ព័ត៌មានក្នុងស្រុក
គម្រោងមនុស្សធម៌ដ៏ធំបំផុតនៅតំបន់អាស៊ីដែលចាប់ផ្ដើមនៅក្នុងព្រះរាជាណាចក្រកម្ពុជា
ការជួសជុលមន្ទីរពេទ្យខេត្តកំពង់ធំ បានបើកដំណើការដោយមានប្រារព្ធពិធីចាប់ផ្ដើមគម្រោង ។
អែលឌើរ ខេលី អរ ចនសុន ជាគណៈប្រធានតំបន់អាស៊ីនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ព្រមជាមួយនឹងអ្នកកាន់តំណែងប្រចាំតំបន់ដទៃទៀត បានធ្វើដំណើរទៅខេត្តកំពង់ធំ នៃព្រះរាជាណាចក្រកម្ពុជា ដើម្បីចូលរួមនៅក្នុងពិធីបើកដំណើរការនៃការជួសជុលមន្ទីរពេទ្យខេត្តកំពង់ធំ និងឧបករណ៍គម្រោង ជាមួយនឹងឯកឧត្តមអភិបាល ងួន រតនៈ និងមន្ត្រីរដ្ឋាភិបាលដទៃជាច្រើនទៀត កាលពីថ្ងៃទី ១៦ ខែមករា ឆ្នាំ ២០២៣ ដែលសាសនាចក្របានបរិច្ចាគជាទឹកប្រាក់ជិត ១.៥ លានដុល្លារអាមេរិក ដើម្បីបញ្ចប់ការជួសជុលមន្ទីរពេទ្យនេះ ។
សេចក្ដីប្រកាសអំពីគម្រោងនេះត្រូវបានធ្វើឡើង នៅពេលអែលឌើរ ចនសុន បានបំពេញទស្សនកិច្ចលើកដំបូងរបស់លោកទៅកាន់ខេត្តកំពង់ធំ នៃព្រះរាជាណាចក្រកម្ពុជា កាលពីថ្ងៃទី ៧ ខែធ្នូ ឆ្នាំ ២០២២ ដើម្បីជួបជាមួយនឹងឯកឧត្តមអភិបាល ងួន រតនៈ និងថ្នាក់ដឹកនាំរដ្ឋាភិបាលដទៃៗទៀត ដើម្បីធ្វើការប្រកាសជាពិសេសអំពីការបរិច្ចាគ និងការជួសជុលនេះ ។
កិច្ចដំណើរការនេះឥឡូវត្រូវបានចាប់ផ្តើមជាគម្រោងមនុស្សធម៌ដ៏ធំបំផុតមួយក្នុងតំបន់អាស៊ី ។ ការជួសជុលមន្ទីរពេទ្យខេត្តកំពង់ធំ និងឧបករណ៍គម្រោង នឹងរួមបញ្ចូលទាំងការជួសជុលអគារមន្ទីរពេទ្យ និងធ្វើការជួសជុលរចនាសម្ព័ន្ធ ៣២ ផ្សេងៗទៀត បន្ថែមពីលើឧបករណ៍មន្ទីរពេទ្យថ្មី ។ មន្ទីរពេទ្យខេត្តកំពង់ធំ គឺជាមន្ទីរពេទ្យបង្អែកមួយនៃមន្ទីរពេទ្យបង្អែកតែបីនៅក្នុងខេត្តដែលបម្រើដល់មនុស្សច្រើនជាង ៨៥០០០០ នាក់ ។ មន្ទីរពេទ្យបង្អែកផ្ដល់នូវការថែទាំសុខភាពដល់មនុស្សទាំងអស់ ជាពិសេសដល់ប្រជាជនក្រីក្រ និងខ្វះខាតនៅតាមជនបទដាច់ស្រយ៉ាលនេះ ។
