Te ’oa’oa i roto i te mau hīmene o te māfatu

E iva noa matahiti tō Walnetta Broederlow McCall ’a ani ai te hō’ē misiōnare mai te mea ē, tē vai ra te hō’ē ta’ata ’o te nehenehe e ha’uti i te piāna nō tā rātou ’āmuira’a ’āpī. « ’Ua ’āfa’i au i tō’u rima i ni’a ma te taiā ! » tē ha’amana’o ra ’oia. ’Aita te misiōnare, Charles W. Ashman, i ha’aparuparu nō tōna matahiti ’aore rā tōna ’ite-’ore. ’Ua hōro’a ’oia i te mau hīmene ia Walnetta nō te ha’api’ipi’i, ’e te hepetoma i muriiho, ’ua riro mai ’oia ’ei fa’ata’i piāna nō tā rātou mau ’āmuira’a.

I tō te ’utuāfare o Walnetta fa’aru’era’a ia Fiti nō te haere atu i Devonport i te pae ’apato’erau nō Auckland tau matahiti i muri a’e i te Tama’i Rahi II o te ao nei, ’o tōna metua tāne, Oscar P. Broederlow, te melo hō’ē roa nō te ’Ēkālesia a Iesu Mesia i te Feiā Mo’a i te Mau Mahana Hope’a Nei i taua vāhi ra. Terā rā ’ua rave te mau misiōnare i te ’ohipa ’e ’aita i maoro roa ’ua rahi mai te mau melo fa’afāriu-’āpī-hia nō te fa’atupu i te mau ’āmuira’a i roto i te piha ’ohipara’a i Devonport, fa’atupuhia e te metua vahine o Walnetta, Hilda E. Lobendahn Broederlow.

Te otira’a te pupu Sōtaiete Tauturu i te ha’amauhia i reira, ’ua ’āmui te pupu iti o te mau tuahine i te mau hepetoma ato’a i roto i te fare o te tuahine Norma Roberts. ’Ua hōpoi te māmā o Walnetta iāna nā muri iāna ’ia nehenehe iāna ’ia fa’ata’i i te piāna nō « te mau Māmā hīmene ». « Tē ha’amana’o nei ’oia ē, ’aita ā te Paraimere i oti roa i te ha’amauhia, nō reira, tē hi’o noa ra vau i muri, ma te māere i te mea ē, nō’u nei, ’ua ha’amata te Sōtaiete tauturu nā mua a’e i te Paraimere ! »

’Ua rahi atu ā te ’aravihi o Walnetta i te pae nō te ’upa’upa ’a tāmau noa ai ’oia i te tāvini. ’Ua ’ite mata ’oia i te tupura’a semeio o te ’Ēkālesia i roto i tōna tufa’a fenua, ’e nā roto i te reira, ’ua roa’a iāna te rāve’a nō te fa’ahotu i tōna tārēni. I tōna ’āpīra’a, ’ua riro mai tāna ’āma’a ’ei pāroita 5 nō Auckland, ’e ’ua hāmani tāna fare purera’a ’āpī i te hō’ē ’ōtepa uira. ’Aita ’o Walnetta i ha’uti a’enei i te hō’ē ’ōtepa nā mua a’e. « ’Ua hāro’a mai te ta’ata tāmau i te hō’ē buka iti ’e ’ua hōro’a mai i te hō’ē hi’ora’a vitiviti—’ahuru ma pae minuti te maoro », tāna ïa parau. Teie ana’e te fa’auera’a e ha’uti i te ’ōtepa o ta’na e fāna’o … ’aita rā ’oia i māere. « ’Ua ’ite au ē, e tauturu mai te Fatu iā’u. ’Ua tūtava atura vau i te ha’api’i i te mau mea ato’a e nehenehe iā’u ’e i te fa’a’ohipa, i te ha’api’ipi’i, i te fa’a’ohipa !

