Onimakiniia Beretitentii n te Kooram n Unimwaane ao te Bootaki n Aine

E boni ngae ngke e teimatoa butin te COVID-19, e aki toki rikiraken Ana Ekaretia Iesu Kristo ibukiia Aika Itiaki ni Boong aika Kaitira. Ibukina bwa e tangiriira te Atua, E kairiira rinanon ana burabeti ae maiu, Beretitenti Russell M. Nelson.

A aki kona ni bitaki taian reirei ma koaua n te euangkerio ma iai bitaki aika I a tia n noori aika a uoti nakoira kakabwaia i nanon te Ekaretia ao te mweenga. Teuana te bitaki ae boou bwa beretitentii n te kooram n unimwaane ao te Bootaki n Aine a riai ni kamarurungia riki nakon te mwakuri ni kamaiu.

Iai te katanoata nakoia mataniwi n taian titeiki ma uoote 6 n Okitobwa 2018 bwa, taabe n aron te mwakuri ni mitinare, barongan rongorongon te utu n te uoote ibukin mwakuriana n te tembora, a katabeaki iai beretitentii n te kooram n unimwaane ao te Bootaki n Aine. A riai beretitentii man botaki aikai n tararuaa man barongaa te waaki n ibuobuoki, ao ni buokiia aomata ake a kainnanoa te ibuobuoki.¹

Aio te bitaki ae tamaroa! I kakaitau ibukin te bitaki aei.

Tera nanon te bitaki ae tamaroa aei? Irou, nanona bwa te beretitentii n te kooram n unimwaane ao te Bootaki n Aine a kona ni kabeebetea uotaia taian bitiobi ni karaoan te mwakuri ni mitinare, barongaan rongorongon te utu n te uoote ibukin mwakuriana n te tembora, ao tararuan kainanoia.

E boni ngae ngke tibwangan te bitiobi bwa e na bairea aron kabonganaan te buoka n te mwane ao kabonganaan te angabwai n aki mamatam i nanon te uoote, a riai beretitenti n te kooram n unimwaane ao te Bootaki n Aine ni mwakuri ma utu ni waakina te angareirei ibukin karekean te toronibwai, ao n reireiniia ikawai aron karekean te mwakuri, te kataumwane, ke tobwaan te kangaanga n te utu.

A riai bitiobi ni kabanea aia tai ni kamarurungia te roronrikirake—bon taan kairiiri n taai aika a na roko—bwa a na teimatoa ni kawain te berita.

A riai kaain te aro ni kabane n ataa te bitaki aei. Ao ngaira kaain te aro, tera ae ti kona ni karaoia?

1. Ti na ibuobuoki ma ara beretitentii n te kooram n unimwaane ao te Bootaki n Aine.

Ti riai ni waaki i nanon te Tangira, n Tibwai reirei ma ni Kaoiia aomata bwa a na roko nakon Kristo. Ti a buokiia ni mwakuri ma mitinare. Ti riai ni kaboua beeban kariaiakara n rin n te tembora, ao ni kakaei araia ara bakatibu bwa ti na uoti nakon te tembora. Ti riai ni karekea te ibuobuoki mai irouia aomata aika taan tia ibuobuoki ibukin te tembora ma rongorongon te utu.

2. Onimakiniia ami beretitentii n te kooram n unimwaane ao te Bootaki n Aine.

Ngkana ti kaitibo ma kangaanga n aron, te aki mwakuri, aki taun te mwane, te itabaraara n te utu, te aki ongeaba irouia natira ke te nakobuaka ma kainnabara, ti riai ni kawariia ara beretitenti n te kooram n unimwaane ke te Bootaki n Aine bwa a aonga ni buokiira. A kona n anganira te iango, te kaetieti, ao te reirei are a karekea mani koroboki aika a tabu, Aeniboki n te Ekaretia, ao man aia tataro ni katoa bong.

