Pe’e i te peropheta
E matara te mau ’ūputa pae vārua : Te mau parau poro’i nō ni’a i te hiero nā te peresideni Nelson
E ha’api’i mai ’outou nāhea ’ia fa’ata’a i te pāruru i rotopū i te ra’i ’e te fenua, nāhea ’ia ani i te mau melahi a te Atua ’ia tauturu ia ’outou ’e nāhea ’ia fāri’i maita’i atu ā i te arata’ira’a o te ra’i.
« E hi’o mai na tātou i teienei i te parau o te mau hiero », tā tō tātou peropheta ’e peresideni Russell M. Nelson i fa’ahiti i roto i te ’āmuira’a rahi nō ’Ātopa 2018 ra.
I roto i tāna a’ora’a mo’a nō ni’a i te huru e ti’a ia tātou ’ia riro mai ’ei feiā mo’a hi’ora’a maita’i nō te mau mahana hope’a nei, ’ua fa’aitoito mai nei ’oia ia tātou ’ia taui i tō tātou ’utuāfare ’ei pū ha’api’ipi’ira’a ’evanelia ’e ’ua fa’aha’amana’o mai ’oia ia tātou i te faufa’a rahi ’ia fa’a’ohipa i te i’oa ti’a o te ’Ēkālesia a tō tātou Fa’aora : Te ’Ēkālesia a Iesu Mesia i te Feiā Mo’a i te mau Mahana Hope’a Nei.
I muri iho, ’ua pi’i ’oia ma te marū i te ’āmuira’a o te ao nei ’ia fa’ariro i te hiero ’ei ’ohipa mātāmua.
’Ua parau ’oia, « ’Ua ’ite tātou ē, e mea faufa’a roa tō tātou taime i te hiero nō tō tātou ora mure ’ore ’e tō tātou fa’ateiteira’a ’e nō tō tātou ’utuāfare ».
« I muri iho i tō tātou fāri’ira’a i tō tātou iho mau ’ōro’a o te hiero ’e te ravera’a i te mau fafaura’a mo’a ’e te Atua, e hina’aro tātou tāta’itahi i te ha’apa’arira’a pae vārua ’e te ha’api’ipi’ira’a tāmau ’o tē noa’a mai i roto ana’e i te fare o te Fatu. ’E ’ua hina’aro tō tātou mau tupuna ’ia riro mai tātou ’ei mono.
« ’A feruri na i te aroha rahi ’e te parau ti’a o te Atua tei hōro’a mai, hou te fa’atumura’ahia te ao nei, i te hō’ē rāve’a nō te hōro’a i te mau ha’amaita’ira’a o te hiero i te feiā tei pohe ma te ’ite ’ore i te ’evanelia. E mau ’ōro’a mo’a tahito teie o te hiero. Nō’u nei, e mea ’ana’anatae roa teie ’ohipa tahito ’e te tahi atu ha’apāpūra’a ē e parau mau te reira.
« E au mau taea’e ’e mau tuahine here e, tē ’ū’ana ’e te rau noa atu ra te mau ’arora’a a te ’enemi. ’Aita ā tō tātou hina’aro ’ia haere tāmau noa i te hiero i rahi a’enei. Tē tāparu nei au ia ’outou ’ia hi’opo’a nā roto i te pure i te huru nō tō ’outou hōro’ara’a i tō ’outou taime. ’A fa’ata’a i te taime nō tō ’outou orara’a nō a muri a’e ’e nō tō ’outou ’utuāfare. Mai te mea e, e rāve’a tano tā ’outou nō te haere i te hiero, tē a’o atu nei au ia ’outou ’ia ’imi i te hō’ē rāve’a nō te fa’atupu i te mau fārereira’a tāmau i te Fatu, ’ia pārahi i roto i tōna fare mo’a, ’e i muri iho, ’ia ha’apa’o i te reira fārereira’a ma te pāpū ’e te ’oa’oa. Tē fafau atu nei au ia ’outou ē e hōpoi mai te Fatu i te mau semeio tāna i ’ite ē, e hina’aro ’outou, ’a rave ai ’outou i te mau fa’atūsiara’a nō te tāvini ’e nō te ha’amori i roto i tōna mau hiero. »1
I roto i te tahi atu a’ora’a fa’auruhia, ’ua parau te peresideni Nelson ē, « ’Ia tupu ana’e te hō’ē ’ārepurepura’a i roto i tō ’outou orara’a, te vāhi maita’i roa a’e nō te ha’apa’o i te pae vārua, ’o te orara’a ïa ’ia au i tā ’outou mau fafaura’a nō te hiero. »2
’Ua ha’amata ’oia i tāna a’ora’a nā roto i te fa’ata’ara’a i te ’ohipa patura’a ’aravihi i tītauhia nō te ha’apa’ari i te hiero tahito nō Roto Miti—i roto i te mileniuma—i mua i te mau pūai o te nātura. I muri iho, ’ua fa’ata’a mai ’oia ē, e mea faufa’a roa nō tātou ’ia ha’apa’ari i tō tātou iho mau niu pae vārua, nō te mea, i teie nei, hau atu i nā mua a’e nei, tē ha’amata’uhia nei tō tātou fa’aorara’a mure ’ore e te mau vero o te orara’a nei.
« E au mau taea’e ’e mau tuahine here, e mau mahana hope’a teie. Mai te mea e hina’aro tātou e upo’oti’a i ni’a i te mau ’ati ’e te mau fa’ahepora’a e tae mai, e mea faufa’a roa ïa ’ia roa’a ia tātou tāta’itahi te hō’ē niu vārua pa’ari tei patuhia i ni’a i te papa o tō tātou Tāra’ehara, ’o Iesu Mesia » (hi’o Helamana 5:12).
