Jisas Kraes I Save Ol Harem Nogud We Yumi Filim Tru long Fasin blong Stap Gat Ol Rong Tingting
Man we i raet i stap laef long Gaoteng Provins, Saot Afrika.
Wanem we mi faenemaot i we blong lukluk long ol pipol olsem we Sevya bae i luk olgeta.
Long open haos blong Rom Tempol long Itali, ol memba blong Jos oli raonem statiu blong Kraes , olsem we oli bin luk tru long windo blong visita senta.
Mi bin eksperiensem fasin blong stap gat ol rong tingting long man o ol tritmen we i no stret long ol defdefren wei blong kolosap 20 yia.
Afta we mi joenem Jos long Mosambik, mi muv i go long Saot Afrika. Hem i wan naesfala kantri, wan long ol ples we i develop bigwan long Afrika. I naes tumas tru long ol defdefren pipol mo wan kalja we i rij plante.
Saot Afrika i wan nesen we i stap hil yet from wan histri blong seperesen from kala blong skin we i spolem olgeta. Nomata long polisi blong seperesen we oli bin stretem mo putum wan en long hem long 1994, ol mak blong harem nogud long fasfala polisi ia i bin stap yet,we gavman i bin putumaot.
Olsem wan Blak Mosambik Lata-dei Sent woman, we i stap laef long Saot Afrika blong 18 yia, mi faenem wei blong aot long ol hadtaem blong stap sef long ol fasin blong no pat mo ol nogud tritmen, we i stap hapen, olsem blong lukluk kala blong skin mo blong jajem man folem ol samting we oli gat o nogat. Fasin blong lukluk kala blong skin, wanem grup oli pat long hem, traeb we oli pat long hem, sapos oli woman o man mo fasin blong stap gat ol rong tingting wetem ol pipol blong defren kantri i sam long ol eksampol blong ol problem blong ol seperesen we sosaeti i stap fesem yet. I gat wan samting we i stap long medel blong ol man ia we oli folem fasin blong wol we oli stap wantem blong seperetem sosaeti mo mekem yumi bilivim se, blong luk o stap defren i wan nogud samting.
Wanem We Yumi Traem blong Mekem
Olsem ol memba blong Jos, ?yumi save dipen long wei ia blong tingting? Yes fulwan. Yumi evriwan i mas lego man ia we i folem fasin blong wol tru long ol hadwok blong yumi taem yumi stap laef long wol ia blong kam wan sent tru long atonmen blong Kraes (luk long Mosaea 3:19).
Taem ol pikinini blong mi mo mi i filim se mifala stap mifala wan, o filim se i no gat man i luksave mifala, filim se mifala i no semmak o gat strong filim blong wantem save o lanem samting, mifala i kam hom mo tokbaot. Mi i talem, “?Wanem i jes hapen? Bae yumi karemaot hemia. ?Bae yumi tokbaot from wanem ol pipol oli gat fasin olsem.” Blong stap tokbaot hemia, i help blong stopem ol filing blong stap wari insaed long mifala.
Mi traem blong tijim ol pikinini se ol gudfala fasin blong mifala, bae mifala i soem tru long olsem wanem mifala i tritim ol pipol we oli filim se oli no impoten o pat long wan sosaeti (luk long Matiu 25:40). Hemia i minim se, blong stap lukaotem ol wei blong givhan long ol narafala man mekem se oli no filim se oli no impoten o pat blong wan sosaeti.
Mi Traem blong Kam Olsem Jisas
Olsem we sam long ol eksperiens ia i nogud bigwan, ol lesen we mifala i stap lanem, oli stap mekem ol pikinini blong mi oli kam ol moa gud pipol. Mo mi tu. Ol harem nogud blong mifala i helpem mifala blong developem filing blong gat bigfala sore mo blong save andastanem filing blong ol narafala man.
Blong gat ol eksperiens blong stap gat ol rong tingting, oli givim janis long mi blong save jusum samting. ?Bae mi save stap soem fasin blong kros mo faetbak, o bae mi givim long man ia wan narafala janis, wan namba tu janis, wan namba tri o namba fo janis? ?Bambae mi gohed blong lukluk sosaeti olsem wan ples we i blong fraet o bae mi gohed blong stap olsem wan man blong pusum ol narafala man blong mekem ol gudfala jenis?
Sevya i fesem tu fasin blong stap gat ol rong tingting from huia Hem, wanem we Hem i bilif long hem, mo wea ples Hem i kam long hem (luk long Jon 1:46). Yet, Hem i no faetbak, kros o no laekem ol man we oli mekem nogud long Hem. Hem i tijim agensem evri samting ia mo tekem aksen wetem lav mo trutok. Hem i tijim se paoa o fos we man i save yusum o mas yusum tru long fasin blong winim tingting blong man, wetem fasin blong gat longfala tingting long hadtaem, wetem fasin we i kaen mo fasin blong gat lav (luk long Doktrin mo Ol Kavenan 121:41). Hem i tijim se taem wan i mekem i nogud long yu, yu mas go luk brata blong yu mo talemaot long hem mo yutufala i save fiksim tugeta (luk long Matiu 18:15). Hem i tijim yumi blong prea from olgeta we oli givim hadtaem long yumi (luk long Matiu 5:38–48). Mo taem Hem i fesem ol jajmen we i stret mo hang long kros blong i ded, Hem i tijim blong yumi fogivim olgeta we oli no save samting we oli stap mekem (luk long Luk 23:34).
Long en, hemia i lav blong Hem we bae i jenisim yumi mo wol ia (luk long 2 Nifae 26:24).
Mo Bae Mi Gohed blong Stap Traem
Mi no wan man we mi stret evriwan; mi no stap fogivim man kwiktaem taem oli mekem nogud long mi. I nidim taem, i nidim hiling mo Tabu Spirit blong stap wok wetem mi. Samtaem mi jusum blong harem nogud, mo no stap lisin long smol voes blong spirit hariap. Be sapos mi kam long Hem, bae Spirit i wok wetem mi long fasin blong save wet longtaem kasem taem we mi save andastanem wanem Papa long Heven bae i wantem mi blong mekem long ol situesen.
Wanem we mi faenemaot i we, blong lukluk long ol pipol olsem we Sevya bae i lukluk olgeta. Blong mekem hemia, yumi mas wantem blong luksave se yumi no gat evri ansa. Taem yumi wantem blong talem, “Mi mi no stret evriwan; mi gat fulap samting blong lanem. ?Wanem nao mi save lanem aot long wanem we ol narafala man oli stap tingting long hem?”—we i taem yumi rili save harem olgeta. Hem i taem yumi save rili save luk.
Taem mi go tru long rod ia, i helpem mi blong tingbaot se mi stap long ples ia from wan stamba tingting, mo we ol tes blong laef oli blong wan sot taem—wan impoten pat blong laef long wol ia—mo we mi no stap ia miwan. !Tru evri samting ia, mi stap traem blong kam olsem Jisas! Blong stap traem i aktiv, mo taem yumi fel, yumi save traem bakegen.