ʻEletā Patricio M. Giuffra

Naʻe kei taʻu fā ʻa ʻEletā Patelesio M. Kiufila ʻi he taimi naʻe pekia ai ʻa ʻene tamaí ʻi he kanisaá. ʻI heʻene kei siʻí, naʻá ne tupu hake ʻo fehuʻia ʻa e ʻOtuá mo fifili pe ko e hā ʻoku ʻikai ke potupotutatau ai ʻa e moʻuí.

Naʻe manatuʻi ʻe ʻEletā Kiufila ʻa ʻene fakakaukaú, “Naʻe hoko ʻeku tamaí ko ha husepāniti, tamai mo ha tauhi lelei. Ko e hā e ʻuhinga naʻe pau ai ke ne maté?”

Naʻe toki maʻu ʻa e ngaahi talí mo e fakakaukau mahinó ʻi he hili nai ha meimei taʻu ʻe hongofulu mei ai ʻi he taimi naʻe fetaulaki ai ʻa Patelesio mo ʻene faʻeé mo e ongo faifekau taimi kakató peá na tali ʻa e ongoongoleleí.

Naʻe ʻoange ʻe he palani ʻo e fakamoʻuí ha ʻamanaki lelei he naʻe tokoni ia ke mahino kiate ia ʻa e pekia ʻa ʻene tamaí. Naʻá ne pehē, “Naʻe teuteuʻi ʻe heʻeku tamaí ʻa e halá maʻamautolu ke mau kau ai ki he Siasí.”

Talu mei he taimi ne papitaiso ai ʻa ʻEletā Kiufilá, kuo hoko ʻa e ongoongolelei ʻo Sīsū Kalaisí ko ha taula ia ki heʻene moʻuí. Naʻá ne pehē, “Kuo hoko ʻa e Siasí ko ʻeku moʻuí ia. ʻOku ou ongoʻi hangē ne u ʻosi kau fuoloa pē ki he Siasí.”

Ne hoko ha meʻa mahuʻinga ʻi he 1989 ʻi he taimi naʻe sila ai ʻa ʻEletā Kiufila ki heʻene ongomātuʻá mo hono ngaahi tokoua kuo nau pekiá ʻi he Temipale Ogden Utah. ʻI he hili ʻa e ouaú, naʻe fanafana ange ʻa ʻene faʻeé, “Naʻá ku ongoʻi naʻe ʻi heni hoʻo tamaí.”

Naʻe fāʻeleʻi ʻa Patelesio Maulisio Kiufila Vakasi ʻi Valapalaiso, Silei, ʻi he ʻaho 6 ʻo ʻEpeleli 1962, kia Lasalo Tanite Kiufila Lifo mo ʻOlokā Losa Vakasi Kanalesi. Naʻá ne tupu hake ʻi Valapalaiso, Silei pea mali mo Malia ʻIesina Konisalesi ʻOlomosi ʻi he Temipale Santiago Chile ʻi he 1992. ʻOkú na maʻu ha fānau ʻe toko fā.

Naʻe maʻu ʻe ʻEletā Kiufila ha mataʻitohi BA ʻi he tuʻuakí (fakamāketí) mo e liliu leá/fakatonuleá mei he ʻUnivēsiti Pilikihami ʻIongí ʻi he 1990 mo ha mataʻitohi MA ʻi he pule pisinisí mei BYU ʻi he 1994.

Kuó ne ngāue ko ha pule hū koloa maʻá e Woodgrain Millwork (1994–96), pule fefakatauʻaki mo e ngaahi ngāué maʻá e Alvenius Chilena (1996–98), mo e pule lahi ʻi he Carbotech Chile (1998–99) mo e Arcotex SA (2000 ʻo aʻu ki he taimí ni).

Naʻe ngāue fakafaifekau taimi kakato ʻa ʻEletā Kiufila ʻi he Misiona Chile Osorno, sekelitali pule ʻi he siteikí, palesiteni ʻo e Kau Talavou ʻi he siteikí, pīsope, mo e palesiteni fakasiteiki. Kimuʻa pea uiuiʻi ia ke ne hoko ko ha Fitungofulu Taki Māʻolungá, naʻá ne hoko ko ha Fitungofulu Fakaʻēlia ʻi ʻAmelika Tonga.