Fet long Lod Jisas Kraes

“Lod i no nidim bilif blong yumi blong i stret evriwan blong yumi save yusum paoa blong hem we i stret evriwan. Be Hem i askem yumi blong stap biliv,”¹ so yumi no nid blong andastanem fulwan blong eksesaesem fet blong save kasem paoa blong Hem.

Hemia i wan naesfala toktok we i givim hop long yumi, taem we bae yumi gat ol tu tingting o ol wari. Taem yumi eksasaesem fet, yumi stap soem long God se nomata we yumi no save ol ansa blong evri kwestin, yumi wantem blong trastem Hem mo ol promes blong Hem.

So, “Fet i blong agri oltaem—mo bifo long hemia—long wanem kaen kondisen we God i save nidim long tugeta, naoia mo fiuja we i stap kam.”²

I tru se Fet i wan gudfala poen blong stat long hem long rod blong yumi—hem i fas prinsipol blong gospel—mo fet i no blong gat wan stret save long ol samting, be blong hop from ol samting we yufala i no luk; be tu i mas tru, sapos no hem i no fet.³

“Fet i fandesen ia we long hem, wan fasin olsem hemia blong Kraes bae i stanap. Hemia samting we i mas gat fastaem long evri narafala fasin.”⁴

I gat tri kaen fet:

1. “Fasfala, fet i fom tru long ol eksperiens blong pas folem wanem oli save we i givim wan fandesen blong bilif.”

2. “Fasin blong sevem fet, plante taem i save eksasaesem i go fored from eksperiens long fiuja—wanem we oli no save i givim wan janis blong kasem ol merikel.”

3. “Blong kasem stret fet—fet we i stap muvum hil, fet olsem blong brata blong Jared, i stap lid i go long merikel mo save.”⁵

Wanem kaen fet we yumi eksperiensem, hem i impoten blong tekem not se blong stap givim smol hadwok nomo, i no save bildimap o krietem fet. Taem yumi givim moa hadwok o mekem ol wok blong yumi i kam antap, yumi gat paoa blong eksasaesem mo eksperiensem bigfala fet.

Evri hadwok i gat valiu. Pita i eksasaesem fet taem hem i stap wokbaot long wota. Sam long yumi bae oli save talem se fet blong hem i no stap blong longfala taem o i no bin strong tumas from hem i stat blong draon mo Sevya i nidim blong sevem hem, be hamas we mi save i we, i nogat wan olsem Sevya, hem wan nomo we i wokbaot long wota. Tangkyu Pita blong eksasaesem fet mo stap soem long mifala se mifala i save mekem merikel taem mifala i no ting se bae i save happen olsem.

“Fet i paoa we i we i givim paoa long ol samting we yumi no ting se oli gat paoa, blong mekem ol samting we i no posibol.”⁶

“I tekem fet blong save go mo givim seves long wan misin long taem blong wol sik ia”.⁷

Mi bin kasem wan kopi blong imel we i kam long Elda L. Taleni we naoia i stap givim seves long Hamilton Niu Silan Misin. Yangfala man ia i wan gudfala man bifo hem i aot blong go long misin, be naoia, hem i kam wan gudfala man moa from fet blong hem long Lod Jisas Kraes. Wetem raet we hem i givim long mi, mi serem wetem yufala samfala pat blong imel blong hem.

“Taem blong mi long Niu Silan Hamilton Misin i bin wan naesfala eksperiens. Mi bin luk han blong Lod oltaem mo oltaem bakegen mo mi save testifae we i tru se God i stap long evri samting . . .’ Man we tingting blong hem i hafhaf olsem, we oltaem hem i stap tingbaot blong go long tu rod’ (Jemes 1:8). Yumi no save gat pis sapos yumi bilif long wan samting mo fasin blong yumi i no semmak o yumi laef long wan defren laef long pablik be i no olsem we yumi stap long praevet. Mi save tru long eksperiens mo atoriti long ol skripja se, hemia i wan kwik wei blong filim taet, fraet, wari, harem nogud, gilti, sem, lusum hop mo lusum testemoni. Blong laef long tu tingting olsem man we i gat fasin blong tu fes, hemia nao i olsem wanem yumi no stap strong long ol wei blong yumi.

“Mi invaetem yu blong faenem tru pis insaed long yu, tru long hadwok we i kam moa antap blong mekem ol pablik mo praevet laef blong yu i go stret wetem ol tijing mo ol doktrin blong gospel blong Jisas Kraes we i bin kambak. Hemia bae mi lukluk nomo long hem from mi save se mi bin gat tu tingting long plante wei, mo hemia i bin letem enemi, blong i prapa spolem pis blong mi mo mekem sol blong mi i harem nogud. Be wetem Nifae yumi save krae ‘Wekap, sol blong mi! Nomo stap harem nogud long sin. Stap hapi, O hat blong mi, mo nomo givim ples long enemi blong sol blong mi.’ Mi invaetem yufala tu blong stadi mo tingting hevi long 2 Nifae 4:26–28 we hem i wan long ol fevret sentens blong mi long skripja.

I tekem fet blong Elda L. Taleni mo yumi blong jenis.

Taem yumi eksasaesem klin fet we i no hafhaf⁸ mo gat ae blong fet⁹, bae yumi tekem aksen folem smol voes blong Spirit iven sapos yumi no gat wan pruf we yumi save luk o tajem.

Letem yumi mekem olsem we Lod i talem, mo “Stap kwaet mo save se, mi, mi God”¹⁰ mo eksasaesem fet. “Bilif long Hem bae I Muvumaot Ol Bigfala Hil”.¹¹

“Yumi evriwan i gat ol bigfala hil blong klaem, ol bigfala hil blong winim mo ol bigfala hil we i had blong go ova be, tru long fet blong yu long Jisas Kraes, bae i mekem yu gat paoa blong muvum ol hil long laef blong yu, iven spos ol jalenj blong yuwan oli bigbigwan olsem Hil ia Everest. Fet blong yu we I stap gro long hem bae I muvum ol hil, I no hil blong ol ston we I mekem wol I naes be ol hil blong ol harem nogud long laef blong yu. Fet blong yu we I kam antap bae I helpem yu tanem ol jalenj bIong yu I gro long difren wei mo Janis.”¹²

Oli bin askem Presiden Nelson abaot wanem hem i stap tingting long hem long taem blong sakramen. Hem i talem tu toktok nomo: “Hem Nomo”.

Wea ples fet blong yu i stap long hem, mi promes se sapos yumi putumaot ol samting we oli stap pulumaot tingting blong yumi long wol ia mo lukluk nomo long Jisas Kraes mo stap developem ol fasin blong Hem, fet blong yumi bae i kam moa strong, ol tu tingting blong yumi bae i stap lus, paoa blong yumi blong laef wetem bigfala tras mo hop bae i kam antap mo bae yumi kasem blesing blong ol 3 “P’s”: bigfala PAOA, bigfala PIS mo bigfala PROSPERITI.