Susan H. Porter

Hili ha pekia ʻa e husepāniti ʻo Sisitā Susana Pota ko ʻEletā Pulusi D. Potá, ko ha Fitungofulu Taki Māʻolunga, koeʻuhí ko ha mahakiʻia ʻo e maʻamaʻá ʻi Tīsema 2016, naʻá ne nofo toko taha pē ʻi hona ʻapí ʻi Mahu, ʻIutā, USA.

ʻI ha meimei taʻu ʻe ua kimuʻa pea pekia ʻa [hono husepānití], naʻá ne ngāue fakataha mo ia ʻi heʻene hoko ko ha palesiteni ʻo e ʻĒlia ʻIulope Hahaké.

Naʻá ne lotua ha fakahinohino ʻi heʻene hoko ko e uitou ʻoku kei fakafoʻofoʻoú. ʻI ha ʻaho ʻe taha naʻá ne sio ai ki ha tā valivali ʻo e Fakamoʻuí ʻokú Ne tō folofola ki he fefine Samēlia ʻi he vai ʻo Sēkopé (vakai, Sione 4:6–26). Naʻá ne ongoʻi ʻa e ueʻi ʻa e Laumālié ke ne fakahoko ʻa e meʻa tatau ʻo “tangutu ʻi he veʻe toʻukupu kelekele ʻo e Fakamoʻuí ʻo ako, pea te Ne akoʻi koe.”

Naʻe fāifeinga ʻa Sisitā Pota ke ne ʻunu ke ofi ange ki he Fakamoʻuí, pea naʻe fakafiemālieʻi ia ʻe he Laumālie Māʻoniʻoní mo tataki ia ki muʻa.

Naʻá ne pehē, “ʻOku ou ʻilo naʻe fua au. Naʻá ku maʻu ha mālohi mo ha nonga ʻo lahi ange ʻi hoku mālohí.”

ʻI he foua ʻe he fānau Palaimeli ʻi he funga ʻo e māmaní ʻa e faingataʻá, ʻoku fakaʻamu ʻa Sisitā Pota ke nau ʻiloʻi ʻoku ʻofa ʻa e ʻOtuá ʻiate kinautolu.

“Kapau naʻe ʻiate kinautolu ʻa Sīsū he taimí ni, te Ne fua hake tahataha ʻa kinautolu ʻo tāpuakiʻi mo lotu maʻa kinautolu, ʻo hangē pē ko e meʻa naʻá Ne fakahoko ki he fānau Nīfaí ʻi he kuonga muʻá [vakai, 3 Nīfai 17:21]. ʻOku ou fakatauange ʻe lotua ʻe he fānau takitaha ʻa ʻEne tokoní pea kole ke nau mātā Hono toʻukupu ʻofeiná ʻi heʻenau moʻuí.”

Naʻe fāʻeleʻi ʻa Susana Hōlani Pota ʻi he ʻaho 31 ʻo Siulai 1955, ʻi Ponika Siti, ʻOlokahoma, USA kia Hanisi mo Sialini Holani. Naʻe ʻosi ʻa Sisitā Pota mei he ʻUnivēsiti Pilikihami ʻIongí mo ha mataʻitohi BA ʻi he lēsoni ki he saienisi ʻo e kemikalé. Kuó ne ngāue ko ha tokoni ʻi he loki fakasaienisí mo ha faiako fika.

Naʻá ne mali mo ʻEletā Pota ʻi he 1977 ʻi he Temipale Washington D.C. ʻOkú na maʻu ha fānau ʻe toko fā.

Kuo ngāue ʻa Sisitā Pota ʻi he fakataha alēlea faifaleʻi lahi ʻa e Fineʻofá talu mei he 2017. ʻOku kau ʻi hono ngaahi uiuiʻi kimuʻá ʻa e tokoni ʻi he kau palesitenisī ʻo e Fineʻofa ʻi he siteikí, palesiteni Fineʻofa mo e palesiteni ʻo e Kau Finemui ʻi he uōtí, faiako Tokāteline ʻo e Ongoongoleleí, mo e fai-hiva ʻa e Palaimelí.