Ko e Tui ke Lotu ke Maʻu ha Maná

ʻOku saiʻia maʻu pē ʻa Brother Siosefa Palaisi ʻo e Siteiki ʻOkalani Nuʻu Sila Papatoetóe ʻi he honé. ʻOkú ne laukonga fekauʻaki mo e fanga honé ʻi he folofolá—ki he anga hono fetuku ʻe he kau Sēletí he kuonga muʻá ʻa e fanga honé (ʻEta 2:3), mo e founga maʻu meʻatokoni ʻa Līhai mo hono fāmilí mei he huhuʻaʻi honé (1 Nīfai 17:5).

ʻOku saiʻia foki ʻa Siosefa ʻi he hiva fekauʻaki mo e fanga honé ʻi ha himi manakoa fekauʻaki mo e ʻUluaki Mata Meʻa-Hā-Maí pea ʻokú ne fakalaulauloto ki he taumuʻa fakaofo ʻo e fanga honé ʻi he māmaní. ʻOku pehē ʻe Siosefa, “Ka ne ʻikai ke nau fakafuaʻi ʻa e ʻakaú, he ʻikai moʻui ʻetau ngaahi fāmá.”

Naʻá ne fakaʻānaua ki ha ʻaho te ne tauhi ai haʻane fanga hone, pea ʻi he 2018, naʻe faifai pea maʻu ʻe Siosefa—kuó ne hoko he taimí ni ko ha kui tangata—hano faingamālie. Naʻá ne fakatau mai ha punungahone ʻe ua peá ne fokotuʻu ia ʻi mui hono ʻapí peá ne ʻomi mo ha teunga tauhi hone ke tui ʻi he taimi kotoa pē ʻokú ne ʻaʻahi ai ki he fanga honé Naʻe ʻikai fuoloa kuo hoko ʻene saiʻia he tauhi e fanga honé ko ha meʻa ʻokú ne manako ke fakahoko.

ʻOkú ne kata mo pehē, “Ko ha founga fakafiefia ia ke fakahoungaʻi ai e ngaahi fakatupu ʻa e Tamai Hēvaní, pea ʻoku ʻikai taungutu mai ʻa e fanga honé kiate au.” ʻOkú ne līʻoa ki heʻene punungahoné pea ʻoku faʻa fehuʻi ange ʻe hono ʻofefiné pe ʻoku fēfē ʻene “fānau honé.” . . . pea hangē ko e meʻa ʻoku fai ʻe he fānaú, kuo akoʻi ʻe he fanga honé kiate ia ha ngaahi lēsoni mahuʻinga ʻi he moʻuí.

ʻOku manatu ʻa Siosefa ki ai ʻo pehē, “Ne ʻi ai ha ʻaho ʻe taha ne u ʻaʻahi ai ki he punungahoné ʻo ʻikai tui hoku teunga tauhi honé. Naʻe lea hotau palōfita ko Lāsolo M. Nalesoní ʻi ha fakatahaʻanga fakavahefonua ʻi ʻAokalani he ʻaho hono hokó—pea naʻá ku ʻalu ke fua hoku fatongiá he fakataha ko iá mo hoku matá naʻe huhu ʻe he honé.”

Naʻe akoʻi ia ʻe he meʻa naʻá ne aʻusiá ʻoku mahuʻinga ke maluʻi fakatuʻasino mo fakalaumālie maʻu pē ia.

Ko e tumutumu ʻo e tauhi punugahone ʻa Siosefá ʻa e taimi naʻe fakatupu ai heʻene punungahoné ha huhuʻaʻi hone fakaʻofoʻofa ne kilokalami ʻe 60. Naʻe lahi e ʻū hina hone naʻá ne foakí pea naʻá ne maʻu ha ngaahi fakamatala poupou lelei. ʻOku vēkeveke ʻa Siosefa ʻo pehē, “Naʻa mo hoku kaungāmeʻa ʻokú ne fakalele ha pisinisi huhuʻaʻi honé, naʻá ne pehē ʻoku ifo ange ʻeku huʻa honé ʻi he meʻa ʻoku nau ngaohí.” ʻOku ʻikai ke ne faʻa tatali ke sio ki he ola ʻe maʻu mei heʻene punungahoné ʻi he faʻahitaʻu hono hokó.

Ka ʻi ha pongipongi ʻe taha, naʻá ne ʻilo ai kuo ngeʻesi ha punungahone kakato ia ʻe taha. Kuo mavahe kotoa ʻa e fanga honé ia!

Naʻe fekumi holo ʻa Siosefa ʻi he kaungāʻapí, ka naʻe ʻikai pē ha ola. Naʻá ne fakamatala ʻo pehē, “Ko e taimi ʻe niʻihi ʻoku fakakaukau ʻa e kuini [honé] ia ke mavahe pea ʻokú ne fetuku fakataha mo ia ʻa ʻene fanga hone ʻi he punungá. Ko e taimi ʻe niʻihi te ke lava ʻo maʻu kinautolu, pea taimi ʻe niʻihi ʻoku ʻikai.”

Naʻá ne ʻiloʻi ko e taimi pē ʻe mavahe ai ha fanga hone mei honau nofoʻangá, ʻoku ngalingali he ʻikai pē te nau toe foki mai. ʻIkai ngata aí, ka ʻoku ʻikai teitei kolonia ʻe he fanga honé ha punungahone kehe. Ko e ʻuhinga ʻeni ʻoku faʻa tauhi ai ʻe he kau tauhi honé ha ʻū punungahone ʻoku lahí – ka naʻe ua pē ʻa e punungahone ʻa Siosefá.

