Ua Faia e Talavou Auaunaga i le Fanuatanu i Brisbane

I le taunuu ai o tagata talavou e 180, 14–17 tausaga le matutua, faatasi ma ni loli tutumu i mea faigaluega, sa vaevae i ni vaega e sala ma tatipi lala, faamamā maa o tuugamau, kilia auala, ma tapu’e ata o maa o tuugamau mo le punavai o faamatalaga i fanuatanu a PilionaTuugamau (BillionGraves).

O le poloketi o se taualumaga faapitoa mo le Konafesi o le Autalavou a le Siteki o Senitenari o Le Ekalesia a Iesu Keriso o le Au Paia o Aso e Gata Ai. O se siteki o se vaega e tuufaatasia ai ni aulotu.

Sa lesitala tagata talavou mo lenei poloketi i luga o le uepisaite o le JustServe o se faatulagaga mo auaunaga lea e faafesootaia volenitia ma poloketi mai faalapotopotoga a nuu o le lotoifale o loo manaomia le auaunaga, i le tulaga lea, o le Fanuatanu a Uo a Brisbane i Saute.

O Mele Manu, o se volenitia talavou, sa faapea mai, “O matou o le vaega pito sili ona telē ua oo atu ia i latou, ma na faapea mai i latou o le aofai o le galuega sa matou faia i le na o le tasi ma le afa itula e tutusa ma galuega sa mafai ona latou faia i le tausaga atoa!”

Sa ia toe faapea mai, “Sa matua mālie lava ma maoa’e le lagona i le iloa ai o matou o se vaega o lenei galuega tele i itu e lua o le veli.”

O Tracey Olivieri, o lē na faavaeina ma o le peresitene o le Fanuatanu a Uo o Brisbane i Saute, na saunoa mai, “Ua matuā lofituina lava i matou i le galuega ma le alofa mai o tatou fesoasoani faapitoa i le asō o le fai atu faafetai e foliga e lē lava.”

Sa faaauau ona faapea mai, “O le tele o tuugamau i le Fanuatanu o Brisbane i Saute ua le toe i ai ni aiga e tausia i latou; o nisi laina o aiga e faanoanoa ai ua mou atu. O se tasi lea o mafuaaga matou te faamamāina ai i latou. O tuaa uma lava ua mavae atu e tatau ona manatuaina.”