Itulau i le lotoifale
Auala e Fesoasoani ai le Seminare ia te A’u e Faamanuiaina i le Aoga
E pei o se isi lava talavou manatu faaaloalo i Le Ekalesia a Iesu Keriso o le Au Paia o Aso e Gata Ai, sa ou auai i le seminare mo tausaga e fa sosoo lava. O lona uiga la o itula uumi o le aoaoina o le talalelei e faaopoopo atu i le Aso Sa ma itula suesue a le aiga. O nisi taimi o se aafiaga faigata ma tofotofoina.
Sa ou amata i le seminare i le 2017 i le matou Uarota o Pare i le Siteki o Arue Tahiti. Sa ou i ai i le vasega 9 i le aoga i le taimi lea, ma sa ou naunau lava ia ou i ai i le vaega lea o talavou.
I lo’u tausaga muamua, sa ou ala e le’i taina le 5:00 i le taeao i aso uma o le vaiaso ina ia ou taunuu i le seminare i le taimi sa’o. Sa faia a’u faitautusi, ma sa ou faalogo lelei i totonu o le vasega. Sa ou iloaina sa fesoasoani le seminare e faalolotoina le ma sootaga ma le Atua. Ana le seanoa ma Ia, semanu e le mafai ona ou faamanuiaina e pasi la’u Suega mo le Tusi Pasi a le Atunuu i le faaiuga o le Tausaga 9.
I le aluga o tausaga e lua na sosoo ai, sa faasolosolo lava ina ou faapaie i le faia o o’u tiute, sa misi le seminare pe ou te tuai i ai i le tele o taimi. Sa aveesea lo’u naunauta’iga ou te auai i le seminare, o lea sa faaitiitia ai lo’u fia taumafai.
E tusa ai ma lena tulaga, sa faigata lo’u tausaga 10 i le aoga, ae sa ou le iloa i lena taimi le auala na fesootai ai lenei tulaga i lo’u tulaga i le seminare.
I le Tausaga 11, sa amata ona ou tafao ma tagata o la’u vasega o e sa faia mea e le fautuaina e le Ekalesia, e pei o le mea inu malosi ma le tapaa. Sa oo lava ina ou lagonaina sina maasiasi i le lē mafai ona ou pei o na uo ma lē tele se taimi e tafafao ai ma i latou.
O le taunuuga, sa maualalalo o’u togi o le tausaga ma ana faapea e tatau ona ou su’e i le suega o le Bachelor i lena tausaga, ou te lē talitonu lava ou te pasi.
Ona, suia lea e le faama’i o le Koviti o o tatou olaga o aso uma, lea ou te faafetai ai i le Atua. Ina ua amata vasega seminare i luga o telefoni feaveai, sa peiseai e mo le teena o le leaga o loo sasao ai i luga iina.
E ui lava la sa i ai pea taimi ou te vaivai ai, ae sa ou filifili ou te tumau ai iina ma taumafai e mulimuli faamaoni i lesona o le seminare, ou te manuia ai mai le fesoasoani a le Atua i a’u suesuega.
O la’u taula faaola
Ou te faafetai mo o’u matua. Ana leai i la’ua semanu e tuu le seminare ae ou mulimuli i le ala lava e tasi o i ai a’u uo le lolotu. Ae i le avea ma o’u faiaoga seminare sili ona ou fiafia i ai, sa laua vaavaaia a’u ma faamautinoa o loo ou tumau pea i le ma sootaga ma le Atua.
Ona, avea lea o a’u sootaga faaleagafesootai manuia ma le autalavou o le uarota ma o’u laina ola. O a matou gaoioiga fai faatasi sa faafoua a’u i taimi uma sa ou lē fiafia ai. Faatasi ai ma uo ia sa i ai Corall Sommers, o sē na lē faamasino atu ae sa faalogo ma faamalosi’au i taimi uma ma tausia a’u e ala i ana faataitaiga.
I a latou lava auala, sa latou taitoatasi ona sao i lo’u paleni faaletagata lava ia.
O taumafaiga e maua ai taui i taimi uma
O le amio pulea e punouai i aso taitasi e suesue tusitusiga paia sa faamanuiaina i lo’u tausaga mulimuli o le seminare, o lo’u tausaga sefululua ma o lo’u tausaga faaiu foi i le aoga.
O a’u masani e suesue i le seminare na mafai ai ona sili atu lou maopoopo. E ui e le o a’u o se tagata e fiafia e faitau, ae sa ou taumafai lava e faitau i aso taitasi. Sa mafai ai ona ou faatumauina le ma sootaga—e ui lava e maaleale—faatasi ma le Tama Faalelagi.
I le tausaga lena, sa pasi ai lo’u tipiloma amata (bachelor diploma) ma le faamamaluina (honors). Sa maua ai lo’u laisene avetaavale i la’u taumafaiga muamua lava. Sa ou maua lo’u valaauga ou te faamisiona i Pale. O le taunuuga atoa, sa i ai le aao o le Atua i lo’u olaga i le taimi atoa sa ou i ai i le seminare ma le aoga.
O le seminare o le mea tonu lava lea tatou te manaomia i le avea ai o ni tagata talavou e fesoasoani ia i tatou e faatuatuaina le Atua ma tuu o Ia e manumalo i o tatou olaga Sa ia faatuatuaina a’u i taimi uma.