ʻEletā Alvin F. Meredith III

ʻI he taʻu fakaʻosi ʻo ʻAlavini F. Meletiti ʻi he ako māʻolunga ʻi Tenesī, USA, naʻe fili ia ʻe ha kulupu tamaiki ako faka-Kalisitiane ko e tangata sipoti lelei taha ʻa e akó ʻi he taʻu ko iá.

Hili pē ha taimi nounou mei ai, naʻe talaange ʻe heʻene faiako sipotí kuo fakataʻeʻaongaʻi ia ʻe he kau taki fakasiteiti ʻo e kulupú he naʻe ʻikai ke nau tali ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko ha tui faka-Kalisitiane.

Naʻe kole ʻe heʻene faiako sipotí, “ko ha tangata anga faka-Kalisitiane moʻoni,” ki he kautahá ke nau ʻomi ha taha ki he ʻapiakó ke feʻiloaki mo e tangata sipoti kei talavoú. Naʻe haʻu ha fakafofonga mei he kautahá ki he ʻapiako māʻolungá ʻo ne fakamatalaʻi ʻa e ngaahi poini ʻe 10 ʻo e tokāteline ne nau ongoʻi ne makatuʻunga ai ʻenau fakakaukau ke taʻefakaʻaongaʻi ʻa e tangata sipoti mei he Siasí. ʻI he sio ʻa ʻEletā Meletiti ki ha Tohi Tapu ʻi he loto kato ʻa e tangatá, naʻá ne kole ange pe ʻe lava ke na toe vakaiʻi ha ngaahi veesi ʻe niʻihi.

Naʻe pehē ʻe ʻEletā Meletiti, “Naʻá ma sio ki he ngaahi poini kotoa ʻe 10 ko iá peá ma sio ki he Fakamatala Meʻa Hokohokó mo Sēmisi mo e tohi Fakahaá mo Kolinitō. Naʻe poleʻi ʻeku tuí, pea naʻe fakafou ʻi he uhouhonga ʻo e pole ko iá ʻa hono fakamālohia [ʻeku tuí] pea kuo teʻeki ke fakaʻalongaua ia talu mei he taimi ko iá.”

Naʻe fāʻeleʻi ʻa ʻAlavini Feleisa “Tulipi” Meletiti III ʻi Katanoka, Tenesī, USA ʻi he ʻaho 22 ʻo Siulai 1970 kia ʻAlavini mo Mele Meletiti. Naʻá ne mali mo Senifā Tenisi ʻEtikini ʻi he 1998 ʻi he Temipale Salt Lake. ʻOkú na maʻu ha fānau ʻe toko ono.

Naʻe ʻosi ʻa ʻEletā Meletiti mei he ʻUnivēsiti Pilikihami ʻIongí ʻi he 1994 mo ha mataʻitohi BA ʻi he saikolosiá pea maʻu mo hono mataʻitohi MA ʻi he pule pisinisí mei he ʻUnivēsiti ʻo Sikākoú ʻi he 2001. Kuó ne ngāue mo e GE Capital, Boston Consulting Group, mo e Asurion.

ʻI he kei talavou ʻa ʻEletā Meletití, naʻá ne ngāue ʻi he Misiona Utah Salt Lake City. ʻI he taimi hono uiuiʻi ia ko ha Fitungofulu Taki Māʻolungá, naʻá ne lolotonga hoko ko e palesiteni ʻo e Misiona Utah Salt Lake City South. Naʻá ne hoko foki ko ha Fitungofulu Fakaʻēlia, palesiteni fakasiteiki, tokoni ʻi he kau palesitenisī fakamisioná, pīsope, mo e faiako Lautohi Faka-Sāpate.