Fakaleleiʻi e Ngaahi Fiemaʻu ki he ʻOsi mei he Seminelí
Kuo fakaleleiʻi e ngaahi fiemaʻu ki he ʻosi mei he seminelí, ke poupouʻi ʻa hono ako ʻo e ongoongoleleí ʻi ʻapí pea mo poupouʻi ʻa hono lau fakaʻaho ʻo e folofolá. ʻI he taimi ní, he ʻikai ke toe lipooti ʻe he kau akó pe ne nau fakakakato ʻa hono lau ʻo e ʻū tohi folofolá (Fuakava Motuʻá, Fuakava Foʻoú, Tohi ʻa Molomoná, mo e Tokāteline mo e Ngaahi Fuakavá mo e Mataʻitofe Mahuʻingá) ʻi he lolotonga ʻo ʻenau ako taʻu ʻe faá; ka te nau lipooti pe naʻa nau lau nai ʻa e ngaahi folofolá ʻi he ʻaho takitaha ʻo ʻikai toe siʻi hifo ʻi he pēseti ʻe 75 ʻo e taimí.
ʻOku liliu heni ʻa e tokangá mei hono fakatonuki pē ha puhá ki hono fokotuʻu ha tōʻonga moʻui angatonu ʻo e tuʻunga fakaākongá ʻa ia ʻe tāpuekina ai ʻa e kau akó ʻi he kotoa ʻo ʻenau moʻuí. ʻOku hoko foki ʻeni ke malava ai ʻa e seminelí, ʻa ia ne toki liliu ke fakafenāpasi mo e taimi-tēpile laukonga māhina ʻe 12 ne fokotuʻu ki he Haʻu, ʻo Muimui ʻIate Aú, ʻo fengāueʻaki mo e ngaahi houalotu kotoa ʻo e Siasí ke poupouʻi hano ako ʻo e ongoongoleleí ʻa ia ʻoku fakatefito ʻi ʻapi pea poupouʻi ʻe he Siasí.1
ʻOku kau ʻi he ngaahi fiemaʻu makehe ki he seminelí ʻa e maʻu-kalasi peseti ʻe 75 mo lava ʻi he siví ʻaki ha maaka ko e peseti ʻe 75 pe lelei ange. Kuo fetongi ʻe he ʻū tohi fakamoʻoni kuo kakató, ʻa ia ʻoku lahi ange hono tali ʻi he ngaahi feituʻu ʻe niʻihi, ʻa e ʻū tohi fakamoʻoni ʻo e fakalangilangí ne ngāue ʻaki kimuʻá.