2021
?Olsem Wanem Mi Save Help blong Winim Fasin blong No Gat Jastis?
Septemba/Oktoba 2021

?Olsem Wanem Mi Save Help blong Winim Fasin blong Stap Gat Ol Rong Tingting?

Hemia sikis wei we yumi save lego fasin blong stap gat ol rong tingting long man mo promotem respek.

Pikja
women sitting in circle enjoying sharing stories in group meeting

?Wanem Nao Mi Save Mekem blong Winim Fasin blong Stap Gat Ol Rong Tingting?

1. Lukluk insaed fastaem. Yumi save komitim yumi blong stap luksave insaed long yumi wanwan mo lego fasin blong stap gat eni “fasin mo ol aksen blong fasin blong stap gat ol rong tingting long man.”1

Presiden Russell M. Nelson i talem se, “!Eniwan long yumi we i gat fasin blong stap gat ol rong tingting long ol narafala man, i nidim blong sakem sin!”2

2. Lukaotem blong andastanem. Tekem taem blong lisin long olgeta we oli bin eksperiensem fasin blong gat jastis. Hemia i save gat tu buk ol muvi mo ol nius ripot abaot topik ia.3

Darius Gray, wan popula lida mo memba blong Jos we i haf Afrika Amerika, i bin talem, “[Sapos yumi traem blong lisin gud olgeta we yumi tingting long olgeta olsem ‘ol narawan,’ mo sapos yumi ones blong lukluk nomo long olgeta mo letem olgeta oli serem wanem i stap hapen long laef blong olgeta, ol histri blong olgeta, ol famli blong olgeta, ol hop blong olgeta, ol harem nogud blong olgeta, bae yumi no kasem nomo wan bigfala save, be praktis ia bae i save help bigwan blong hilim ol harem nogud from fasin blong lukluk long kala blong skin].”4

3. Toktok Stret. Sapos yu harem wan man i tokbaot wan samting we i no tru o givim wan aedia we i no stret abaot fasin blong lukluk long kala blong skin, yu tok stret long hem wetem fasin we we i kaen mo i klia.

Presiden Dallin H. Oaks, Fas Kaonsela long Fas Presidensi i bin talem, “[Olsem ol memba blong Jos Ia blong Jisas Kraes blong Ol Lata-dei Sent, yumi mas mekem moa gud blong help blong rutumaot fasin blong stap gat ol rong tingting].”5

Elda Gerrit W. Gong blong Kworom blong Olgeta Twelef i bin tijim, “Oli invaetem yumi blong mekem wol i kam moa gud, stat insaed i go aotsaed, wan man, afta wan famli, afta wan neba, i go.’’6

?Wanem Nao Mi Save Mekem Sapos Mi Bin Eksperiensem Ol Tritmen We I No Stret?

Pikja
man in wheelchair communicates cheerfully with employees at the office

1. Fogiv, mo kasem wan fren. Taem yumi harem nogud tru long ol aksen blong ol narafala man, yumi save tij, fogiv mo lukaotem blong bildimap wan rilesensip.

Taem mi stap givim seves olsem wan Eria Seventi, Elda Fred A. ‘Tony” Parker i bin talem: “[Taem mi wan viktim blong fasin blong lukluk long kala blong skin, mi bin faenem sakses taem mi stap mitim o tok stret, stap fogivim wanwan man o woman mo stap adresem problem ia. Sapos wan i talem wan samting blong spolem ol filing blong mi, mi nidim blong faenem wan wei blong helpem hem blong andastanem from wanem hemia i mekem mi filim nogud tumas. Hem i wan janis blong no fogiv nomo, be blong bildimap wan rilesensip, we man ia bae i no lukluk long Tony Parker olsem wan man haf Afrika-Amerika nomo, be olsem wan pikinini blong God. Jisas i tijim fasin blong fogiv (luk long Matiu 18:21–35), mo tijim se se taem wan man i mekem nogud long yumi blong yumi go stretem wetem man ia (luk long Matiu 18:15).”7

2. Lanem ol lesen aot long ol man we oli gat ol eksperiens we i mekem oli harem nogud tumas (luk long Doktrin mo Ol Kavenan 122:7).

Revren Amos C. Brown i talem wan stori abaot Howard Washington Thurman. Hoas blong Howard i stap narasaed long wan woman we i stap tritim nogud famli blong hem from se Howard olgeta oli blak—iven woman ia i stap sakem toti sitsit blong faol we i karem long haos blong ol faol i go narasaed long yad blong Thuman olgeta.

Taem woman ia i kasem wan bigfala sik, mama blong Howard i karem sam sup mo ol ros flaoa i go long hem. Wetem fasin blong talem tangkyu, woman ia i askem se ol flaoa ia i kam wea. Misis Thurman i eksplenem se, “Taem yu stap sakem ol toti blong haos blong faol, God i stap mekem rere graon.”

“[Hemia nao wanem we yumi mas mekem long medel blong ol ivel],” Revren Brown i bin talem. “Tekem ol toti long haos blong faol, be gat fet long God blong yusum blong planem wan garen blong ol ros flaoa.”8

3. Tanem i go long Kraes blong i hilim mo lidim yu. Blong stap trastem Sevya long taem blong harem nogud mo blong stap folem Hem, i save karem pis i kam.

Elda D. Todd Christofferson blong Kworom blong Olgeta Twelef Aposol i bin tijim se, blong ademap long fasin blong pemaot man long sin blong mekem wanem we jastis i wantem long yumi, Jisas Kraes “i stretem tu ol kaon we jastis i gat long yumi taem hem i stap hilim mo pemaot yumi from eni safaring we yumi go tru long hem nomata se yumi raet.”9

Jisas Kraes i givim eksampol stret eksampol blong yumi folem. Hem i tijim yumi long wanem blong mekem taem wan i mekem yumi harem nogud (luk long Matiu 18:15), kasem hadtaem (luk long Matiu 5:38–48), mo iven blong oli panisim blong i ded long wan fasin we i no stret (luk long Luk 23:34).

Ol Not

  1. Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, 38.6.14, ChurchofJesusChrist.org.

  2. Russell M. Nelson, long “Presiden Nelson We I Serem long Sosol Pos abaot Fasin blong Lukluk long Kala mo Singaot from Ful Respek we Evriwan I Mas Kasem,” Newsroom, Jun 1, 2020, newsroom.ChurchofJesusChrist.org.

  3. Luk long “[Stap Lukaotem Infomesen aot long Ol Ples We Yu Save Dipen long Hem],” Jeneral Hanbuk, 38.8.45.

  4. Darius Gray, “Healing the Wounds of Racism,” Apr. 5, 2018, blog.ChurchofJesusChrist.org.

  5. Dallin H. Oaks, “Lavem Ol Enemi Blong Yu,” Liahona, Nov. 2020.

  6. Gerrit W. Gong, “Evri Kantri, Famli mo Lanwis,” Liahona, Nov. 2020.

  7. Fred A. “Tony” Parker, “The Savior Heals Our Hurts,” Ensign, June 2018, 44–45.

  8. “We Are Family: A Discussion on Overcoming Prejudice with Elder Jack N. Gerard and the Reverend Amos C. Brown,” Liahona, Sept. 2021, digital version.

  9. D. Todd Christofferson, “Redemption,” Liahona, Mei 2013, 110.