ʻEletā Clark G. Gilbert

ʻOku ʻiloʻi ʻe ha kakai tokolahi ʻa ʻEletā Kalake G. Kilipeti ko e palesiteni ʻo e BYU-Pathway Fakaemāmani Lahí mo e palesiteni mālōlō ʻo e ʻUnivēsiti Pilikihami ʻIongi—ʻAitahoó. ʻOku ʻiloʻi foki ia ʻe ha kakai tokolahi ko ʻene faʻu ʻa e fuofua polokalama ako ʻi he ʻinitanetí maʻá e ako māʻolunga angé ʻi he ongo ʻapiakó fakatouʻosi.

ʻOku houngaʻia ʻa ʻEletā Kalake ʻi he ngāue tokoni ʻuhingamālie ʻa e Siasí—ʻa hono tokoniʻi e kau talavou ʻi he loto kolo ʻo Positoni, Masasūseti, USA—ʻi hono teuteuʻi ia ke ne ʻave ʻa e ngaahi faingamālie fakaakó ki ha haʻofanga tokolahi ange. Naʻe hoko mai ʻa e faingamālie ngāue tokoni ko iá ʻi he taimi naʻá ne femoʻuekina ai ʻi he ako ʻunivēsití mo hono tauhi hono fāmili ne toki kamakamatá.

Naʻá ne pehē, “Naʻe ʻikai ke maʻu maʻu pē ʻe he kau talavou ko iá ha poupou lelei. Naʻa nau hoko ko ha konga ʻo ʻemau moʻuí, pea naʻe fakaʻau ʻo mau ʻofa ʻiate kinautolu.” Naʻá ku ako ke fakafanongo ki he ʻEikí peá u ʻiloʻi naʻá Ne kau ʻi heʻenau moʻuí. Naʻe malava ke u fanongo kiate Ia ʻokú Ne folofola mai ʻa e meʻa naʻe fie maʻu ke u fai maʻanautolú.”

Naʻe pehē ʻe ʻEletā Kilipeti naʻe akoʻi ia ʻe he ʻEikí fekauʻaki mo e ngaahi fiemaʻu ʻa e kakai kehé. “Naʻe ʻikai koeʻuhí pē ko ʻEne teuteuʻi ia au ki he akó, ka naʻá Ne fakahaaʻi mai kiate au ʻa e meʻa ʻoku malava ke Ne fakahoko ʻi he moʻui ʻa e kakaí ʻi ha tuʻunga loloto mo fakatāutaha.”

Naʻe fāʻeleʻi ʻa Kalake Kōtoni Kilipeti ʻi ʻOkalani, Kalefōnia, USA ʻi he ʻaho 18 ʻo Sune 1970 kia Paula mo Susana Kilipeti. Naʻá ne tupu hake ʻi Fīniki, ʻAlesona, USA. Hili ʻene ngāue ʻi he Misiona Japan Kobe, naʻá ne mali mo Kilisitina Kalata ʻi he 1994 ʻi he Temipale Salt Lake. ʻOkú na maʻu ha fānau ʻe toko valu.

Naʻe maʻu ʻe ʻEletā Kilipeti ha mataʻitohi BA ʻi he fengāueʻaki fakavahaʻapuleʻangá mei he ʻUnivēsiti Pilikihami ʻIongí ʻi he 1994, mataʻitohi MA ʻi he ako ki he feituʻu ʻĒsiá mei he ʻUnivēsiti Sitenifōtí ʻi he 1995, mo ha toketā ʻi he pule pisinisí mei he ʻUnivēsiti Hāvātí ʻi he 2001. Kuó ne ngāue ko ha tokoni palōfesa ʻi he Akoʻanga Pisinisi ʻa Hāvātí, tokoni palesiteni ʻi he ʻeketēmiká ʻi BYU–ʻAitahō, pea palesiteni mo ʻōfisa pule lahi ʻi he Deseret News mo e Deseret Digital Media.

Naʻe hoko ʻa ʻEletā Kilipeti ko ha Fitungofulu Fakaʻēlia ʻi he taimi ʻo hono uiuiʻí, kuó ne hoko ko ha palesiteni ʻo e kōlomu kaumātuʻá, tokoni ʻi he kau palesitenisī ʻo e Kau Talavou ʻa e siteikí mo e kau palesitenisī fakasiteikí, mo ha pīsope.