N na Kanga n Tokanikai iaon te Inanonano?
Aikai onoua kawai are ti na kona ni kitanii inanonano ao ni boutoka te karinerine.
Tera ae N na Kona ni Karaoia n Tokanikai iaon te Inanonano?
1. Taraa inanona moa. Ti kona n iangoia ni kinaa bon mai iroura ao ni kitanii “anua ao mwakuri n inanonano.”1
Beretitenti Russell M. Nelson e taku, “Ane iai mai buakora are iai irouna te inanonano nakon te reeti teuana e kainnanoa te rairannano!”2
2. Ukeuke n oota. Anaa te tai n ongora nakoia koraki ake a tia n rinanon te inanonano. Aio are e kona n reitaki ma booki ake a tau, tamnei, ao atuun rongorongo ake a ribootinaki iai.3
Darius Gray, te membwa ao te tia kairiiri n te Ekaretia ae te I Aberika n Amerika ae kinaaki, e kamataua, “Ngkana ti kataia n ongora ni koaua mairouia koraki ake ti iangoia n aroia ‘ake tabeman,’ ao ngkana ara taratara ae kokoaua bwa a na tibwai taekan aron maiuia, rongorongoia, aia utu, aia kantaninga, ao marakiia, tiaki tii karekea te atatai ae korakora, ma te mwakuri aei e na kakorakora te ibuobuoki nakon kamaoan te maneka n te kakaokoroaki n te reeti.”4
3. Taetae. Ngkana ko ongo iroun temanna n tibwai kaairua ke iango aika aki raoiroi iaon te reeti, taetae n akoi ma te kawai ae e mataata.
Beretitenti Dallin H. Oaks, Moan Kauntira n te Moan Beretitentii e taku, “Ngkai ngaira kaain Ana Ekaretia Iesu Kristo ibukiia Aika Itiaki ni Boong aika Kaitira, ti riai ni karaoa ae raoiroi riki ni buokia ni kamauna te kakaokoroaki n te reeti.”5
Unimwaane Gerrit W Gong man te Kooram n Abotoro n Tengaun ma Uoman e reirei, “Ti kaoaki bwa ti na bita te aonaaba nakon ae tamaroa riki, mai inanona n otinako, temanna te aomata, te utu, ao temanna kain rarikira n te tai teuana ma teuana.’’6
Tera ae N na Kona ni Karaoia Ngkana I a Tia n Rinanon te Kakaokoroaki?
1. Ngkana ti kabwara ana bure temanna are e bure nakoira, a na bon riki bwa rao n taai aika a na roko. Ngkana ti maraki man aia mwakuri tabeman, ti kona n reireiniia ao ni kabwara bure ao ukoria ni katea te iraorao.
Ngke e mwakuri bwa te Kaitingaun n te Aono, ‘Tony” Parker e taku: “Ngke I a tia n riki ni kakakoroaki n te reeti I a tia ni kunea te tokanikai ni kaitaraa te bwai are e bon kaineti nako iai, kabwara aia bure te aomata ao taetae iaon te tabeka. Ngkana temanna e taekina te bwai teuana are e kamaraka au namakin, I tangiria ni kakaea te kawai ni buoka teuanne n oota bwa bukin tera e kamaraki anne. Bon te tai tiaki tii te kabwarabure ma katean te iraorao n te aro are te aomata e aki tii taraa Tony Parker ngkai te I Aberika-Amerika ma n aron ae natin te Atua. Iesu e reirei te kabwarabure (taraa Mataio 18:21–35), ao E reireiniira ngkana ti un ti na uotia nakoia tabeman ao ni mwakuriia (taraa Mataio 18:15).”7
2. Reiakina te reirei ae ibuobuoki man taneiai aika kamaraki (taraa Reirei ao Berita aika Tabu 122:7).
Te Minita Amos C. Brown e karakina karakinan Howard Washington Thurman. Howard e maeka ni kaan ma te aine are e aki akoniia ana utu ibukina bwa a bwatabwata—riki karenakoan butaenimoa man nen nakotariia ana moa inanon ana auti Thurman.
Ngke e bwaka n aoraki te aine arei, tinan Howard e uota tabeua tuubu ao rooti. Ma te kakaitau, te aine e titiraki bwa a roko mai iaa uee. Nei Thurman e kabwarabwara, “Ngke ko karenakoi butaenimoa, te Atua e bon katauraoa te tano.”
“Anne bon te bwai are ti na karaoia inanon mabubun te buakaka,” e taku Reverend Brown. “Anaakin te butaenimoa ma karekean te onimaki iroun te Atua ni kabwebwea te onaroka n rooti, te kantaninga n te rongorongo aei e bon kauringiira bwa aroaro aika bubuaka e kona ni bitaki mairoun te Atua ni karekea mwiina ae tamaroa.”8
3. Rairaki nakon Kristo ibukin kamarurung ao kairiiri. Onimakinan te Tia Kamaiu ma marakim ao n Iriiria e kona ni uota te rau.
Unimwaane D. Todd Christofferson man te Kooram n Abotoro n Tengaun ma Uoman e reirei bwa n reitakin kamaiuara man te bure man kakoroan kainnanoan te motitaeka are e mena iaora. Iesu Kristo “e kakoroa nanon naba te tarau ni motikitaeka are e kabaeki iaora man kamarurungiira ao kabomwii ibukira ibukin karawawata nako are ti teimatoa rinanona.”9
Te Tia Kamaiu e katauraoa te banna ni katooto ae nakoraoi ibukira ae ti na iria. E reireiniira bwa tera ti na karaoia ngkana iai ae karaoa te kairua nakoira (taraa Mataio 18:15), bwainikirinaki (taraa Mataio 5:38–48), ao riki ni kairua ni motikaki taekana nakon te mate (taraa Ruka 23:34).