Mau parau ’āpī nō te ’Ēkālesia
E hi’ora’a i te tāvinira’a a te peresideni Russell M. Nelson e pae matahiti ’ei Peresideni nō te ’Ēkālesia
I roto i tāna a’ora’a mātāmua i mua i te ta’ata ’ei 17ra’a o te Peresideni nō te ’Ēkālesia a Iesu Mesia i te Feiā Mo’a i te mau Mahana Hope’a nei, tāna i vauvau mai e pae matahiti i ma’iri a’enei, ’ua fa’ahaere ’oia i te mana’o o te ta’ata mai ni’a iāna haere atu i ni’a ia Iesu Mesia ’e i muri iho ’ua hi’o i mua.
« ’Ua ha’api’i ’e ’ua fa’auru noa te Fatu i tāna mau peropheta, e nā reira noa ’oia », tāna ïa parau. ’O te Fatu te pēperu rahi. E tāmau noa mātou nei tei fa’atōro’ahia nō te fa’a’ite pāpū i tōna i’oa mo’a nā te ao nei, ’ia ’imi ’ia ’ite i tōna hina’aro ’e ’ia pe’e i te reira » (« ’A haere ’āmui ai tātou i mua », Liahona, ’Ēperēra 2018, 6).
Fāri’i i te heheura’a nō te arata’i i te ’Ēkālesia
’Ua ’ohipa te peresideni Nelson i raro a’e i te fa’aterera’a a te Fatu ’a rātere ai ’oia i roto e 35 fenua, ’a fa’atano ai i te fa’anahora’a a te ’Ēkālesia, ’a fa’a’ohipa ai i te ihi anoa ha’a (technologie) nō te fa’a’ite i te ’evanelia, ’a arata’i ai i te ’Ēkālesia i roto i te ma’i pe’e, ’a fa’atae ai i te mau anira’a manihini faufa’a, ’e ’a patu ai i te mau araturu nō te haro’aro’a.
I roto i tōna ti’ara’a ’ei Peresideni nō te ’Ēkālesia, ’ua paraparau te peresideni Nelson i e rave rahi hānere tauasini feiā mo’a i te mau mahana hope’a nei ’e ’ua fārerei i te mau ari’i, te mau peresideni ’e te mau fa’atere hau mātāmua. ’Ua tāmāhanahana ’oia i te feiā tei hāmani-’ino-hia ’e vetahi ’ē tei ’oto ’e ’ua fa’ahōhonu i te mau tā’amura’a ’e te feiā fa’atere rahi nō te National Association for the Advancement of Colored People [te tā’atira’a nō te ao nei nō te haerera’a i mua o te mau ta’ata ’ū (NAACP)], ma te fāri’i i te hō’ē anira’a ’ia paraparau i roto te rurura’a a te NAACP i te matahiti 2019 i Detroit (Michigan, Fenua Marite).
Nā roto i te heheura’a ’e te pāturura’a hope a te Peresidenira’a Mātāmua ’e te pupu nō te Tino ’Ahuru Ma Piti ’āpōsetolo, ’ua rave ato’a ’oia i te mau tauira’a rau i roto i te mau ture o te ’Ēkālesia.
I raro a’e i tāna fa’aterera’a fa’auru, ’ua mono te feiā fa’atere o te feiā mo’a i te mau mahana hope’a nei i te ha’api’ira’a ’utuāfare ’e te hāhaerera’a ’utuāfare i te ’ohipa aupurura’a ; ’ua fa’atanotano i te tārena nō te mau purera’a i te sābati nō te tauturu i te hō’ē tuatāpapara’a ’evanelia fa’atumuhia i ni’a i te ’utuāfare ’e pāturuhia e te ’Ēkālesia ; ’e ’ua ani i te mau melo ’ia fa’a’ohipa i te i’oa ti’a tā’ato’a o te ’Ēkālesia. ’Ua tu’u te ’Ēkālesia i te hō’ē ture ’o tē fa’ati’a i te mau ta’ata fa’aipoipo tīvira ’ia tā’atihia i roto i te hiero ’ia ineine ana’e rātou ; ’ua taui i te i’oa o te fa’a’āfarora’a tuha’a ’ahuru ’ei fa’a’itera’a nō te tuha’a ’ahuru ; ’e ’ua ha’amau i te hō’ē ture ’o tē fa’ati’a i te mau vahine ’ia tāvini ’ei ’ite nō te mau tā’atira’a, ’e i te mau vahine, te feiā ’āpī ’e te mau tamari’i e mau melo ti’amā nō te ’Ēkālesia, ’ia tāvini ’ei ’ite nō te mau bāpetizora’a.
« Hō’ē o te mau mea tā te Vārua i tūra’i pinepine i roto i tō’u ferurira’a mai te taime mai ā ’a pi’ihia ai au ’ei Peresideni o te ’Ēkālesia, ’o te ineine rahi ïa o te Fatu ’ia heheu mai i tōna mana’o ’e tōna hina’aro, », te parau ïa a te peresideni Nelson i roto i te ’āmuira’a rahi nō ’Ēperēra 2018 (« Heheura’a nō te ’Ēkālesia, heheura’a nō tō tātou orara’a », Liahona, Mē 2018, 94).