E taku ana taeka Titita Jean B. Bingham, te Beretitenti ni kabuta n te Bootaki n Aine: “Ngkoa ti nakon moa te bitiobi, ma ngkai ngaira kaain te aro ti riai moa ni kawaria ara beretitentii n te Bootaki n Aine ao te kooram n unimwaane.”²

3. Botumwaaka karaoa te mwakuri n ibuobuoki.

Ni kaineti ma ana Aeniboki te Ekaretia, te mwakuri n ibuobuoki nanona buokakiia aomata n aron are e karaoia te Tia Kamaiu (tara Mataio 20:26–28). Iai ana tangira, e anga reirei, e tataro ibukiia, e kabeebetei nanoia aomata, ao e kakabwaiaia aomata ake e kaitibo ma ngaai (tara Makuri 10:38). Ngaira taan iriira Iesu Kristo, ti riai ni buokiia natin te Atua.

E tangiria te Uea bwa e na reke te ibuobuoki aei irouia kaain te Ekaretia ni kabane. Aio bukina ae, naake iai irouia te nakoanibonga a mwiokoaki bwa taan ibuobuoki mwaane nakoia kain te mweenga. Taan ibuobuoki aine a katoaaki ma temaana te aine ae a na tabenna. Tibwanga aikai a kakoroa nanon te kantaninga ae kangai bwa a riai n uringaki man tabeakinaki kaain te aro n tatabemaniia (Moronaai 6:4).

Te mwakuri n ibuobuoki bon te mwaneka ae kakaawaki are kakoroa nanon te tua are tangiran te Atua ao kaain rarikira (tara Mataio 22:36–40). Bon teuana naba te kawai ae kakawaki are e na buoka te mwakuri ibukin te kamaiuaki ao te karietataaki.

Beretitentii n te kooram n unimwaane ao te Bootaki n Aine a buokiia mwaane ao aine ake taan ibuobuoki ni kamatataaia ni karaoan te ibuobuoki nakoia tabeman. A anga naba te kawai, te kaetieti, ao te boutoka. A kona ni karaoa aio n tain te intawiu³, n tain te kiraati n te Tabati, ao ni bon te marooro ae onoti.⁴

Tariu ao mwaaneu, ti riai ni botumwaaka ni karaoa te mwakuri n ibuobuoki n aron are karaoia te Tia Kamaiu

4. Onimakiniia taan ibuobuoki aika mwaane ao aine.

E taku te Kaitingaun ni Kabuta ae Unimwaane Paul B. Pieper: “Ti riai ni kakoaua bwa mwaane ao aine aika taan ibuobuoki a weteaki ma ni mwiokoaki iroun te Atua bwa a na buokiira. Ti riai ni kakoaua bwa anne ana moan kawai te Uea n arora baina nakoira. Ti riai ni butimwaea aia ibuobuoki.

“E na kona n rababa aron aia ibuobuoki kanga ai aron ana ibuobuoki te bitiobi nakoia kaain te aro. Tiaki nanona bwa tii te bitiobi ae kona ni kakabwaiaira mani mwaakan te nakoanibonga.”⁵

Ngkana ti uaia ni ibuobuoki i bon i marenara i nanon tibwangara are taan ibuobuoki aika mwaane ao aine, ti kona ni katea abanuean te Atua n ara kaawa.

5. Reitanako te waaki ae boboto n te mweenga, ao n boutokaaki n te Ekaretia

Ngaira aomata n tatabemaniira ao utu, ti riai n teimatoa ni kamatebwaia te euangkerio ae boboto i nanon mwengara. Inanon kamatebwaian koroboki aika a tabu ni mwengara, e na matoatoa ara onimaki ao ara koaua iroun Iesu Kristo.

I kaota au koaua bwa Tamara are i Karawa ao Natina ae Iesu Kristo a tangiriira ma ni kinaira. A kairiira ni bong aikai rinanon ara burabeti ae maiu, Beretitenti Russell M. Nelson. I rangin kakaitau ibukin rianakon ana kairiiri ao maiuna ae tamaroa. Ti riai n onimakinia ao ni boutokaia ara beretitentii n te kooram n unimwaane ao te Bootaki n Aine ao ni kaai ni mwakuri n ibuobuoki ma ngaiia. Ngkana ti karaoa aei, e na tau riki aia tai ara bitiobi ma ana kauntira ni kakorakoraia ara roronrikirake i nanon ana euangkerio Iesu Kristo.

N aran Iesu Kristo, amen.