Ti kairaki iroun te Atua

N te tai aei, e taraaki maiun Fetauai Unasa Tautiaga Tuifalefa Tiatia bwa te banna ae tamaroa ni kaotan te tokanikai.

E a tia n riki bwa te tia reirei i nanon te maan ae raka i aon 27 te ririki, imwin reken ana beba ae te diploma man te Kuura n Tia Reirei i Tamoa, ao e reitanako ana reirei ni karekea ana beba ae te degree. I nanon te ririki 2000 tabun, E reke ana beba ae te postgraduate degree man te Kuura ni Minita ae kinaaki ae Malua, ike e a kinaaki bwa te minita ngaia n teuana te aro ae rang kinaaki i aon Tamoa.

I nanon te tai, e kaitibo ma te teinnaine ae botonaine ae Lili Laufiso, ao a karikia natiia aika—3 aine ao temanna te mwaane. Ngke e a roko te tai are a nang kakaea aia kauarinan natiia, ao ibukina bwa Fetauai bon te aomata ae bubura ana reirei, a karaua n tirobaei reirei.

“Ti motikia bwa ti na kareireia natira aine i Vaiola,” e taku Fetauai, aio bon te kauarinan i Savaii, Samoa, are e kabutaki ma ni bwaibwai iai Ana Ekaretia Iesu Kristo ibukiia Aika Itiaki ni Boong aika Kaitira. E kamiimi te babaire aei bwa are bon te minita ngaia n te aro ae kaokoro, ma e anaaki nanona ni maiu aika raraoi n te reirei ae te Vaiola ao te ekaretia ae boboto aroaro aikai ma iai.

N te tai aei ao e tuai Ataia Fetauai ae, te babaire aei e na uota te bitaki ae korakora nakon maiuna.

A waaki natina aine ni kamatebwaia aron te ekaretia. A kaei aia kiraati (taeka n te aro) tenaan Tiemenari, ao n tain aia kainutu, a tibwauai baike a reiakin n ana euangkerio Iesu Kristo ae kaokaki.

Fetauai ao kainnabana a rang tatangiriia mitinare ake a rereirei ma natiia aine. Mitinare n aine aika Titita Niutua ao Titita Laulu a anga te reirei i aon Ana Babaire ni Kamaiu Tamara are i Karawa, ao i nanon Eberi 2010, a bwabetitoaki natin Fetauai ake aine. E uringnga raoi Fetauai bwa n aia kabanea n tataro mitinare n aine aikai, a kaota nanoia ae abwabwaaki n tangiriia kaain te utu aei bwa a na bane ni kaaina te Ekaretia.

E uringa naba teuana aia kainutu are a anga reirei iai mitinare aika taanga ake bon kaain Utah. Unimwaane ao Titita Krogh a uota teuana te boora ni kabuki, are e niiraki n te uaea ae abwabwaki. Imwin te reirei, kaain te utu aei a kataia ni kabwaraa ngkanne te uaea ni karokoa are, e a reke ukin te niira aei ao e boo te amarake n te kabuki aei. E taetae unimwaane Krogh: bon tii man kaukan (kabwaraan niiran) nanora nakon te euangkerio are ti na kona iai ni katoong kakabwaia aika a karewe.

Teutana imwin teutana, aekaki ni waaki aikai a karika te kakai ae korakora i nanon teuae Fetauai, ao tabeua te tai imwina, e kaota nanona ni kani kaaina te Ekaretia. “[Kanga] ai aron am namakin ngkana ko mwananga n te raroa ae abwaabwaki ao akea nimam te ran ke . . . te amwarake n te rereua,” e taku.

E waetata n tareboon Fetauai nakon te bitiobi ni bairea ana bwabetito, e aki reke te wiiki i mwin aei, teuae te tia reirei ae rang kinaaki ao bon te minita e a riki bwa kaain Ana Ekaretia Iesu Kristo ibukiia Aika Itiaki ni Boong aika Kaitira.

Bon te rongorongo ae kakuba, riki irouia koraki ake kaain ana aro are e kitanna. “E korakora aia marooro aomata ibukin ara bwabetito . . . ao a miimi. [E a riki] bwa ai kanoan te mamarooro n te kaawa, n te mwaakete ao i aon bao ni mwamwananga n taai akaane!” E ngare Fetauai. Ma e bon rang korakora naba te kabuakaka. “Iai raoraora ake a manga riribair a . . . ni bon ara kaawa, [ao] n ara utu.”

Bon te bitaki ae matoatoa, n taai aikai ao teuae Fetauai e aarana butin te rongorongo aei bwa “te kangaanga ae maunanako” ibukina bwa, e reitia n taku, “ngke e a toki oreakira n te angibuaka ae matoa, ti a nora ootan Kristo, ootana ae akea kabotauana are e kaotaa maiura.”

E bwabetitoaki Fetauai i nanon 2013, ao e kabaeaki ma ana utu ibukin te maiu aei ao te maiu ae akea tokina n te ririki are i mwina. I nanon 2016, e riki bwa te bitiobi, ao i nanon 2017 e weteaki bwa te beretitenti n te titeiki ae Savaii Samoa Papua’s.

Ngkana e bon iangoia, e kangai ana kabwarabwara Beretitenti Tiatia i aon bwaai ake a riki i nanon maiuna i mwain reken ana euangkerio Kristo ae koaua. “I mwin ara kangaanga ake ti kaitarai ao babaire ake ti karaoi, ti . . . tirobaea te moan mwaneka ao ti kangai: ‘Te Atua ae bweena kawain temanna ma temanna.’”