Ti Anene ma Taian Anera

Bon ingabongin te tabati are waaki iai te maungatabu n te titeiki ae Auckland Papatoetoe n Eberi 2021, e bon tuai rangin mwaiti te aomata, Kaain te uoote ae Massey Park a nako n tekateka i moa bwa a na kamatei riki kunaia. Ai tii tenibwi te miniti i mwain te tai, tibwangara bwa ti na anene n uouo, ni kaoa te Tamnei ae Raoiroi nakon ara maungatabu.

I tataninga au tai are N na katanga te biano. Te tia orotai ae, Moroni Westerlund, e barongaia taan anene ao e katea baina bwa e nang waaki te anene . . . e roko te bwarannano irou. E a mwaiti ara tai ni kamate anene, ma, e tuai man roko raoi anaakin te kuna aei iroura nakon are ti kantaningaia.

I nanon au tai ni biano, I kona n ongo taian bwanaa aika borata. Iai tabeua mwakoron kunara ae rang uarereke iai te bwanaa, ao I taku n au iango, N na tataro: “Tamau are i Karawa . . . ti a tia ni mwakuri korakora.”

Ngke ai kabanean orean kunara i mwain te tai, I tabe n iangoa aron ara kamate anene. Bon ara bitiobi are e rangin kukurei ngke e butimwaea tibwangara bwa ti na anene, ao e korakora ana onimaki irouia kaain ana uoote. Neiere tabena barongaan te anene, Benjy Maugatai, e bairea te tia orotai ao te tia katang biano, ao e bairei kunara ao ai ara tai ni kamate anene. Ti rinei kuuna aika a tamaroa ma ni bebete, ibukina bwa ti ataia ae e karako aomata n ara uoote ae a rabakau n nooti, ao e mwaiti irouia ara koraki ae ai tibwa aia moan tai aei n anene n te kuaea.

Ma a kakaonimaki n te kamate anene. E boni ngae ngke iai riki tabeia, e rikirake ni mwaiti ara koraki n anene, n te aro are e a moanna n aki reke nneia . . . e bati ara tai ni kamate anene.

Ti a bon ataia naba man ara moan rei bwa e na aki rang tamaroa bwanaara, ma e taku te Tari Westerlund bwa, te bwai ae kakaawaki bwa a kukurei taan anene ao a kabanea aia kona, ‘Ti a bon kaneneiia,” e taku.

Ti a karaoa ara kabanea ni kamate anene, ao I tabe n taraa te Tari Westerlund. E moangare ngke e taetae nakoia taan anene.

“Ti aki anenei kuuna aikai bwa kanga te kamataku,” e taku, “ma ti anene bwa ti na kaota ara koaua. Ngkana ko anene, uringnga bwa iai te aomata ae roko bwa e kainnanoa ami onimaki ao korakoran te Tamnei ae Raoiroi are iroumi. Anne raoi tibwangara n te bong aei.”

E aki maan ao e a onrake te umwantabu, mai mooa ni karokoa buuki. Ngke a bane n tekateka raoi ara mataniwi, e teirake te Tari Westerlund ao n anga te kanikina bwa a na teirake kaain te kuaea.

I a waaki ni katanga te biano ibukin ara anene, ao ngke a moana aia anene kaain ara kuaea, I bon rang miimi. E rokoraoi te bwanaa, e matoa, ao e tangiraoi! I euta atuu ma matau ni miimi. “Antai ae e anene?”

Eng, bon kaain ara uoote ake a rang kakaonimaki ma ni kakateke, n ai aron ootan taai are e kona n noraki ma ni keetenin te umwantabu, I kona n noriia aomata aika aki kona n noraki, bon taan anene aika mwaatai ake a raona te kuaea n anene. Boni moan te tangiraoi moan kunara. Ai arona naba ma kunara te kauoua ao te kateniua, e korakora naba te Tamnei ae Raoiroi are e namakinaki irouia aomata ake a roko.

Bon tiaki tii ngai ae I nora te kakai aei. Desmond Maugatai—te tia anene ao bwanaana te tena—e taku nakoiu, “I kakoaua bwa . . . ngke ti moana ara anene, I ongo uoua bwanaa aika a boou, teuana i angamaingiu, ao teuana i angataiu, I aki kinaia naakai bwa tiaki kaain ara kuaea.”

Kayla Tagavaitau ae tebwi ma uoua ana ririki e taekina naba te aeka n rongorongo aei nakon tinana. Bon ana moan tai n riki bwa kaain te kuaea, aio ana taeka i mwin te maungatabu, “tinau. . .ngke ti anene ao I namakinna bwa, ti anene ma taian anera.”

E bati taian kuaea aika I a tia ni kaaini i nanon maiu, ma aio teuana te bwai ae I aki toki n nonoria. Bwa ngkana ti kabanea ara kona ni kamatea een te kuna, ngkana ti kakaonimaki nakon te kamate anene, ngkana ti aki bwara n nano, e boni ngae ngke iai kabwakara ma ara kangaanga, ngkana ti “mwakuri ma te botumwaaka . . .” e na bon iai mamaarara ma, “i mwin bwaai ni kabane ake ti kona ni karaoi,” (2 Nibwaai 25:23), E na buokiira Tamara are i Karawa, “ao n ana akoi [ti] na kakororaoaki i nanon Kristo” (Moronaai 10:32).

E kona naba ni kanakoia Ana anera bwa a na raoniira n anene.