E Mafai E Le Atua Ona Lavea’iina

Mulimuli ane i Lana talanoaga ma le tagata mauoa lea sa manao e iloa le mea e fai e maua ai le ola e faavavau ¹, na fetalai atu ai Iesu i Ona soo, “E faigofie i le kamela ona ui atu i le pu o le au, ae faigata i le mauoa ona sao i le malo o le Atua.

“Ina ua faalogo i ai ona soo, ona latou matua taufaiofo ai lea, ua faapea ane, O ai se tasi e mafai ona faaolaina?

“A ua silasila atu Iesu ia i latou, ma fetalai atu ia te i latou, e le mafaia e tagata; na’o le Atua, aua e mafaia mea uma e le Atua.”²

O le fesili sa tuuina atu e le alii mauoa sa talafeagai i soo o Iesu anamua e pei foi mo i tatou taitoatasi i le asō, ae patino lava mo e o sailia moni le ola e faavavau. O le fetalaiga a le Faaola i Ona soo ua faaalia ai le mana o le Atua ma Lona alofa lē masuia mo le taulealea³ ma mo i tatou foi.

I le tele o tausaga ua mavae, sa ou ave ai o’u atalii, o Josh (6) ma Jared (5), i se fagotaga tafafao i le aloalo o Tarawa. Sa ou avea muamua i la’ua i ni malaga o fagotaga i ni vaituloto matagofie ma vaitafe i Iutā a o auai atu i le BYU, peitai o le fagota ai i se aloalo o le sami o se matuā aafiaga fou atoatoa mo i la’ua. I se paopao vaapiapi sa ou mauaina mai lo’u tama, sa ou faanofoina Jared i o’u luma ma Josh i o’u tua. Ona, faatasi ai ma le fe’ilafi mai o le malamalama o le masina i le tafailagi, sa o matou alo atu i le vaega loloto o le aloalo. Sa matuā fiafia nei alii i le i ai faatasi ma lo la tamā i luga o se paopao.

A o vaaia nei alii o ‘ae’aeina lea aafiaga patino, sa ou matauina ua leva le afiafi, ma ua tatau ona agai atu i le fale a o le’i vaivai i la’ua ma fiamomoe. A o o’u sauni e toso mai i luga le taula, sa ou faalogoina faafuasei se pisi i o’u tua. Sa ou faliu atu ma maua lo’u atalii, o Joshua, ua pa’u ese mai le paopao! Sa ou faia se mea sesē o le lē faamauluina lea o matou ofu faaola. Sa alu sa’o ifo lava Josh i totonu o le vai. Sa ou oso atu i ona tua e aunoa ma le faamalamalamaina ia Jared le mea sa tupu. Sa ou mau ia Josh i lona lima ma sa tosoina mai o ia i luga i le, i lo’u fefe, sa ou vaaia se isi pisi i luga a’e tonu o lo’u ulu. O lo’u atalii fa tausaga, o Jared, ua magoto ifo foi i le vai. “O se tulaga faamata’u tele. O le a o matou feoti uma!” sa ou manatu ai.

Ma le atuatuvale, sa ou uuina Jared i lo’u lima agavale ae o Josh sa i le isi, sa ou fea’aina o’u vae i le malosi sa ou gafatia agai i luga. I le tautevateva ai i nei tulaga, sa amata ona gagase o’u vae, ma sa amata ona ou goto ifo faatasi ma o’u atalii i o’u lima. Peitai e pei o Iosefa Samita le itiiti, lea sa “saisaitia faamalosi e ni mana” ma sa valaau atu i le Atua e laveai o ia mai le mana o lona fili⁴, sa ou valaau foi i le Atua e laveai i matou mai le mana malaia o le vasa.

I le faafetaia ma le faavavegaina, sa oo mai le Alii i lo matou lavea’iina. O o’u atalii, ia sa tau lē iloa ona feausi i lea taimi, sa amata ona faatino e pei o ni tagata a’au tulagaese. Sa o la faagaoioi o la lima ma vae i se faatinoga lea sa uunaiina a’e ai matou i luga ina ia mafai uma ai ona matou manava. O lenei mea atoa sa tupu i totonu o ni sekone. Peitai o lo matou tautevateva sa le’i uma lea. Sa o matou iloaina i le taunuu ane ai i luga o le matou paopao sa tafea ese atu i nai mita. Faatasi ai ma ni vae ua vaivai ma ni alii se toalua i o’u lima, o nai mita le mamao ese na foliga mai o se mamao sa lē gafatia mo i matou. Pe o le a o matou taunuu ea iina? Sa ou tagi. E ui i lea, e ala atu i taumafaiga faifaipea ma le tatalo, sa o matou taunuu lava i lo matou paopao, ma faatasi ai ma le agaga faafetai, sa o matou faafetaia le Atua mo le lavea’iina o ō matou ola.

O lo’u faamoemoega i le faasoa atu o lenei tala faaletagata lava ia o le molimauina lea o le alofa ofoofogia o le Atua ma le mana lē mafaufauina e faasaoloto ai mai noanoataga i latou e tuu atu lo latou talitonuga ma faatino le faatuatua ia te Ia⁵. O le faatuatua e saofagā ai i le mana o le Atua ma faamanuiaga. Na saunoa mai Peresitene Russell M. Nelson, “O le faatuatua ia Iesu Keriso o se mana aupito silisili ua avanoa mo i tatou i lenei olaga. O mea uma ua mafaia ia i latou e talitonu”⁶.

E ala atu i Lona soifuaga o faataitaiga ma le taulaga togiola, ua saunia ai e le Alii le auala mo i tatou e maua ai le ola e faavavau e ala i lo tatou usiusitai i sauniga paia ma feagaiga. E pei ona Ia folafola mai, “O a’u o le ala, upumoni, ma le ola.”⁷