Nō te roara’a e 70 matahiti, ’ua ha’amaita’i te pūpūra’a ’o Walnetta nō te ’upa’upa i te mau ta’ata e rave rahi. I tō te peresideni Steve Midgely, peresideni titi tahito nō te titi nō Whangarei, tauto’ora’a i te ’imi i te hō’ē ta’ata fa’ata’i ’ōtepa nō te hō’ē ’āmuira’a titi, ’ua ’oa’oa ’o Walnetta i te pāhonora’a i tāna anira’a. ’E i te mau taime ato’a e peresideni ai te peresideni nō taua tuha’a fenua ra, ’o David Baxter, i te mau purera’a ’ōro’a o te pāroisa nō Takapuna, e tāpe’a noa ’oia i te ’ōtepa i muri a’e i te purera’a nō te ha’amāuruuru ia Walnetta nō te pehe.

« ’Ua pāpū iā’u ē, e paraparau vau nō te mau ta’ata fa’ata’i ’upa’upa ato’a ’ia parau ana’e au ē, e māuruuru tātou ’ia māuruuru ana’e te mau taea’e ’e te mau melo nō te pehe tā tātou e hōro’a nei », tāna ïa parau. « ’Ua ha’uti au i roto i te mau ’āmuira’a pāroita, titi ’e Patifita [’e] ’ua ’ape’e au i te mau pupu hīmene a te ’Ēkālesia, i roto ihoa rā i te mau tata’ura’a hīmene nō te fenua iho ». ’Ua ’oa’oa ’oia i te mea ē, ’ua ti’a iāna ’ia rave i te ’ohipa i piha’i iho i te mau ta’ata hīmene ’e te mau ta’ata ha’uti ’upa’upa ’aravihi i roto i te ’Ēkālesia a rave ai rātou i te ’ohipa fa’ata’i ’upa’upa.

I te roara’a o te mau matahiti, ’ua tāvini ’o Walnetta i roto e rave rahi atu ā mau pi’ira’a ’e ’ua ’oa’oa ato’a ’oia i teie mau ’itera’a. I teie mahana, ’ua ’oa’oa ato’a ’oia nō te hōro’a i te pehe ’ōmuara’a i roto i tāna pāroisa nō Taupo, nō te tītau manihini i te Vārua Maita’i ’e nō te ha’amau i te hō’ē ta’ira’a reo tura nō tā ratou mau purera’a ’ōro’a. Ma te feruri i tōna here i tōna tōro’a, ’ua māuruuru roa ’oia nō te ō tā te taea’e Ashman i hōro’a nā’na i taua mau matahiti i ma’iri ’a ani ai ’oia i te hō’ē ta’ata fa’ata’i piāna tauturu. « ’Ua ha’amaita’i tāna tītaura’a manihini ’ia ha’uti nō tā mātou mau ’āmuira’a ’e [tōna] ti’aturira’a iā’u i tō’u orara’a », tāna ïa parau.

’Ua riro ’oi’oi te pehe ’ei fa’a’itera’a i tōna here nō tō tātou Metua i te ao ra ’e Iesu Mesia, ’e e mea faufa’a roa ato’a te mau hīmene tāna i ha’api’i mai nōna. Te hīmene mātāmua tāna i ha’uti, ’oia ho’i : E te Fatu, ’a hōro’a mai nā ’oe i tā ’oe ha’amaita’ira’a.

« E pure teie ’ia vai noa te Vārua o te Atua i roto ia mātou », tē nā reira ra ’o Walnetta, « ’e i roto i te roara’a o te mau matahiti, ’ua ’itehia teie parau mau i roto i tō’u orara’a ».

E nehenehe ānei tāna e mā’iti i te hō’ē hīmene au-roa-a’e-hia e ana ? I muri a’e i te ferurira’a, te fa’aotira’a a Walnetta, ’aita ïa. « Te mea faufa’a roa a’e nō’u, ’oia ho’i rau noa atu te hīmene tā’u e ha’uti, e māuruuru noa vau ’ia fāri’i i te Vārua mai tā’u i ha’uti i teie hīmene ». Tē parau fa’ahou ra ’oia ē, « ’Ua parau ’o Spencer W. Kimball (1895-1985) i te hō’ē mahana : ‘E nehenehe tā tātou, ’ei ta’ata fa’ata’i ’upa’upa, e ha’aputapū i te vārua o te feiā e fa’aro’o mai.’¹

« Tē ’ite nei au i taua hōpoi’a ra. »