“Teuteú mo e Tupulakí,” Liahona, ʻEpeleli 2023.
Maʻá e Ngaahi Mātuʻá
Teuteú mo e Tupulakí
Siʻi Ngaahi Mātuʻa,
ʻE lava ke tokoni atu ʻa e makasini ʻo e māhina ní ke kamataʻi ho talanoa mo hoʻo fānaú fekauʻaki mo e founga ʻoku tokoni ai ʻa e teuteú ki heʻetau fakalakalaka ki he fakamoʻui taʻengatá. ʻOku fakamatalaʻi ʻe he ngaahi fakakaukau ʻi laló ʻa e ngaahi tefito hangē ko e teuteu ki ʻitānití, fatongia ʻo e Laumālie Māʻoniʻoní ʻi he ako fakatuʻasinó mo fakalaumālié, mo e founga ke ʻai ai e uike kimuʻa he Toetuʻú ke mahuʻingamālie angé.
Ngaahi Fealēleaʻaki ʻi he Ongoongoleleí
Teuteu ki ʻItānití
Lau ʻa e fakamatala ʻa Palesiteni Nalesoní “Ko Sīsū Kalaisi ʻA Hotau Fakamoʻuí,” ʻi he peesi 4. ʻOku ʻi ai nai haʻo fāmili ʻokú ke ʻamanaki atu ke mou toe fetaulaki ʻi he moʻui ka hokó? Ko e hā ha ngaahi ouau ʻe tokoni ki ho fāmilí ke nau fakataha ai ʻo taʻengata? Fehuʻí: “ʻOku tau fai nai ha ngaahi fili ki he taimí ni pe ki ʻitāniti?”
Ko Hono ʻAi ʻa Kalaisi ko e Uho ʻo e Toetuʻú
ʻI hono fakaʻaongaʻi e ngaahi fakakaukau ʻi he fakamatala “Ko Hono Fokotuʻu ʻo e Toetuʻú ko ha Taimi ke Manatuʻi ai ʻa e Fakamoʻuí” ʻi he peesi 8, fakatahatahaʻi homou fāmilí pea aleaʻi e meʻa te mou lava ʻo fai ke manatuʻi lahi ange ai e Fakamoʻuí ʻi hoʻomou fakamanatua e Toetuʻú. Ko e fē ʻi he folofolá, himí, pe ʻū fakatātaá ʻoku saiʻia ho fāmilí ke ako lahi ange ki aí?
Fakalakalaka ʻi he Akó
Vakaiʻi e “Akó: Ko ha Ngāue Fakalaumālie” ʻi he peesi 18. Kuo tāpuekina fēfē nai ho fāmilí ʻi hoʻo fekumi ki he Laumālie Māʻoniʻoní ke tokoniʻi koe ʻi hoʻo akó? ʻOku ʻi ai nai ha ngaahi founga te ke lava ai ʻo fakaafeʻi ʻa e Laumālie Māʻoniʻoní ke hoko ko ha konga lahi ange ʻo hoʻo akó, ʻo aʻu pē ki he ako fakaʻatamaí? Ko e hā ha ngaahi founga te ke lava ai mo ho fāmilí ʻo fetokoniʻaki ke maʻu ha ako lahi angé? ʻE feʻunga nai ha taha ʻo e ngaahi polokalama ako ʻa e Siasí maʻa ha taha ʻi ho fāmilí?
Fiefia Fakafāmili ʻi he Haʻu, ʻo Muimui ʻIate Aú
Ko ha Ongo ʻo e Fakahaá
Naʻe mamata mo fanongo ʻa Pita ki he ngaahi akonaki ʻa e Fakamoʻuí. Ka neongo ia, naʻá ne maʻu ʻene fakamoʻoni kia Kalaisí ʻi he fakahā kae ʻikai ʻi hono ngaahi ongoʻanga fakatuʻasinó—ʻa hono “kakanó mo e totó” (vakai, Mātiu 16:13–17).
Tānaki ha ngaahi meʻa ʻe niʻihi (vakai ki he ngaahi fakakaukau ʻi laló). Taufetongi ʻi hono haʻi ho matá. ʻAi ke fakaʻaongaʻi ʻe he tokotaha takitaha honau ngaahi ongoʻanga ʻe faá ke mateʻi pe ko e hā ʻa e meʻa ko iá.
Ngaahi fakakaukaú:
-
Nanamu ki ha matalaʻiʻakau
-
ʻAhiʻahiʻi ha kiʻi fakaneifua
-
Fanongo ki ha foʻi hiva
-
Ala ki ha kofu māfana molū
Fealeaʻaki: Lau ʻa e Tokāteline mo e Ngaahi Fuakava 6:14–15 mo e 8:2–3. Te tau lava fēfē ʻo ako ʻa e moʻoní ʻo fakafou ʻi he ongo fakalaumālie ʻo e fakahaá kae ʻikai fakafalala pē ki hotau ngaahi ongoʻanga fakatuʻasinó? Fakatokangaʻi ange ʻoku maʻu ʻe he tokotaha kotoa pē ha fakamoʻoni ʻo fakafou ʻi he Laumālie Māʻoniʻoní ka ʻoku kehekehe pē hono ongoʻi ʻa e tākiekiná ʻe he kakai kehekehe. ʻE fakaloloto fēfē ʻe he fakahā fakataautaha ʻo fakafou ʻi he Laumālie Māʻoniʻoní ʻa ʻetau fakamoʻoni kia Kalaisí?