Savali Faaleautaitai i le Eria
Mauaina o le Faamaoniga O Lo’u Vala’auga E Auauna Atu
O se amataga fou mo a’u i le mavae ai lea o le 30 tausaga o auauna atu i galuega a le Ekalesia, ina ua ou malolo ritaea, ma ou iloaina ai le tele o le taimi ua i o’u lima. O le galue ai mo Le Ekalesia a Iesu Keriso o le Au Paia o Aso e Gata Ai o se avanoa faamanuiaina na matuā tele sona saofaga ia te a’u ma lo’u tagata ma a’u fuafuaga na fai pe a o’o mai le taimi ou te malolo ritaea ai.
O la’u faaiuga muamua na fai pe a ou malolo ritaea o lo’u alu lea e asiasi i la’u fanau tama e to’atolu o lo’o aumau i Iuta mo le ono masina. Ae mulimuli ona alu atu lea o lo’u to’alua ona o lo’o faigaluega pea o ia. Ia Oketopa 2019, a’o o’u i ai i Iuta, na ou alu ai i la’u konafesi aoao muamua. O se a’afiaga faaleagaga sili ona matagofie na ou maua talu ona ou auai i ni sauniga faaleEkalesia. O mea uma sa ou vaai i ai, faalogo i ai ma ou lagonaina i le nofoaga autu o le konafesi na faatumuina ai a’u i le agaga o le faafetai ma le alofa i le talalelei, ma mea uma lava na ou a’oa’oina i le Ekalesia, talu mai lo’u papatisoga i le tausaga e 1977.
Sa maligi o’u loimata a’o o’u usuina le pese faatasi ma le faalapotopotoga. Sa ou maofa i le vaaiga o le nonofo faatasi mai o perofeta ma aposetolo soifua e to’a 15 i luga o o latou nofoaga, faatasi ai ma isi ta’ita’i, ma le aufaipese a agelu o le Tapeneko i le nofoaga o le konafesi. Sa foliga mai o pesega a le faalapotopotoga na pei e alu a’e aga’i atu i le lagi, ma sa ou mana’o ia lagona atu ai ma lo’u leo faatasi ma le 23,000 afe o isi sa auai. E moni lava o se a’afiaga mamalu tele.
Ina ua faatasi atu lo’u to’alua i Iuta mulimuli ane, sa ma malaga ai e asia lona aiga i Kalefonia, ma o inā, na ou maua ai se valaau e le’i mafaufauina mai ia Peresitene Ian Adern, o le Peresitene o le Eria o le Pasefika. Sa ia fesili mai po’o afea ou te toe fo’i ai i Fiti ma ia faapea mai e fia feiloa’i ia te a’u i se taimi vave lava. Sa ou fai atu i ai ou te toe fo’i i Iuta i le vaiaso e soso’o ai, ma faapea mai ai Peresitene Arden o le a feso’ota’i mai ia te a’u.
E le’i lelei sa’u moe ina ua mae’a le valaau lena. Sa fesouaina lo’u mafaufau. O o’u lagona atoa mo le taimi na totoe o lena malaga na suia uma.
Na soso’o mai ma le vala’au mai o Elder Cook, o le Au Peresitene o Fitugafulu, ma malaga atu ai ma lo’u to’alua i le Ofisa Ogatotonu o le Ekalesia e feiloa’i ma ia. O se a’afiaga na maua ma le agaga maualalo ina ua vala’auina a’u e avea ma Fitugafulu Eria. E ui lava ina ou te le’i teenaina se valaauga i le 42 o tausaga o le avea o a’u ma tagata o le ekalesia, ae na ese ai lava le mea lea. Sa lofituina a’u i lagona o le lē atoatoa, sa ou lagona lo’u lē saunia. Na iloa mai e lo’u to’alua ma Elder Cook lo’u tagi sa lē mafai ona nanaina. Pe mo’i ea lea mea ua tupu?
I lou olaga atoa sa ou vaavaai atu aga’i i le Pulega Aoao ma ta’ita’i uma o le Ekalesia—o i latou na filifilia e le Atua ma faaaloalogia e le ekalesia aoao. O o’u valaauga se’ia o’o mai i le taimi lena, o valaauga faalelotoifale. Sa matuā leai so’u mafaufau o le a ou umia se valaauga faaleta’ita’i i le Eria.