Ko e fakamamahí, he ne hili pē ha māhina ʻe ua mei ai, naʻe liʻaki foki mo ʻene punungahone hono uá.

Naʻe loto-mamahi ʻa Siosefa: “Naʻá ku loto-mamahi ʻaupito. Naʻá ku ongoʻi moʻoni hangē kuo mole haʻaku meʻá.”

Naʻá ne tautau hono teunga tauhi honé peá ne ʻalu ʻo tala ki hono uaifi ko ʻAtelaité ʻa e ongoongo fakamamahí. Naʻe talaange ʻe Siosefa kiate ia, “Kuo puli kotoa ʻeta fanga honé.” Naʻe fakalotolahiʻi ia [ʻe hono uaifí] ke ne lotu.

Talu mei he pongipongi ko iá mo e lotu fakamātoato ʻa e ongomeʻá ni he ʻaho kotoa pē maʻa ʻena fanga honé. Ne na fakamālō ki he Tamai Hēvaní koeʻuhí ko e faingamālie ke tauhi ʻa e fanga honé, pea mo e fiefia ne na aʻusiá, pea naʻá na lotua leva ke hoko ha mana—ke toe foki mai ʻa e fanga honé.

Ka ʻi he ʻosi ha meimei uike ʻe ua, naʻe kamata ke taʻetui ʻa Siosefa. Naʻá ne talaange kia ʻAtelaite ʻokú ne mateuteu ke toʻo hifo ʻene ngeʻesi punungahoné pea fakatau mai pē ha fanga hone foʻou ʻi he faʻahitaʻu hokó. Naʻá ne talaange kiate ia, “ʻOku faʻa hoko pē ngaahi meʻá ni. Ta tuku ā kia natula ke fai ʻene ngāué.”

Ka naʻe ʻikai mateuteu ʻa ʻAtelaite ia ke loto-foʻi. Naʻá ne puke e ngaahi lea ʻa ʻAmulekí ʻi hono lotó:

ʻIo, fakavaivaiʻi ʻa kimoutolu, ʻo fai atu ʻi he lotu kiate ia . . . Tangi kiate ia koeʻuhi ko e fua kotoa pē ʻo hoʻomou ngaahi ngoué, koeʻuhí ke mou tuʻumālie ai . . . ke nau tupu ʻo tokolahi. (ʻAlamā 34:19–20, 24–25)

Naʻe ʻikai tuku ʻene lotú.

ʻI ha pongipongi Tokonaki ʻe taha, naʻe fakatokangaʻi ʻe Siosefa ha fanga hone ʻoku nau taka ofi holo ʻi ʻolunga heʻene ngoue matalaʻiʻakaú. Tuʻunga ʻi heʻene taukei he tauhi honé, naʻá ne fakatokangaʻi ai naʻe tokolahi e fanga hone ne nau fetuku ʻa e pōlení, pea naʻe huʻu ʻenau halangá ki heʻene punungahoné.

Naʻe fakavave ʻa Siosefa ke tui hono teunga tauhi honé peá ne ʻalu ke fakatotoloʻi. Naʻe fakapupunga ʻa e fanga honé ki haʻane punungahone ʻe taha, pea ʻi heʻene fakaava hake iá, naʻe fonu ia ʻi ha fanga hone femoʻuekina ʻe lauiafe.

Ne loʻimataʻia ʻa Siosefa peá ne fai fakalongolongo ha kiʻi lotu fakafetaʻi. Naʻá ne fakasio ʻa e kuini ʻo e fanga honé peá ne fakamālō ange ʻi heʻene ʻomi hono koloniá ki heʻene punungahoné. Hili iá naʻá ne lele leva ki fale ke talaange kia ʻAtelaite.

“Naʻá ku pehē ange, ʻʻOfaʻanga, mateʻi mai pe ko e hā? Kuo foki mai ʻa e fanga honé!’” Naʻá ne fāʻofua mo ʻuma ki hono uaifí, peá ne talaange, “ʻOku lahi hake hoʻo tuí ʻi heʻeku tuí.”

ʻOku aʻu ki he ʻahó ni, ʻoku ʻikai pē ʻilo ia ʻe Siosefa pe ko e fanga hone ʻi heʻene punungahoné ko e fanga hone tatau pē ia ne nau mavahe kimuʻá, pe kuo kolonia ʻe ha fanga hone foʻou ʻa e punungahoné. Koeʻuhí ʻoku ʻikai angamaheni ke hoko ha tūkunga pehē, ʻokú ne ʻiloʻi pē naʻe hoko ha mana, pea naʻe muʻomuʻa ai ʻa e tuí.

ʻOku pehē ʻe Siosefa, “Naʻá ku meimei veiveiua ʻo pehē, ʻtuku ā ki natula ke fai ʻene ngāué,’ ka naʻe ʻikai teitei pehē ʻa hoku uaifí. Kuó u ako ke ʻoua naʻá ku teitei foʻi ʻi heʻeku ngaahi lotú kae falala ki he Tamai Hēvaní. He ʻikai hoko maʻu pē ha mana, ka ko e taimi pē ʻe hoko aí, ʻokú ne ʻomi ha fiefia lahi.”