Tē tere nei te peresideni Johnson ’e te peresideni Cordon i ’Āfirita

’Ua tere atu te mau peresideni rahi o te Sōtaiete Tauturu ’e o te feiā āpī tamāhine i te pae hiti’a o te rā nō ’Āfirita ’e i ’Āfirita rōpu i te ’āva’e Māti nō te fārerei i te feiā mo’a i te mau mahana hope’a nei ’e i te mau ti’a o te fa’aterera’a hau, ’e nō te māta’ita’i i te mau vāhi tauturura’a. ’Ua ha’amata te peresideni rahi nō te Sōtaiete Tauturu, ’o Camille N. Johnson ’e te peresideni rahi nō te Feiā ’Āpī Tamāhine, ’o Bonnie H. Cordon, i tō rāua tere tāvinira’a e iva mahana i Nairobi, Kēnia.

’Ua tere atu te peresideni Cordon i Kēnia, i ’Ūtaneta, i te Rēpupirita manahune o Tōneto, ’e i te Rēpupirita nō Tōneto. « ’Ua paraparau mātou i te mau ti’a o te mau fa’aterera’a hau tei hina’aro i te tauturu i te mau ’utuāfare, ’e ’ua fa’ahiahia roa mātou i te feiā fa’atere e hina’aro e pe’e ia Iesu Mesia », te parau ïa a te peresideni Cordon. « ’Ei feiā fa’atere nō te fa’aro’o, hō’ē ā fā tā mātou nō te tauturu i te patura’a i te mau ’utuāfare, nō reira e mea fa’ahiahia roa. »

’Ua tere atu te peresideni Johnson i te pae apato’erau hiti’a o te rā nō ’Ūtaneta nā muri i te UNICEF (parauhia i te mātāmua, te ’āfata moni tauturu nā te mau tamari’i nā te ara a te hau ’āmui, parauhia i teienei, te ’Āfata moni nā te mau tamari’i a te hau ’āmui) ’e ’ua fārerei i te feiā mo’a i te mau mahana hope’a nei i Lubumbashi, i te Rēpupirita nō Tōneto. « E tauto’ora’a teie nō te haere i’ō atu i tō tātou mau melo nō te pāhono i te mau hina’aro—te mau hina’aro tauturu i te mau ta’ata ato’a—te mau tamari’i nō te ao nei, ’e ’ua ’itehia mai ia mātou. E mea hanahana roa », te parau ïa a te peresideni Johnson nō ni’a i teie tere nā muri iho ia UNICEF. « ’Ua riro ïa ’ei taime māhanahana nō te ’ā’au, e taime māuiui ato’a rā, ’ua fa’aru’e rā vau i reira ma te mana’o ti’aturi. »