Itulau i le lotoifale
O Talavou Volenitia mai Kuiniselani ua Faamāmāina Galuega o le Fesoasoani Atu i Isi
E 1000 moli soula feaveai ua saunia e auina atu i nuu o loo matitiva i le malosi faaeletise.
O talavou o Le Ekalesia a Iesu Keriso o le Au Paia o Aso e Gata Ai ma a latou uo Musolemi i Kuiniselani o loo fesoasoani i se auaunaga alofa i Ausetalia e aumaia moli i totonu o nuu i Vanuatu ia o loo aafia i le matitiva i le malosi faaeletise.
Ia Oketopa ua te’a, e 186 volenitia o talavou matutua nofofua, e aofia ai ma uo mai i le nuu o Musolemi Ahmadiyyah, o tagata o le Ekalesia ma uo, sa faapotopoto e tuufaatasia moli soula e 1000.
Sa tusia foi e le aufaigaluega ni savali faafeiloai o le faamalosiau i luga o pepa o faatonuga lea sa ave faatasi ma moli.
Sa tusia e se tasi volenitia faapea, “E le gata o loo tatou fausia moli, ae o loo tatou tusia se tusi e ave faatasi ma moli, ma e avea ai ma se mea patino i le tagata, ma e ese le manaia o le faalogona o le fesoasoani atu i isi.”
Sa faapea mai Pili Mefi, o le sui o le UoSoula (SolarBuddy) faapea, “O nei moli o le a faaaogaina mo tamaiti e su’esu’e ai i le po ma femalagaa’i solo ai ma le saogalemu i o latou nuu ma e faamoemoe o le a maua ai e i latou se avanoa lelei tele a o latou agai i luma.”
O Carl Maurer, o le pule o le Ola Tutoatasi ma o le Fitugafulu Eria (taitai risone) mo le Ekalesia iina, sa faapea mai, “Ou te vaai atu i lenei mea o se avanoa e faamāmā avega ai i mafatiaga, e faateleina ai le agavaa mo a’oa’oga e avea ma tala’aga i le aiga o se tasi, e ofo atu ai avanoa lelei atu mo le soifua maloloina, lea e mafai ai ona faateleina lo latou faalagolago ia i latou lava.”
E lesitala volenitia i luga o le JustServe, o se faatulagaga mo auaunaga fua i nuu mo le atiina’eina o le lotogatasi e ala i auaunaga i le nuu, lea o loo faatulaga ai le poloketi o auaunaga.
Sa faatau mai moli o se poloketi o galuega fesoasoani alofa, e le Auaunaga Alofa a le Au Paia o Aso e Gata Ai, o le vaega o auaunaga a le Ekalesia, mai le SolarBuddy, o se auaunaga alofa Ausetalia faatasi ai ma le sini e faamutaina le mativa i malosi faaeletise mo tamaiti uma.
Ina ua mae’a le tuufaatasia o moli, lea e na o le lima minute i le moli e tasi, sa faaauau pea ona faatasitasi ia talavou matutua ma faia taaloga, gaoioiga, atoa ai ma meaai.
Sa faapea mai Carl Maurer, “Ou te faamoemoe o le a avea lenei ma avanoa taua mo aiga ma tagata taito’atasi e le gata i le vaai atu ai i le malamalama mai le moli, ae ia vaai atu i le malamalama i o latou olaga, o Iesu Keriso.”