Elder Alan T. Phillips

Mai tōna ’āpīra’a mai ā, ’ua mana’o ’o Elder Alan T. Phillips ē, e parau mau te ’Ēkālesia, ’ua ti’aturi rā ’oia i te hō’ē ’itera’a pāpū hau atu nōna iho, nō ni’a i te Fa’aora hou ’a haere ai e tāvini ’ei misiōnare rave tāmau.

« ’Ua ha’apae au i te mā’a, ’ua pure, ’ua haere i roto i te uru rā’au », tāna ïa parau. « Tē ’imi ra vau i te pāhonora’a rahi ».

I muri iho, i te hō’ē hepetoma ’ua reva tōna ’utuāfare nō te hō’ē fa’auera’a ’ohipa, ’ua haere ’oia i te purera’a ’oro’a ’oia ana’e iho.

’Aita vau i ’imi. Tei reira noa vau—ma te ineine nō te ’oro’a mo’a ’e te hīmene ’e te ’āmuira’a », tāna ïa parau. « Nō te taime mātāmua, te mau parau ’e te mana’o o ’tōna nā rima puta ’e te toto i tahe nō te ’aufau i te tārahu’¹ ’ua maiha mai te reira ’e ’ua tomo i roto i tō’u ’ā’au. ’Ua ’ite au i tōna vai-pāpū-ra’a nō ni’a iā’u, e ’ere fa’ahou i te hō’ē ferurira’a noa, e ’ere fa’ahou i te mea vai-mana’o noa. I taua taime ra, ’ua riro ’oia ’ei Fa’aora nō’u ».

I muri a’e ’ua pure ’o Elder Phillips, ma te ha’amāuruuru i te Metua i te Ao ra ’e ma te parau iāna ē, e ha’apa’o maita’i ’oia i te toe’a o tōna orara’a i teie ’ite ’āpī tā te Atua i horo’a iāna.

Terā ïa te taime mau a ha’apāpūhia ai i ni’a iāna te vaira’a mau o te Fa’aora. ’Ua parau ’oia ē, te mau mea ato’a i roto i tōna ’itera’a pāpū ’ua patuhia ïa i ni’a i te reira « niu pāpū » (Helamana 5:12).

’Ua fānauhia ’o Alan Thomas Phillips i Kent, Peretane, i te ’āva’e Tiunu 1970 ’e ’ua pa’ari i Buckinghamshire, Peretane. ’Ua fa’aipoipo ’oia ia Lindsey Iorg i te ’āva’e Tiurai 2005 i roto i te hiero nō Mesa Arizona. E maha tā rāua tamari’i ’e e melo nō te titi fa’ahiahia o te ’Ēkālesia nō Hyde Park i Lonedona.

’Ua roa’a ia Elder Phillips te parau tu’ite bachelor ’e te parau tu’ite master i te fare ha’api’ira’a nō Lonedona nō Te mau Terera’a Faufa’a ’e te Ihi Poritita. ’Ua rave ’oia i te ’ohipa nā te mau pupu e rave rahi i roto i te ’ohipa putura’a faufa’a, te moni ’e te ha’api’ira’a, e tae noa atu i nā matahiti e maha i ma’iri a’e nei ’ei ti’a fa’atere ha’api’ira’a nō te pû Brigham Young University nō Lonedona.

’Ua tāvini ’o Elder Phillips i te hō’ē misiōni rave tāmau i roto i te misiōni nō Manchester i Peretāne. ’Ua tāvini ato’a ’oia ’ei tauturu i roto i te peresidenira’a ārea nō Europa Apato’erau, ’ei hitu ’ahuru ārea, ’ei peresideni titi, ’ei tauturu i roto i te hō’ē peresidenira’a titi, ’ei melo āpo’ora’a teitei, ’e ’ei tauturu i roto i te hō’ē ’ēpisekōpora’a.