« Nō reira, tē ani atu nei au ia ’outou tāta’itahi, mai tei hea te pa’ari tō ’outou niu ? ’E e aha te mau ha’apa’arira’a e tītauhia nō tō ’outou ’itera’a pāpū ’e tō ’outou hāro’aro’ara’a i te ’evanelia ?
« Tei rōpū te hiero i te ha’apa’arira’a i tō tātou fa’aro’o ’e tō tātou pūai pae vārua nō te mea, ’o te Fa’aora ’e tāna ha’api’ira’a tumu te māfatu iho o te hiero. E fa’arahi te mau mea ato’a i ha’api’ihia i roto i te hiero, nā roto i te ha’api’ira’a ’e te Vārua, i tō tātou hāro’aro’ara’a nō ni’a ia Iesu Mesia. E tā’amu tāna mau ’ōro’a faufa’a roa ia tātou iāna nā roto i te mau fafaura’a mo’a o te autahu’ara’a. I muri iho, ’a ha’apa’o ai tātou i tā tātou mau fafaura’a, ’e fa’a’ahu ’oia ia tātou i tōna mana fa’aora ’e te ha’apa’arira’a (hi’o Te Ha’api’ira’a Tumu ’e te mau Fafaura’a 109:15, 22). ’E ’oia mau, e hina’aro tātou i tōna pūai i roto i te mau mahana e haere mai nei.
« ’Ua fafauhia mai ia tātou ē ’ua ineine tātou ra, e ’ore ïa tātou e mata’u’ (Te Ha’api’ira’a Tumu ’e te mau Fafaura’a 38:30 ; hi’o Te Ha’api’ira’a Tumu ’e te mau Fafaura’a 10:55). E aura’a hōhonu tō teie ha’apāpūra’a i teie mahana. ’Ua parau te Fatu e, noa atu te mau tāmatara’a rahi o teie ’anotau, te feiā ’o tē patu i tō rātou niu i ni’a ia Iesu Mesia ’e ’o tei ha’api’i i te fa’a’ohipa i roto i tōna mana, e’ita ïa rātou e topa i roto i te mau ha’ape’ape’ara’a ta’a ’ē o teie ’anotau. »3
Tē parau fa’ahou ra te peresideni Nelson e, « Ia ’outou tāta’itahi ’o tei rave i te mau fafaura’a i roto i te hiero, tē tāparu nei au ia ’outou ’ia ’imi, nā roto i te pure ’e te tu’utu’u ’ore, ’ia māramarama i te mau fafaura’a ’e te mau ’ōro’a o te hiero. E matara te mau ’ūputa pae vārua. E ha’api’i mai ’outou e nāhea ’ia fa’ata’a ’ē i te pāruru i rotopū i te ra’i ’e te fenua, nāhea ’ia ani i te mau mēlahi a te Atua ’ia tauturu mai ia ’outou, ’e nāhea ’ia fāri’i maita’i a’e i te arata’ira’a a te ra’i. E ha’apūai ’e e ha’apa’ari tā ’outou mau tauto’ora’a tu’utu’u-’ore nō te rave i te reira i tō ’outou niu pae vārua…
« E ti’aturi mai ’outou ’ia parau atu vau ē mai te mea e patu pa’ari-hia tō ’outou niu i ni’a ia Iesu Mesia, e’ita ’outou e mata’u. Mai te mea e ha’apa’o maita’i ’outou i tā ’outou mau fafaura’a i fafau i roto i te hiero, e ha’apūaihia ’outou e tōna mana. Muri iho, ’ia tupu ana’e mai te mau ’āueuera’a fenua pae vārua, e nehenehe ’outou e fa’aea pūai noa nō te mea e mea pa’ari ’e te ’āueue ’ore tō ’outou niu pae vārua. »4
Tē hina’aro nei te peresideni Nelson ’ia ha’amana’o tātou ē, e mea faufa’a roa te mau hiero i roto i tō tātou orara’a ’ei feiā nō te mau mahana hope’a nei nō te mea, i te pae hope’a, e arata’i ’oia ia tātou i tō tātou Fa’aora ra ia Iesu Mesia.
I roto i te hō’ē video e ’ere i te mea maoro e fa’ahanahana ra i te ha’amo’a-fa’ahou-ra’a-hia te hiero nō Washington D.C, ’ua parau tō tātou peropheta :
« ’Ua ha’amaita’i-mau-hia tātou nō te mau hiero. E rahi atu ā tā tātou mau hiero ’a tupu noa atu ai te ’Ēkālesia i te rahi. E ’ere rā te rahira’a, ’e e ’ere ato’a rā te vāhi. E ’ere te hōho’a. ’O te mau ’ōro’a rā i roto.
« ’Ia hi’o ’outou i te hō’ē hiero, e ti’a ia ’outou ’ia hāro’aro’a ē, e tāpa’o te reira nō Iesu Mesia, nō te mea ’o ’oia te arai e te Metua. E mea nā roto noa iāna ’e iāna noa e ti’a ai ia tātou ’ia tāpae i tō tātou Metua i te ao ra.
« E tāpa’o ato’a te reira nō tō tātou fa’aro’o i roto i te orara’a i muri a’e i te pohe. Tē ti’a nei te mau hiero mai te hō’ē ta’ahira’a, te hō’ē ta’ahira’a mo’a e tae atu ai i te ora mure ’ore nō tātou ’e tō tātou ’utuāfare. »5