I te matahiti 2020, ’ua fa’ahanahana te ’Ēkālesia i te piti-hānere-ra’a o te ’Ōrama Mātāmua a Iosepha Semita, e ’ere nā roto i te hō’ē fa’ahanahanara’a rahi, nā te feiā fa’atere rā o te ’Ēkālesia i ani manihini i te feiā mo’a i te mau mahana hope’a nei nā te ao ato’a nei ’ia ha’api’i ’ia fa’aro’o maita’i a’e ’e te pinepine a’e i te reo o te Fatu. I roto i te hō’ē a’ora’a i te ’āmuira’a rahi nō ’Ēperēra 2020, ’ua vauvau mai te peresideni Nelson i te hō’ē parau poro’i faufa’a rahi, « Te Fa’aho’i-fa’ahou-ra’a mai o te ’īra’a o te ’evanelia a Iesu Mesia : E poro’i i tō te ao nei nō te piti-hānere-ra’a o te matahiti » (hi’o « Fa’aro’o iāna », Liahona, Mē 2020, 91–92).
’Ua arata’i i te ’Ēkālesia i roto i te COVID-19
Nā roto i tōna ’ite ’ei taote tāpū pionie, hau atu rā, ’ei peropheta nā te Fatu ’e ’ei ti’a fa’atere nō te hō’ē ha’apa’ora’a fa’aro’o ’ati a’e te ao nei, ’ua arata’i te peresideni Nelson i te ’Ēkālesia i roto i te pararera’a ma’i pe’e COVID-19 tei ha’amata i te matahiti 2020.
’Ua riro te pāhonora’a a te Latter-day Saint Charities [Te mau tauturu aroha a te feiā mo’a i te mau mahana hope’a nei] ’ei pāhonora’a rahi roa a’e tae mai i teie mahana, i roto i te ’ā’amu o te ’Ēkālesia, nā roto i te hō’ē tauturu tei hōro’ahia i roto hau atu i te 150 fenua.
I roto i te hō’ē uiuira’a i te ’āva’e Mē 2020 a te Church News, ’ua parau te peresideni Nelson : « Noa atu te mau ata o te ’oto, e nehenehe e ’itehia te mau tāpa’o nō te maita’i » (i roto ia Sarah Jane Weaver, « Video : President Nelson Talks about the ‘Painful’ Decision to Close Temples amid COVID-19 », Church News, 27 nō Tiurai 2020, thechurchnews.com). ’Ua parau ’oia ē, tē mau tāpa’o maita’i o te pararera’a ma’i pe’e ’o te ’itera’a ïa i te mau rāve’a nō te ha’ara’a ’e te feiā mo’a i te mau mahana hope’a nei ma te ta’uma ’ore i roto i te manureva. Nā roto i te mau rāve’a ’āpī o teie tau, ’ua paraparau te peresideni Nelson i te feiā mo’a i te mau mahana hope’a nei i Venezuela ’e i Europa ’e i California, i Tanata ’e i Oklahoma. ’Ua paraparau ato’a ’oia i te feiā ’āpī pa’ari ’ati a’e i te ao nei.
I te ’āva’e ’Ātete 2022, ’ua tere atu te peresideni Nelson i rāpae ia Utaha nō te taime mātāmua, mai te taime ’a rahi ai te pararera’a ma’i pe’e i te ’āva’e Māti 2020 nō te ha’amo’a-fa’ahou-ra’a i te hiero nō Washington D.C. (Marite), tei fa’a’āpīhia.
Te fāri’ira’a i te feti’a nō te hau a Gandhi-King-Mandela
’Ua fa’aara te fare ha’api’ira’a tuatoru Morehouse, e fare ha’api’ira’a tuatoru ta’ata ’ere’ere tu’iro’o nō Georgia, Fenua Marite ē, e hōro’a ’oia i tāna feti’a mātāmua Gandhi-King-Mandela nō te hau i te peresideni Nelson. ’Ua hōro’a te fare ha’api’ira’a i teie fa’ahanahanara’a ’āpī i ni’a i te peropheta e 98 matahiti i te 13 nō ’Ēperēra 2023, i te ’āmuira’a fa’aro’o Worldhouse Interfaith and Interdenominational Assembly, i te Martin Luther King Jr. International Chapel, i Atlanta.
’Ua pi’ihia teie feti’a i te i’oa ra o Mahatma Gandhi, Martin Luther King Jr., ’e Nelson Mandela. ’Ua parau te fare ha’api’ira’a, nō te hō’ē ta’ata ïa ’o tē fa’aitoito nei i te hau ’e i te tauira’a maita’i i te pae sōtiare nā roto i te mau rāve’a marū ma te fa’a’ohipa i tā rātou fa’aterera’a nā te ao ato’a nei nō te ha’apāpū i te parau nō te hau, te parauti’a, te raura’a, ’e te fāito rau.
’Ua fāri’i ato’a te peresideni Nelson i te tao’a ha’amāuruuru nā roto i te video, ’e ’ua hīmene ato’a te pupu hīmene nō te Fare Menemene i Temple Square nā ni’a i te tu’urēni.
’Ua ’ī nā pae matahiti tāvinira’a a te peropheta i te mau fa’aitoitora’a ’ia here ’e ’ia fa’atura i te mau ta’ata ato’a. I te hō’ē ’oro’a i te matahiti 2018 nō te fa’ahanahanara’a i te 40ra’a o te matahiti o te heheura’a o te matahiti 1978 nō ni’a i te mau ha’amaita’ira’a o te autahu’ara’a e hōro’ahia i te mau melo ti’amā nō te mau taura ta’ata ato’a, ’ua ha’api’i ’oia i te feiā mo’a i te mau mahana hope’a nei ’ia « hāmani i te mau araturu nō te ’ohipa ’āmui, ’eiaha rā te mau papa’i fa’ata’a-’ē-ra’a » (« Building Bridges », New Era, ’Ātete 2018, 6).