Elder Christophe G. Giraud-Carrier

’A tomo ai ’oia i roto i te matahiti pa’ari, e mau ’ōpuara’a rahi tā Elder Christophe G. Giraud-Carrier—e ha’amata i te hō’ē haere’a ’eta’eta nō te ha’api’ira’a tuatoru, e fāri’i i te fa’anu’ura’a i te ha’api’ira’a nō te tavini i te hō’ē misiōni rave tamau, e fa’aipoipo i tōna hoa here taure’are’a, ’e i muri iho, e ha’amata i te orara’a ’utuāfare ’e i tōna tōro’a ta’ata ’aivana’a i tōna fenua ’āi’a, ’o Farāni.

’A tupu ai te misiōni ’e te fa’aipoipora’a mai tei fa’anahohia, ’aita te tahi atu mau tītaura’a i tupu. ’Aita te fa’anu’ura’a o te ha’api’ira’a i tupu, terā rā, ’ua tupu rā te fa’ahaerera’a i te fare ha’api’ira’a nō Brigham Young University (BYU), ’āpe’ehia mai ’e te hina’aro e ha’api’i i atu te fare ha’api’ira’a teitei. E mea varavara roa te mau ’ohipa nō te fare ha’api’ira’a tuatoru i Farāni nō te hō’ē ta’ata tei haere i te ha’api’ira’a i rāpae i te fenua, nō reira, te ’atu’atura’a i te hō’ē ’utuāfare, te ravera’a i te hō’ē tōro’a ta’a ’ē, ’e te tāvinira’a i roto i te ’Ēkālesia, nō roto mai i te mau fenua e rave rahi ’e ’ia au i te tārena a te Fatu.

« Nō te iti te mau mea tei tupu mai tā māua i ’ōpua, ’ua ’ite a’era māua ē, mai te mea e vaiiho tātou i te Fatu ’ia rave i tāna ’ohipa, ’e ’ia arata’i ia tātou i te vāhi tāna e hina’aro ’ia haere tātou, i reira ïa e ti’a ai ia tātou ’ia tāvini », te parau ïa a Elder Giraud-Carrier. « ’Ua tauturu te reira ia māua ’ia ha’api’i i te ti’aturi iāna, ’ia ti’aturi ē, e nehenehe tāna e fa’ariro i tō tātou orara’a ei mea hau atu i tē ti’a ia tātou ’ia rave ».

’Ua fānauhia ’o Christophe Gérard Giraud-Carrier i te 21 nō Tēnuare 1966, i Lyon, Farāni, nā Gérard Giraud-Carrier ’e ’o Annie Giraud-Carrier. I muri a’e i tāna tau misiōnare rave tāmau i roto i te misiōni nō Canada Montreal, ’ua fa’aipoipo ’oia ia Isabelle Sophie Mauclair i te ’āva’e Tiurai 1988 i Cholet, Farāni. ’Ua tā’atihia rāua e toru mahana i muri mai i roto i te hiero nō Bern i Helevetia. E metua rāua nō nā tamari’i e pae.

I muri a’e i tōna fāri’ira’a i te parau tu’ite bachelor, master, ’e te parau tu’ite doctorat nō te ihi roro uira i BYU, ’ua rave ’o Elder Giraud-Carrier i te ’ohipa ’ei ta’ata pa’ari nō te fare ha’api’ira’a tuatoru no’ Peretane nō Bristol, ’e ’ei ti’a fa’atere pa’ari nō te ELCA Informatique nā mua a’e i te ti’ara’a 19 matahiti ’ei ’orometua ha’api’i nō te mātini roro uira i BYU.

I te taime ’a pi’ihia ai ’oia ’ei Hitu ’Ahuru Hui mana fa’atere rahi, tē tāvini ra ’o Elder Giraud-Carrier ’ei peresideni titi nō te titi 16 nō Provo Utaha YSA. Tāna mau pi’ira’a i roto i te ’Ēkālesia, tē vai ra ïa te tāvinira’a ’ei peresideni nō te misiōni nō France Lyon, ’ei melo ’āpo’ora’a teitei ’e ’ei ’episekōpo.