ពេលបើកកម្មវិធី នោះមានការចូលរួមមកពីមន្ត្រីរដ្ឋាភិបាលខេត្តនៃប្រទេសកម្ពុជា ដែលរួមមាន ឯកឧត្តម អភិបាលខេត្ត ងួន រតនៈ ជានាយកមន្ទីរធម្មការ និងសាសនា លោក តាន តាយជ្រុន ជានាយកសុខាភិបាលខេត្ត វេជ្ជបណ្ឌិត ស្រី ស៊ីន ជានាយកសុខាភិបាលខេត្ត វេជ្ជបណ្ឌិត ស្រេង សេង និងនាយករដ្ឋបាលខេត្តកំពង់ធំ លោក ម៉ាក ប៊ុនហុង ។ អ្នកឡើងនិយាយនៅក្នុងកម្មវិធីបើកសម្ភោធនោះ រួមមាន អែលឌើរ ខេលី អរ ចនសុន ឯកឧត្តមអភិបាល ងួន រតនៈ និងលោកសៀ សំណាង នាយកនៃសមាគមនិកាយសាសនានៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ និងនាយកសុខាភិបាលខេត្ត ។
វាគឺជាថ្ងៃដ៏មានក្ដីសោមនស្សសម្រាប់នាយកសុខាភិបាល វេជ្ជបណ្ឌិត ស្រេង សេងហេង នៅពេលលោកថ្លែងទៅកាន់ឯកឧត្តមអភិបាល ភ្ញៀវកិត្តិយស ព្រមទាំងសមាជិកអ្នកស្ដាប់ ។ លោកបានផ្ដល់ព័ត៌មានលម្អិតអំពីរបៀបដែលការជួសជុល នឹងត្រូវបញ្ចប់ជាបីដំណាក់កាល ។ លោកក៏បានពិពណ៌នាអំពីទំហំរបស់មន្ទីរពេទ្យនោះ ដែលមាន ១៥០ គ្រែ មានបុគ្គលិក ១៨០ នាក់ មានវេជ្ជបណ្ឌិត ២៨ នាក់ មានគិលានុប្បដ្ឋាយិកា ៥៤ នាក់ ពេទ្យឆ្មបចំនួន ៣២ នាក់ អ្នកបច្ចេកទេសខាងមន្ទីរពិសោធន៍ចំនួន ៨ នាក់ ព្រមទាំងមានពេទ្យធ្មេញចំនួន ១ នាក់ ។ ដំណាក់កាលទីមួយនៃគម្រោងនេះ ត្រូវបានដាក់កាលវិភាគបញ្ចប់នៅខែមេសា ឆ្នាំ ២០២៣ ហើយដំណាក់កាលបន្ដបន្ទាប់នឹងបញ្ចប់ត្រឹមខែធ្នូ ឆ្នាំ ២០២៣ ។
លោកសៀ សំណាង នាយកនៃនិកាយសាសនានៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយសម្រាប់ប្រទេសកម្ពុជា បានថ្លែង និងកត់ចំណាំថា សាសនាចក្រកំពុងតែបម្រើនៅក្នុងប្រទេសចំនួន ១៥៨ ប្រទេសនៅទូទាំងពិភពលោក ។ លោកបានថ្លែងអំពីប្រវត្តិសង្ខេបនៃកិច្ចការមនុស្សធម៌របស់សាសនាចក្រនៅក្នុងប្រទេសកម្ពុជា ចាប់តាំងពីឆ្នាំ ១៩៩៤ ដែលចាប់ផ្ដើមជាមួយនឹងគម្រោងទឹកស្អាត បន្ទប់ទឹក និងកន្លែងលាងដៃ ហើយឥឡូវជួយជាមួយគម្រោងការកែលម្អផ្នែកសុខាភិបាល ដែលមានទឹកប្រាក់សរុបច្រើនជាង ១៣ លានដុល្លារអាមេរិក នៅក្នុងរយៈពេល ៤ ឆ្នាំកន្លងទៅ ។
