kimuí ni mai ki he fefakatauʻakí mo e tuʻuakí ʻi ha ʻōfisi ki he nifó.

Kuo ngāue ʻa Sisitā Laiti ʻi he fakataha alēlea faifaleʻi lahi ʻa e Kau Finemuí talu mei he 2018. Naʻe kau ʻi hono ngaahi uiuiʻi kimuʻá ʻa e palesiteni Palaimeli ʻi he siteikí mo e uōtí, tokoni ʻi he kau palesitenisī Palaimeli ʻa e uōtí, faiako ʻi he Tokāteline ʻo e Ongoongoleleí, mo ha taki Sikauti.