Tē ’āmui nei te feiā hīmene nā te ara i te pupu hīmene a te Fare Menemene, nō te ’āmuira’a

Nō te taime mātāmua, ’ua ’āmui mai te feiā i rāpae’au i te Fenua Marite i te pupu hīmene a te Fare menemene i Temple Square i te ’āmuira’a rahi.

’Aita i maoro a’enei, ’ua fa’a’ā’ano te pupu himene i tāna misiōni ’ia tae’ahia te naho’a ta’ata ’ati a’e te ao nei, te parau ïa a te peresideni o te pupu hīmene, ’o Michael O. Leavitt, tei parau i teie ’ōpuara’a ’o te haerera’a mau iho ā nō te tupura’a o te pupu hīmene. « Tē rave nei mātou i te reira nā roto ana’e i te rāve’a tā mātou i ’ite, ’oia ho’i, hō’ē ta’ahira’a i te taime hō’ē—te ha’api’ira’a, te ha’amaita’ira’a, ’e te anira’a i te Fatu i te mau arata’ira’a hau atu », tāna ïa parau. « Nā roto i teie mau ta’ahira’a, ’ua ’ite-pāpū-hia i teienei ē e haere te reira. »

Nō te mau ha’api’ipi’ira’a tāmau o te pupu hīmene, ’ua tītauhia i te mau melo o te pupu hīmene ’eiaha tō rātou nohora’a ’ia hau atu i te 100 maile (160 km) te ātea i te Fare menemene, i Roto Miti. Terā rā, ’ua parau te taea’e Leavitt ē, i teie ’ōpuara’a, ’ua matara te ’ūputa nō vetahi e ’aravihi ta’a ’ē tō rātou i te pae nō te hīmene, ’ia ō mai nō te hō’ē tau poto noa.

Ta’a ’ē atu tō rātou ’aravihi i te pae nō te reo, tītauhia i te mau ta’ata ato’a nā te ara ’ia fa’a’ite i tō rātou ’ite i te parau nō te ’upa’upa ’e te reo peretāne i te taime nō te mā’itira’a.

Te feiā tei mā’itihia nō te hīmene i roto i te pupu hīmene, nō roto mai ïa e ono fenua :

• Alvaro Jorge Martins nō Natal, Peretīria, marū piti

• Rodrigo Domaredzky nō Curitiba, Peretīria, marū piti

• Thalita De Carvalho nō Sao Paulo, Peretīria, reo teitei piti

• Tubo-Oreriba Joseph Elisaia nō Accra, Kana, marū teitei

• Jonathan How nō Kuala Lumpur, Maretia, marū teitei piti

• Denisse Elorza Avalos nō Tijuana, Mēhiko, reo teitei piti

• Georgina Montemayor Wong nō Monterrey, Mêhiko, reo teitei piti

• Ronald Baa nō Cagayan de Oro, Firipino, marū teitei

• Sundae Mae Indino nō Cagayan de Oro, Firipino, reo teitei mātāmua

• Pei-Shan Chung (Kylie Zhong) nō Taipei, Tāiuane, reo piti mātāmua

’Ua ’āmui atu te mau melo nā te ara i te mau ha’api’ipi’ira’a a te pupu hīmene, ’ua haere i te fare ha’api’ira’a hīmene, ’ua haere e mata’ita’i e rave rahi vāhi nō te ’ā’amu a te ’Ēkālesia, ’e ’ua haere e māta’ita’i i te Fare totauturu a te ’Ēkālesia, te vāhi nō Temple Square, ’e te Fare vaira’a tao’a rahi a te ’episekōpo.

I te hope’a o te ’āmuira’a rahi, ’ua hīmene te mau melo nō te pupu hīmene nō Utaha, « ’Ei te Atua tātou i teienei » i mua i terā nā ta’ata nā te ara ’ei arohara’a hope’a.

’Ua fa’a’ite te ’Ēpisekōpo fa’atere rahi ’o Gérald Caussé i tōna here ’e tōna māuruuru i teie nau ta’ata i ’āmui mai nā te ara. « Tē ti’aturi nei au ē, ’ia ho’i ’outou i tō ’outou fenua, e parau pāpū ’outou nō ni’a i teie ’ohipa tei tupu ’e e fa’atupu ’outou i te hō’ē u’i ’āpī feiā hīmene i te mau vāhi ato’a—nā te ao ato’a nei », tāna ïa parau.

’Ua tauturu teie nā hepetoma e piti i te mau ta’ata tei ’āmui mai ’ia ’ite i te hō’ē mana’o tū’atira’a rahi a’e ’e te hō’ēra’a i te autahira’a o te ’Ēkālesia. « ’Ua fa’aea maoro mātou i roto i te tuha’a fa’atere nō te pehe a te ’Ēkālesia. ’A fārerei ai au ia rātou, ’ua tupu mau te mana’o i roto iā’u ē, tē hina’aro nei te feiā fa’atere o te ’Ēkālesia ’ia tupu te tahi ’ohipa pae vārua hōhonu atu ā i roto i te feiā mo’a ’ati a’e te ao nei, nā roto i te hīmene », te parau ïa a Pei-Shan Chung.