Saunia e Auai Atu i le Malumalu

Ata

o upu i fafo o le Malumalu o Durban Aferika i Saute

Ata pu’e o le Malumalu o Durban Aferika i Saute na pu’eina e Matthew Reier

O Le Maota o le Alii

O malumalu ua ta’ua o le “maota o le Alii.” O ni nofoaga paia ia e mafai ona tatou lagonaina ai le Agaga o le Atua ma Lona alofa mo i tatou. O nofoaga foi ia e mafai ona tatou osia ai feagaiga ma maua ai sauniga faapitoa ia o le a saunia ai i tatou ia maua le ola e faavavau. (O feagaiga o ni folafolaga paia i le va o le Atua ma Ana fanau.) O le faamaoni i a tatou feagaiga ma le mauaina o nei sauniga e fesoasoani tatou te maua ai se sootaga faapitoa ma le Tama Faalelagi ma Iesu Keriso.

Ata

o se talavou o loo tu i fafo o le Malumalu o Guayaquil Ekuatoa

Ata pu’e o le Malumalu o Guayaquil Ecuador na pu’eina e Jane Bingham

O Ai e Mafai Ona Auai i le Malumalu?

E mafai e tagata o le Ekalesia ona faia papatisoga mo e ua maliliu e amata atu i le tausaga e atoa i ai lo latou ta’i 12. E mafai e se tagata o le ekalesia ona maua le faaeega paia pe afai e lē itiiti ifo ma le 18 tausaga, ua tasi le tausaga talu ona avea ma se tagata o le Ekalesia, ma ua manao e osia ma tausia feagaiga o le malumalu (tagai Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 27.2.2, ChurchofJesusChrist.org). O se alii ma se tamaitai ua uma ona maua ō la’ua faaeega paia o le malumalu e mafai ona faamauina (faaipoipoina) mo le faavavau i le malumalu.

O le a e osia feagaiga ma maua sauniga i totonu o le malumalu. “O le ulu atu i se sootaga faalefeagaiga ma le Atua e noatia ai i tatou ia te Ia i se auala e faia ai mea uma e uiga i le olaga ia faigofie atu” (Russell M. Nelson, “Manumalo i le Lalolagi ma Maua le Malologa,” Liahona, Nov. 2022, 97). O se sauniga o se faatinoga paia faaletino e faia i le pule o le perisitua. O sauniga e i ai se uiga loloto faaleagaga. Mo se faataitaiga, pe a e auai i se sauniga, ua e faaali atu i le Atua ua e naunau e talia ma tausia Ana feagaiga.

Saunia faaleagaga e ala i le mulimuli i aoaoga a Iesu Keriso ma tausia feagaiga na e osia ma le Atua i le papatisoga. E mafai foi ona e suesue i punaoa a le Ekalesia, e pei o tusitusiga paia ma lauga o konafesi aoao. O leTemples.ChurchofJesusChrist.org ua tuuina atu ai faamatalaga e uiga i mea e faamoemoe i ai pe a e auai i le malumalu. O loo aofia ai foi isi faamatalaga auiliili e uiga i feagaiga o le malumalu, sauniga, ma faatusa.

Ata

o fafo o le Malumalu o Navu Ilinoi

Ata pu’e o le Malumalu o Navu Ilinoi saunia e Eve Tuft

Faafaatusa

E masani ona aoao mai le Alii e faaaoga ai faatusa. Mo se faataitaiga, o le papatisoga—o le alu i lalo o le vai ma toe tu a’e i luga—e pei lava o lou tagata tuai ua oti ma ua toefanauina lou tagata fou (tagai Roma 6:3–6). O sauniga o le malumalu e faasino atu ia Iesu Keriso ma Lana Togiola. Atonu e faigata ona malamalama i faafaatusa uma i le taimi muamua e te auai ai i le malumalu, ae e mafai ona faaauau pea ona e aoao a o e toe foi atu i le malumalu i lou olaga atoa.

Ina ia ulu atu i le malumalu, e tatau ona e saunia ma agavaa. E mafai ona e maua se pepa faataga e ulufale ai i le malumalu pe a maea se faatalanoaga ma lou epikopo po o le peresitene o le paranesi ma le peresitene o le siteki po o le misiona. O le a fai atu e nei taitai se seti o fesili ia mautinoa ai o loo e ola i le talalelei a Iesu Keriso. E mafai ona talanoa atu ou taitai ia te oe e uiga i nei fesili a o le’i taitai oo i le taimi.

E finagalo le Tama Faalelagi i Ana fanau uma ia osia feagaiga ma Ia ma maua sauniga paia. O nei sauniga, e pei o le papatisoga ma le faaeega paia, e tatau ona faia i malumalu mo i latou ua maliliu e aunoa ma le mauaina o le talalelei. E mafai ona e toe foi atu i le malumalu e fai sauniga mo tagata o lou aiga ua maliliu.