បន្ទាប់ពីការសម្ដែងនូវការអរគុណចំពោះមនុស្សគ្រប់គ្នាដែលបានចូលរួម អែលឌើរ ចនសុន បានថ្លែងថា « ពួកយើងគឺជាបងប្អូនប្រុសស្រីនឹងគ្នា ហើយឥឡូវមិនថាពួកយើងរស់នៅកន្លែងណានោះទេ ដោយសារតែយើងជាបងប្អូននឹងគ្នា នោះយើងមានទំនួលខុសត្រូវមួយដើម្បីមើលថែដល់គ្នាទៅវិញទៅមក » ។ របៀបមួយដែលយើងមើលថែដល់គ្នាទៅវិញទៅមក គឺតាមរយៈការតមអាហារ ។ សមាជិកពុំទទួលទានអាហារចំនួនពីរពេឡ ហើយបានបរិច្ចាគប្រាក់ដើម្បីជួយដល់អ្នកទៃទៀត ។ « ទោះជាមនុស្សជាច្រើនបរិច្ចាគក្នុងចំនួនតិចតួចមួយក្ដី តែនៅពេលសមាជិករាប់លាននាក់បរិច្ចាគបន្ដិចម្នាក់ៗ នោះពួកយើងអាចជួយមនុស្សដទៃទៀតបាន ។ ដោយសារតែសមាជិកលះបង់ដើម្បីធ្វើការបរិច្ចាគនេះ នោះពួកយើងមានការទទួលខុសត្រូវពិសិដ្ឋមួយដើម្បីជួយដល់ប្រជាជនតាមរបៀបមួយដែលប្រកបដោយអត្ថន័យ » ។ លោកបានមានប្រសាសន៍ថា មនុស្សជាច្រើននៅលើវេទិកានាថ្ងៃនេះ គឺជាអ្នកស្ម័គ្រចិត្ត ដែលចំណាយពេលវេលា និងចំណាយថ្លៃខ្លួនឯងដើម្បីមកទីនេះ ហើយជួយដល់អ្នកដទៃទៀត ។ អែលឌើរចនសុន បានចែកចាយថា ការថែទាំសុខភាព គឺសំខាន់ណាស់ចំពោះគាត់ នៅពេលគាត់មានកូន និងឪពុកម្ដាយដែលត្រូវការការថែទាំពីមន្ទីរពេទ្យ ហើយជឿថាការផ្ដល់សេវាថែទាំសុខភាពល្អ គឺសំខាន់ចំពោះមនុស្សទាំងអស់ ។ លោកបានមានប្រសាសន៍ថា « ខ្ញុំមើលទៅគម្រោងនេះ ជាឱកាសដ៏ល្អមួយដើម្បីលើកតម្កើង និងប្រទានពរដល់ជីវិតមនុស្សជាច្រើននៅក្នុងខេត្តនេះ » ។ លោកបានបញ្ចប់ដោយការថ្លែងអំណរគុណដល់អស់អ្នកដែលចូលរួមចំណែកក្នុងគម្រោងនេះ អ្នកធ្វើការខាងសុខាភិបាល បុគ្គលិក ក្រុមសាងសង់ និងអស់អ្នកដែលធ្វើការជួយដើម្បីឲ្យអគារដ៏ស្រស់ស្អាតនេះធ្វើជាកន្លែងដើម្បីទទួលបានការថែទាំងសុខភាព ។ លោកបានមានប្រសាសន៍ថា « វាគឺជាឯកសិទ្ធិមួយដើម្បីធ្វើការជាមួយបងប្អូនទាំងអស់គ្នា » ។ លោកបានអញ្ជើញឲ្យអ្នកស្ដាប់ទាំងអស់ « ស្វែងរករបៀបដើម្បីជួយដល់បងប្អូនប្រុសស្រីដែលនៅជុំវិញពួកយើងផងដែរ » ។
