Lakanga Foʻou: ʻEtivaisa Fakaʻēlia Fakavahaʻapuleʻanga ki he Houalotú

Naʻe toki tali ʻe he Kau Palesitenisī ʻUluakí kimuí ni ha lakanga foʻou ko e ʻetivaisa fakaʻēlia fakavahaʻapuleʻanga ki he houalotú. ʻE uiuiʻi ʻa e houʻeiki fafine ʻe fua fatongia ʻi he lakanga ko ʻení ke nau poupou ki he kau taki ʻi he Fineʻofá, Kau Finemuí, mo e Palaimelí ʻi he ngaahi ʻēlia ʻoku nau nofo aí ʻi he funga ʻo e māmaní. Te nau tokoni ke akoʻi mo fakahinohino ʻa e kau taki fakalotofonua ʻoku ʻi tuʻa mei he ʻIunaiteti Siteití mo Kānatá.

ʻE toki faituʻutuʻuni ʻa e Kōlomu ʻo e Kau ʻAposetolo ʻe Toko Hongofulu Mā Uá, Kau Palesitenisī ʻo e Kau Fitungofulú, pea mo e Kau Palesitenisī Fakaʻēliá ki he fiemaʻu ko ia ke uiuiʻi ha kau ʻetivaisa fakaʻēliá. ʻI he ngaahi feituʻu ʻe uiuiʻi ai kinautolú, ʻe kau atu foki ʻa e kau ʻetivaisa tokoní ʻi he ngaahi fakataha alēlea ʻi he feituʻu ko iá ʻi heʻenau fengāueʻaki fakataha mo e kau tangata mo e kau fafine ʻo e Siasí ʻi honau takitaha feituʻu. Te nau ngāue ʻi he malumalu ʻo e fakahinohino ʻa e Kau Palesitenisī Fakaʻēliá ʻi he taʻu ʻe tolu ki he taʻu ʻe nima.