Taea’e Michael T. Nelson

Nō te taea’e Michael T. Nelson, ’ua ha’apāpū mai tōna taime rirora’a ’ei peresideni misiōni ē, te ha’api’ira’a i te u’i e ti’a mai nei i te mau parau tumu ti’a ’e i muri iho, te ti’aturira’a ia rātou, e fa’atupu te reira i te mau hotu maita’i a’e—nō te ’ohipa misiōnare ’e i roto i te orara’a ’o te mau misiōnare tāta’itahi.

Tei roto noa te reira i te ti’aturira’a. ’Ua ha’api’i māua i te ti’aturi ia rātou », tāna ïa parau nō ni’a i te ’ohipara’a ’e te mau misiōnare rave tāmau i roto i te misiōni nō California San Bernardino, i reira ’o Nelson mā i te tāvinira’a ’ei feiā fa’atere nō te misiōni mai te matahiti 1998 tae atu i te matahiti 2001.

Tē parau nei te taea’e Nelson ē, te ha’api’ira’a—’e te hōro’ara’a i te feiā ’āpī i te rāve’a nō te arata’i—’ua vai noa te reira ’ei tuha’a pāpū nō tāna tāvinira’a i roto i te ’Ēkālesia ’e e tāmau noa ’oia i te reira i roto i tōna pi’ira’a ’āpī i roto i te peresidenira’a rahi nō te Feiā ’Āpī Tamāroa. I roto i nā matahiti e toru i ma’iri a’e nei, ’ua tāvini te taea’e Nelson ’ei pāpa’i parau fa’atere nō te peresidenira’a rahi nō te Feiā ’Āpī Tamāroa. E piti matahiti nā mua atu, ’ua tāvini ’oia ’ei melo nō tei parauhia i teienei, te āpo’ora’a rahi fa’aara a te feiā āpī tamāroa.

’Ua fānauhia Michael Terry Nelson i te 10 nō Tiunu 1956, i Roto Miti, Utaha, Marite, nā Monte Cannon ’e ’o Viola Eliza Nelson ’e ’ua pa’ari i roto i te ārea nō Roto Miti. I muri a’e i tōna tāvinira’a i roto i te misiōni nō Tīreni Santiago, ’ua tuatāpapa ’oia i te ’āparaura’a i rotopū i te mau pupu i te fare ha’api’ira’a tuatoru nō Brigham Young ’e nō Utaha. I te matahiti 1982, ’ua fa’aipoipo ’oia ia Barbara Fluckiger i roto i te hiero nō Jordan River. ’Ua ora ’o Nelson mā i Sandy, Utaha, hou ’a haere ai i Wallsburg, Utaha. E iva tamari’i tā rāua.

E ti’a fa’atere ha’apa’o faufa’a te taea’e Nelson nō te hō’ē taiete patu fare ’e nō te ha’afaufa’ara’a i te moni. Tē fa’a’ohipa ato’a nei Nelson mā, ’e e piti tamari’i e ora ra i te fare, i te hō’ē fare fa’a’apu na’ina’i i ni’a i tō rātou iho fenua. Te ravera’a i te ’ohipa ’e te hōro’ara’a i te taime i rāpae, e riro ïa ’ei mea faufa’a nō te feiā ’āpī o te ’Ēkālesia, te parau ïa a te taea’e Nelson, mai tā tōna ’utuāfare e rave nei.

’Ua tāvini te taea’e Nelson ’ei peresideni titi, ’ei tauturu i roto i te hō’ē peresidenira’a titi, ’ei pāpa’i parau fa’atere nō te titi, ’ei ’episekōpo, ’e ’ei peresideni feiā ’āpī tamāroa nō te pāroita ’e nō te titi. ’Ua tauturu ’oia i te ohira’a i te moni, i te tāpa’ora’a ’e i te mātēria i te matahiti 1997 nō te hō’ē pere’o’o auahi nō te hanere e pae ’ahurura’a o te matahiti tei fa’ati’a fa’ahou i te tere o te taiete mātāmua i roto i te peho nō Roto Miti.