Saogalemu i Ona Aao

O ma’ua ma lo’u to’alua o Eddie Uele e to’atolu le ma fanau: Indie-Rose, Rollo, ma Kamaukiterangi (Kamau). Ia Ianuari 2022, na maliu faafuase’i ai le atali’i 2 tausaga o Kamau.

I le aoauli lena a’o matou ta’aalo ma toē ma le ma fanau i lo ma potumoe, na faafuase’i lava ona ma iloaina ua leai Kamau. I ni nai minute mulimuli ane, na maua atu ai Kamau o matapogia i tua o lo matou fale. Sa faatinoina e Eddie le fesoasoani muamua (CPR) se’ia o’o ina taunu’u atu le taavale a le falema’i a’o matou aioi atu i le Tama Faalelagi i Lana fesoasoani.

Sa faatopetope atu Kamau i le falema’i i le mea o lo’o faatalitali mai ai foma’i mo ia. Ina ua matou taunu’u, sa auina atu maua ma Eddie i se potu faapitoa ma mā nonofo ai i ni nai minute ma u’u mau e le isi le lima o le isi ma faaauau pea ona faia la ma tatalo. Na mulimuli ane savali mai se foma’i i totonu o le potu, nofo i o ma luma ma amata ona talanoa mai.

Sa le mafai ona ou lagonaina se upu sa ia talanoa mai ai ona o mea uma i lo’u siosiomaga i le taimi lea sa le toe lagona se mea ma filemu—ae na matuā manino e pei o le malamalama o le ao, ma ou vaai atu ai i la’u tama o taaalo mai i o’u luma i lana mea taaalo, ataata ma fiafia. O iinā na ou iloaina ai ua maliu si a’u tama. Na ou iloa ai fo’i iina, o le auala lea a le Tama Faalelagi e saunia ai a’u mo le mea o le a tupu.

Mulimuli ane i lena afiafi, na ou matuā malamalama moni ai lava i le taua faalelagi o lena taimi.

Na fusi atu a’u e si o’u tinā a’o ou tagi i ona lima, ona o le lē mafai ona talia le aveese atu faafuase’i o si a’u tama. Sa ia fesili mai ia te a’u, “Ua e ita i le Tama Faalelagi?” Sa ou tali atu, “E leai, ou te le o ita, ae ua Ia lē amanaia mai a’u, Tina, na ou talosaga atu ia te ia e aua le avea si a’u tama. Sa ou aioi atu i le Tama Faalelagi faamolemole e aua le avea si a’u tama. Ae peita’i e le’i amanaiaina mai a’u.”

Sa faapea mai lo’u tinā ia te a’u ma le alofa, “E le‘i lē amanaiaina oe e le Tama Faalelagi. Na ia lagona mai oe. Ua ia faia se vavega i le tatala lea o pupuni o le lagi ma faailoa mai ia te oe, o lo’o faatasi o Ia ma Kamau, ma o le a saogalemu Kamau i Ona aao e o’o i le faavavau.”

Mulimuli ane i lena tausaga, i le tatalaina o le malumalu i Hamilton New Zealand, mo maimoaga lautele, na ou lē mautonu ma popole. Sa ou fai atu i lo’u to’alua “Ou te lagona o lo’o faatali mai a’u e Kamau i totonu o le malumalu. Ou te lagona o le a ma faatasi ma ia i totonu.

I totonu o le malumalu, e tasi lava le potu sa ou naunau ou te fia vaai i ai, o le Potu Selesetila. A’o o’u faatalitali ou te ulufale atu, na faapea mai lē sa ta’iala i le matou vaega, “Ou te faamalulu atu o le a le tele so tatou taimi i le Potu Selesitila. Ae ou te folafola atu ia te outou uso e ma tuafafine, e ui lava o le a pu’upu’u le taimi, ae o faamanuiaga o le a outou maua, o le a lava ma totoe mo oe e o’o i le faavavau. Ma o le mea sili ona taua, o le a e lagonaina ai le alofa o lō tatou Faaola o Iesu Keriso.”

A’o matou sauni e ulufale i totonu, na tago mai si a’u tama teine o Indie-Rose ma u’u lo’u lima ma ia faapea mai ia te a’u ma le fiafia tele, “Tina, o le potu faapitoa lea na e faamatalaina mai ia te a’u?” Sa ou tali atu iai, “Ioe, o lea.” Ma sa ia toe fesili mai ia te a’u, “E faapea le vaaiga o le a i ai pe a tatou toe feiloa’i ma Kamau?” Sa ou tali atu “Ioe, o le a faapea, e pei lava o le tatou savavali atu ma tatou vaaia ai o ia.”

Sa maligi o’u loimata ina ua ou lagonaina le faataunu’uina o le folafolaga na talanoa mai le taiala ia i matou i le amataga. Sa mafai ona ou lagonaina le alofa mama o lo tatou Faaola o Iesu Keriso, o faamafanafana mai ia te a’u. Sa ou lagonaina fo’i upu na talanoa mai ai le ta’iala, e moni lava o se savali na faatatau tonu lava mo a’u mai lo’u Tama Faalelagi, ma faapea mai ia te a’u, e ui lava ina pu’upu’u lo’u taimi ma si au tama, ae o le alofa ma faamanuiaga mo ia, ua lava lea mo a’u se’ia o’o atu i le faavavau.

I potu uma o le Malumalu—o ata uma ma ona faamatalaga uma—sa mafai ona ou lagona ai le agaga o si a’u tama pele o Kamau. O se faamaoniga lena, e tatau ona ou sau i le malumalu. Sa faamanatu mai e le Tama Faalelagi ma Iesu Keriso ia te a’u le mafanafana faale-lagi ma le faamalologa pa’ia ou te maua i totonu o puipui o le malumalu ona o le mana lavea’i o le Togiola a lo tatou Faaola o Iesu Keriso.

E leai se taimi ua sili ai ona ou faatauaina ai le malumalu i lo’u olaga nai lo le taimi nei.