Elder Ahmad S. Corbitt

Tē parau nei Elder Ahmad S. Corbitt ē, te tāvinira’a nā te ao ato’a nei ’ei tauturu i roto i te peresidenira’a rahi nō te Feiā ’Āpī Tamāroa, ’ua tauturu te reira i te fa’atupura’a i roto i tōna pi’ira’a ’āpī « i te ’aravihi rahi a’e nō te fa’aro’o i te arata’ira’a ’e te ha’api’ira’a a te peropheta ’e te ’āpōsetolo ma te ha’apa’o maita’i ’e te fa’aro’o rahi atu ».

’A pi’ihia ai ’oia nō te tāvini i roto i te peresideniraa nō te Feiā ’Āpī Tamāroa i te ’āva’e ’Ēperēra 2020, ’ua rave ’o Elder Corbitt i nā matahiti e toru i ma’iri i pīha’i iho i te tahi atu feiā fa’atere nō te feiā ’āpī, nō te ha’apūai i te u’i e ti’a mai nei ’e nō te ani manihini ia rātou ’ia ’āmui itoito i roto i te ’ohipa nō te fa’aorara’a ’e te fa’ateiteira’a.

« ’Aita vau e mana’o nei ē, e iti mai tō’u mana’o rū nō te ha’apūai i te u’i e ti’a mai nei », tāna ïa parau. « E riro rātou ’ei feiā fa’atere maita’i atu ia tātou nō te mea ’ua pa’ari rātou i roto i te mau rāve’a nō te rave i te ’ohipa nō te fa’aorara’a ’e te fa’ateiteira’a nā roto i te mau rāve’a teitei a’e ’e te mo’a a’e ».

’Ua fānauhia ’o Ahmad Saleem Corbitt, 60, i te 16 nō ’Ātete 1962, nā James Earl Corbitt ’e ’o Amelia Corbitt, i Philadelphia, Pennsylvania, i te Fenua Marite. I te 18ra’a o tōna mahana fānaura’a, ’ua tomo Ahmad i roto i te ’Ēkālesia, ma te pe’e i tōna metua vahine ’e te tahi mau taea’e ’e mau tuahine i roto i te pape nō te bāpetizora’a. ’Ua bāpetizohia tōna metua tāne ho’ovai i te matahiti i muri iho.

I muri a’e i te ha’api’ira’a i Ricks College (parauhia i teie nei te Brigham Young University–Idaho) ’e i te tāvinira’a i roto i te misiōni nō San Juan i Puerto Rico, mai te matahiti 1982 ’e tae atu i te matahiti 1984, ’ua fārerei ’oia ia Jayne Joslin i roto i te hō’ē tere hiero nō te feiā ’āpī pa’ari ’ōtahi. ’Ua fa’aipoipohia rāua i te ’āva’e ’Ātete 1985 i roto i te hiero nō Washington D.C. E ono tamari’i tā rāua.

’Ua fāri’i Elder Corbitt i te parau tū’ite nō te fare ha’api’ira’a teitei nō Stockton i New Jersey ’e nō te fare ha’api’ira’a ture nō Rutgers University. ’Ua tāvini ’oia ’ei peresideni nō te misiōni nō Dominican Republic Santo Domingo East, ’ei peresideni titi, ’ei tauturu i roto e piti peresidenira’a titi ’e ’ei melo āpo’ora’a teitei.

’Ua rave ’o Elder Corbitt i te ’ohipa ’ei pāruru ture, i roto i te mau auta’atira’a huira’atira ’e te hau, ’ei ti’a fa’atere nō te piha tōro’a a te ’Ēkālesia i New York nō te mau ’ohipa huira’atira e nā te ara, ’e ’ei ta’ata ’aravihi nō te misiōni nō te ārea.