O Se Talatuu o le Faatuatua

O lo’u tamamatua, o Fa’alogo Tovia Fa’alogo, sa liliu mai i le Ekalesia. Na vave ona ia aoaoina a o laitiiti e uiga i le Atua ma Iesu Keriso a o avea o ia ma se tasi o le Ekalesia Faapotopotoga Kerisiano. Na maliu o ia i le 1960, i le 84 o tausaga, ae ou te le’i fanau mai. Na ou a’oa’o e uiga i lo’u tamamatua mai lo’u tama lea na tausia o ia, faatasi ai ma le fesoasoani a ona tei ma aiga, seia oo ina maliu o ia.

Na a’oa’o tamamatua, e uiga i le talalelei toefuataiina a Iesu Keriso mai ni faifeautalai se toalua. I lana sailiga mo le mea moni, na ia iloa moni ai lava o Le Ekalesia a Iesu Keriso o le Au Paia o Aso e Gata Ai o le malo lea o le Atua i le lalolagi ma o Iosefa Samita o le tali faaaliga a le Alii, le meafaigaluega lea na ala mai ai le toefuataiina o le talalelei. Na ia talitonu i lenei mea ma lona loto atoa. Na iu ina faauuina tamamatua i le Perisitua Mekisateko i le tofi o le toeaina.

I le 1959, na fa’ameaalofa ai e tamamatua i le Ekalesia, e ala i le pulefaamau, se vaega o le fanua o le aiga o Faalogo (matai taua) o le matai i le nuu o Paia, Savai’i. O le (pulefaamau) na faasalalau e pei ona manaomia e le tulafono a Samoa i le nusipepa, e ta’ua o le ‘Savali,’ ia Setema 1959. Na iu ina faamaonia le pulefaamau ma lesitalaina e le Faamasinoga o Fanua ma Suafa o Samoa.

O se vaega o le pulefaamau na faasalalauina o le . . . “o lenei fasi fanua ua faapa’iaina mo mea tau lotu ma ua faaavanoa se eria e avea o se auala mo le faaaogaina e le aulotu o Le Ekalesia a Iesu Keriso o le Au Paia o Aso e Gata Ai, e mafai ona latou faaaogaina i aso uma e pei ona manaomia e lena Ekalesia mo mataupu taulotu.” Talu mai lena taimi, ua faaaogaina e le Ekalesia lena fanua mo mataupu tau lotu. Ua i ai nei se uarota o tapuai ai iina, e faaaogaina le falelotu, eria mo le aoaoina, se fale faafiafia ma le malae taalo.

Ou te talitonu na silafia e tamamatua le mea na talitonu ai Le Ekalesia a Iesu Keriso o le Au Paia o Aso e Gata Ai ma na faaopoopo atili ai ia te ia le taua maoa’e o mea na ia iloaina e uiga i le Atua le Tama e Faavavau ma Lona Alo Pele e Toatasi, o Iesu Keriso. O lona manao, e pei ona ou aoaoina mulimuli ane, sa le gata e faafiafia ma faaalia atu lona alofa mo le Atua ae faapea foi ina ia faamanuiaina ai lona aiga, nuu ma le alalafaga, e faapea foi i latou o le a omai e nonofo ai iina. Na ia alofa i le Atua, na ia alofa i le Ekalesia, na ia alofa i lona aiga, ma na ia alofa i lona nuu ma le atunuu. Na ia tuuina atu se mea lelei mo se mea e silisili atu le lelei. Na ia soifua i mea na ia talitonu i ai.

I le taimi o le pulefaamau, sa na o le tolu tupulaga o lona aiga i le Ekalesia, o lenei ua ono; o le toatele o i latou o loo aumau i atunuu mamao faatasi ma o latou aiga toatele, o loo auauna atu i le Alii i le tele o auala eseese. O loo latou faaauau le talatuu na ia tuua: o le uunaia o lo latou aiga ia tausia tulafono silisili e lua: alofa atu i le Alii lou Atua ma lou loto atoa, . . . ma . . . alofa atu i le lua te tuaoi, ia pei o oe lava ia te oe (tagai Mataio 22:37, 39).

Mulimuli lava, na ou aoaoina faapea ina ua faia e tamamatua le pulefaamau, ae le’i taitai lava ona moemiti se tasi i se malumalu i Samoa, i lo’u mafaufau sa ia faatinoina moni lava le tulafono o le faapaiaga. O lena tulafono ua tatou oo ina malamalama lelei ai i totonu o la tatou tapuaiga i le malumalu ma i totonu o tusitusiga paia—o le iloaina o le lalolagi ma mea uma o i ai e ā le Atua ia, le Foafoa o le lagi ma le lalolagi. O le toe faafoi atu o sona vaega mo le fausia o Lona malo e foliga mai e le o se taulaga ae o se faaalia o le alofa mo le Atua ma le faaleoina o se agaga faafetai sili atu mo tagata ma le lalolagi o siomia ai i tatou. Ou te iloa na vaai tamamatua i le aao o le Atua o pa’i mai ia te ia ma lona aiga a o soifua pea o ia.

E faamanatu mai e tamamatua ia te a’u le tama o Liae, ina ua ia taumafa i le fua ma mana’o i lona aiga ia faapea foi ona faia, ia tofo i lona suamalie ma ia piimau i le ai uamea. E faavavau lava lo’u agaga faafetai mo le faatuatua o tamamatua i le faatinoina o lona faitalia e filifili ai le mea sa’o ina ua ia faalogo i le savali o le talalelei toefuataiina ma taliaina, ona ia tuu lea i taunuuga e mulimuli mai, e pei o upu o le viiga 149:

Ua matuai faamanuiaina tele le aiga ma le nuu o tamamatua ona o lona faatuatua ma le faalagolago i le Tama Faalelagi ma Iesu Keriso, ma ona o filifiliga amiotonu na ia faia.

Ou te tatalo faapea a o tatou faamanatuina le soifua mai o lo tatou Faaola o Iesu Keriso i lenei vaitau fiafia, ia tatou faamamaluina Lona suafa i mea uma tatou te faia, e pei lava ona faia e o tatou tama na muamua atu, ina ia faamanuiaina ai tupulaga fai a’e ma le lumanai, ina ia latou oo ina iloa o Ia o le Faaola ma le Togiola o le lalolagi . . . ma ina ia mafai e i tatou uma ona ta’uta’u atu o Ia i le lalolagi, ma ina ia mafai ai e Ia ona ta’uta’u atu i tatou i le Tama.