ឯកឧត្តមអភិបាលបានបញ្ចប់សុន្ទរកថាក្នុងពិធីនេះ ដោយការថ្លែងអំណរគុណដល់ភ្ញៀវជាកិត្តិយស និងអ្នកស្ដាប់ទាំងអស់ និងអរគុណដល់សមាគមចំពោះកិច្ចការ និងកិច្ចខិតខំរបស់ពួកគេទាំងអស់ ។ លោកថ្លែងអំណរគុណចំពោះការខិតខំរបស់ពួកគេក្នុងការបង្កើតផែនការដើម្បីជួយរក្សាឲ្យមន្ទីរពេទ្យនេះបានបើកដំណើរការ ខណៈពេលកំពុងធ្វើការជួសជុលកែលម្អរ ។ ឯកឧត្តមអភិបាលបានមានប្រសាសន៍ថា ឥឡូវនេះយើងអាចមានមន្ទីរពេទ្យដ៏ស្រស់ស្អាតមួយ ហើយអាចបង្កើនការថែទាំ និងសេវា ដែលយើងអាចផ្ដល់ទៅកាន់ប្រជាជន ដើម្បីកុំឲ្យពួកគេចាកចេញពីខេត្ត ហើយត្រូវធ្វើដំណើរទៅឆ្ងាយដើម្បីទទួលបានសេវាថែទាំសុខភាព ។ លោកបានមានប្រសាសន៍ថា វាសំខាន់ណាស់ដើម្បីកត់ចំណាំថា ពុំគ្រាន់តែអគារប៉ុណ្ណោះទេដែលត្រូវបានជួសជុលកែលម្អរ ប៉ុន្តែឧបករណ៍ក៏ត្រូវបានបន្ថែម ព្រមទាំងមានការបំពាក់បំប៉ន និងចំណេះដឹងផ្ដល់ទៅឲ្យបុគ្គលិកផងដែរ ការថែទាំងសុខភាពនឹងកែលម្អ ហើយប្រទានពរដល់មនុស្សជាច្រើន ។ អ្នកធ្វើការផ្ដល់សេវាថែទាំសុខភាព នឹងមានមោទនភាពចំពោះអគារថ្មី ហើយអ្នកជំងឺនឹងរីករាយទទួលយកនូវការថែទាំសុខភាពនៅក្នុងមន្ទីរពេទ្យនេះ ។
ទាំងអែលឌើរ ចនសុន និងឯកឧត្តមអភិបាល ងួន រតនៈ បានមានប្រសាសន៍ថា ពួកគាត់ទន្ទឹងចាំវិលត្រឡប់មកម្ដងទៀត ដើម្បីមើលគម្រោងបញ្ចប់ ហើយមើលឃើញថាតើជីវិតរបស់ប្រជាជនទទួលបានពរជ័យយ៉ាងណាខ្លះដោយសារតែគម្រោងនេះ ។ គម្រោងនេះដាក់កាលវិភាគបញ្ចប់នៅខែធ្នូ ឆ្នាំ ២០២៣ ។
គម្រោងបានចាប់ផ្ដើមមកពីការខិតខំប្រឹងប្រែងរបស់អែលឌើរ និងស៊ីស្ទើរ អាន់ឌើរសុន ហើយឥឡូវនឹងគ្រប់គ្រងដោយអែលឌើរ និងស៊ីស្ទើរ ចាន់ដ្លើរ ជាអ្នកផ្សព្វផ្សាយសាសនាដែលបម្រើខាងមនុស្សធម៌ CHIE (ការខិតខំកែលម្អវិស័យសុខាភិបាលនៅប្រទេសកម្ពុជា) ដែលមានគោលបំណង ជួយសង្គ្រោះដល់ការរងទុក្ខរបស់ប្រជាជនក្នុងជាតិសាសន៍ និងសាសនាទាំងអស់ ៕