ʻEletā S. Mark Palmer

ʻE fakafetaʻi maʻu pē ʻa ʻEletā S. Maʻake Paame koeʻuhí ko e fiefia mo e ʻamanaki lelei ʻoku maʻu ʻi he ngāue tokoni mo e ouau fakatemipalé. Naʻe tokoni hano uiuiʻi ʻo ʻEletā Paame mo hono uaifi ko Sekiliní ke na ngāue fakauike ʻi he Temipale Dallas Texas, lolotonga ia ʻa e taimi femoʻuekina taha ʻo ʻena moʻuí, ke ne toe fokotuʻutuʻu lelei ai ʻene ngaahi taumuʻá. Naʻe hoko ʻa ʻene ngāue ʻi he temipalé ke akoʻi kiate ia ʻa e feilaulaú, palaní, mo e potupotutataú pea tokoniʻi ia ke ne manatuʻi ʻene ngaahi fuakavá pea hoko ko ha husepāniti mo ha tamai lelei ange. Naʻe fakamanatu kiate ia ʻe he ngāue ʻi he temipalé ʻa e natula taʻengata ʻo e fāmilí pea mo ha toe fakataha fiefia ʻi he kahaʻú mo e ngaahi ʻofaʻanga kuo pekiá, ʻo kau ai hano tuofefine ne pekia ʻi hono taʻu tahá.

Naʻe tokoni foki ʻa e ngāue ʻi he temipalé ke mateuteu fakalaumālie ai ʻa ʻEletā Paame ki he ngaahi uiuiʻi ʻi he kahaʻú ʻi he lakanga fakataulaʻeikí, ʻo kau ai ʻa ʻene hoko ko ha mēmipa ʻo e Kau Palesitenisī ʻo e Kau Fitungofulú. ʻE kamata ʻa ʻEletā Paame, ʻa ia ne hikinimaʻi ʻi he ʻaho 3 ʻo ʻEpeleli 2021, ʻi hono ngaahi fatongia foʻoú ʻi he ʻaho 1 ʻo ʻAokosi 2021.

Naʻe fāʻeleʻi ʻa Sitanilei Maʻake Paame ʻi he ʻaho 11 ʻo Fēpueli 1956, ʻi Te Puke, Matāfanga Mahú (Bay of Plenty), Nuʻu Sila, kia Keneti mo Sili Paame. Naʻe kau ʻa hono fāmilí ki he Siasí ʻi heʻene kei siʻí.

Hili haʻane ngāue fakafaifekau taimi kakato ʻi he Misiona New Zealand Wellington, naʻá ne maʻu ha mataʻitohi BA ʻi he pisinisí mei he ʻUnivēsiti ʻo ʻAokalaní ʻi he 1979 mo ha MA ʻi he pule pisinisí mei he ʻUnivēsiti Pilikihami ʻIongí ʻi he 1982. Lolotonga ʻene kei nofo ʻi Polovo, ʻIutā, USA, naʻá ne fetaulaki ai mo ha taʻahine toki ʻosi faifekau ko Sekilini Uti. Naʻá na mali ʻi he 1981 ʻi he Temipale Salt Lake. ʻOku ʻi ai ha fānau ʻe toko 6 mo e makapuna ʻe toko 16 ʻa e fāmili Pāmé.

ʻOku palesiteni ʻa ʻEletā Paame ʻi he SMP Ventures, ko ha kautaha fakalakalaka ʻi he fefakatauʻaki ʻapí mo e kelekelé ʻa ia naʻá ne fokotuʻu ʻi ʻOsitini, Tekisisi, USA. Kuó ne hoko ko ha pīsope, palesiteni fakasiteiki, palesiteni ʻo e Misiona Washington Spokane (2009–12), palesiteni fakataimi ʻo e Misiona Australia Sydney South (2014), pea mo ha Fitungofulu Fakaʻēlia.

Naʻe hikinimaʻi ia ko ha Fitungofulu Taki Māʻolunga ʻi he ʻaho 2 ʻo ʻEpeleli 2016, pea ʻokú ne lolotonga hoko ko e palesiteni ʻo e ʻĒlia ʻAfilika Tongá.