Sa faigata ona ou taliaina le mea ua valaauina a’u e faia, ae na amata ona suisui malie o’u lagona i lo’u mafaia lea ona faatino le vala’auga, ma o’o mai ai lo’u agaga faafetai mo lo’u Faaola ona o Lona alofa ma Lona agalelei. Na ou lagonaina se u’unaiga amiotonu e auauna atu i le Ali’i e ala i lea vala’auga. O se avanoa lelei lea mo a’u e faaali atu ai lo’u alofa mo Ia ma lana Ekalesia. O le mau na tula’i malosi mai i lo’u mafaufau o le MFF 82:3, “Aua o ia o le ua tu’u atu iai mea e tele, e tele mea ua mana’omia mai ai.”
Na valaauina ma lagolagoina a’u i le konafesi aoao ia Aperila 2020, ma o se konafesi muamua lea ua faia e le Ekalesia i luga o upega tafa’ilagi. Ma sa faapena fo’i ona faia a’u a’oa’oga faamasani o se Fitugafulu Eria fou i luga o upega tafa’ilagi ona o le vaitaimi tonu lea o le malosi o le faama’i o le koviti. O lo’u tausaga muamua i le vala’auga o se vavega moni lava; o le lagolago na ou maua mai i le Au Peresitene o le Eria, ma o’u uso a Fitugafulu o le Eria, ma ta’ita’i aoao na asiasi, o se mea uiga ese. O le malaga atu e auai i konafesi faale-siteki ma auai i konafesi aoao o ni mea laualuga ia o le taimi nei, faatumuina e le tele o a’oa’oga matagofie ma se a’afiaga o le tuputupu a’e.
Ae peita’i, i le loloto i totonu ia te a’u, sa iai pea le lagona tauivi, aemaise lava i taimi ou te mafaufau loloto ai ia te a’u lava ia. Sa ou lagona pea le lē mautonu ma le lagona faatauva’a i lo’u valaauga o le Fitugafulu.
Sa tumau pea na lagona seia o’o lava i le vaega mulimuli o le a’oa’oga faa-ta’ita’i a le Pulega Aoao, Fitugafulu Eria ma ta’ita’i uma, i le konafesi aoao ia Aperila 2021, o ina na faato’a ou maua ai le molimau faaleagaga na ou sailia talu ona valaauina a’u. O le a lē galo ia te a’u lena taimi taua.
O le polokalama faatulagaina o lea sauniga na molimau uma ai Aposetolo ma Perofeta e to’a 15 ma molimau e uiga ia Iesu Keriso. O le mamalu ma le taualoa o lenei sauniga o se mea e ese lona faapaiaina. O le molimau a Elder Neil L. Andersen na suia atoa ai o’u manatu ma aumaia ai ia te a’u le faamautinoaina lea sa ou sailia.
Na faamatalaina e Elder Andersen se lagona na o’o ia te ia ina ua valaauina o ia i le Korama a Aposetolo e Toasefululua. Na ia faapea mai, i le taimi muamua na nofo ai i le nofoa, lea ua alala ai nei Elder Soares, sa ia tilotilo atu i le atu nofoa i isi Aposetolo e to’a sefulutasi ma le Au Peresitene Sili, ma lagona o le lē atoatoa o lona tagata na o’o mai ia te ia. Ina ua ou faalogo atu i le saunoaga lena a Elder Andersen, sa ou nofo sa’o i luga i lo’u nofoa ona ua ou iloa, o le mea lea sa ia talanoa mai ai—ma le isi ana saunoaga lea o le a soso’o ai—o lo’o faatatau sa’o mai lava ia te a’u.
Na faapea mai Elder Andersen, sa ia tauivi ma lea faafitauli mo sina taimi ma na toe fo’i mai: Na ia faalogoina le siufofofga o le Alii o faapea mai, “Neil, e te le’i tu’uina oe iina. O a’u na tu’uina oe iina ona ou te alofa ia te oe, ma e ou te iloa e mafai ona suia oe, ma e ou te iloa e mafai ona e fesoasoani mai i la’u galuega.”
Ina ua faasoa mai e Elder Andersen lena a’afiaga pa’ia, na avea fo’i ma se aafiaga pa’ia ia te a’u. O se faamaoniga lea sa ou mana’omia.
Ou te iloa e le’i valaauina a’u e le Tama Faalelagi ma Lona Alo ona o se mea na ou faia ou te agava’a ai mo lea tofiga, ae ona e alolofa ia te a’u. Na la silafia e mafai ona ou suia, ma na la silafiaina e mafai ona ou fesoasoani i le la galuega mamalu, ina ia aumaia le tino ola pea ma le ola e faavavau i ana fanau uma. (Tagai Mose 1:39.)