Lausakete [Fola] o le Laau Kerisimasi a Sarona

Ata

Lausakete [fola] o le laau Kerisimasi

Ata na tusia e Anastasia Suvorova

A o ma auai ma lo’u toalua i le kolisi ma mo le tele o tausaga mulimuli ane, sa utiuti mea tautupe mo i ma’ua. Nai lo le faatauina o ni meaalofa, sa ou gaosia i latou. I se tasi tausaga sa ou faia ai ni lausakete [fola] o laau Kerisimasi e avatu i o’u uso ma uso faaletulafono.

Sa ou aoina mai toega o fasi ie ma mea lanumeamata, lanumumu, ma paepa’e, po o se tuufaatasiga o na lanu. O le tele o ie sa le’i lolomiina i pule o le Kerisimasi. Sa ou otiina i ni faatafafā faigofie ma su’iina faatasi e fai ai lausakete [fola] o le laau. O lausakete [fola] taitasi sa i ai ni ituaiga ie eseese.

O le Kerisimasi o le tausaga lena, sa ma malaga atu ai i le fale o le aiga o lo’u toalua. Sa nofo latalata ane Sarona, o lo’u uso faaletulafono, o lea sa ma o ai e asiasi i lona aiga ma tuuina atu ā maua meaalofa.

I lo’u faanoanoa tele, i lalo o lana laau sa ou vaaia ai se lausakete [fola] sa matagofie le tuufaatasiga ma lalagaina ma sa faia i ie na mamanuina i le Kerisimasi ma e faafifififi ona pito. Sa talenia Sarona i le su’isu’i, fai ie so’oso’o, mamanuina, mamanu leise, lalaga, ma isi tomai. Sa ia faia le lausakete [fola] i le amataga o le tausaga lena.

Sa lē mafai ona ou tuua le faatusatusa o lana sakete matagofie o le laau i la’u lausakete [fola] faatauvaa. Sa ou matamuli e tuuina atu ia te ia. Sa ou fai atu ia te ia ou te malamalama pe afai na te lē manao e faaaogaina.

Ina ua tatala le ma meaalofa mai ia Sarona i le tausaga na sosoo ai, sa faateia i ma’ua i lona tuuina mai o le lausakete o le laau lea sa ou faamemelo i ai i le tausaga na muamua atu. Sa ia taliaina ma le agaga faafetai la’u meaalofa faatauvaa ma i’u ai ina ia tuuina mai ia i ma’ua se meaalofa e sili atu le manaia.

I le mavae ai o se tauiviga ma se gasegase faaletino mo le 12 tausaga, sa maliu Sarona ina ua na o le 38 ona tausaga. I ni nai tausaga ua te’a, a o o’u fofolaina lana lausakete o le laau Kerisimasi faataamilo i le matou laau ma mafaufau e uiga ia te ia, sa avea le lausakete o le laau ma faatusa o le meaalofa o le Togiola ua ofoina mai e le Faaola ia i tatou. Po o le a lava le lelei tatou te mananao ia i ai, o i tatou uma lava o tagata faaletino, e i ai faaletonu ma vaivaiga. Tatou te lē atoatoa, e pei o le lausakete [fola] faatauvaa o le laau sa ou tuuina atu ia Sarona.

Pe a faatusatusa atu i le matagofie o le soifuaga o le Faaola, o le a tatou lē atoatoa lava. Ae afai tatou te faia le mea sili tatou te mafaia e ofo atu ai i le Faaola se loto momomo ma se agaga salamo, o le a Ia ofoina mai ia i tatou faamanuiaga o Lana Togiola matagofie. Ua tatou maua se mea e sili atu nai lo la tatou meaalofa ia te Ia.

Ou te faafetai mo le faamanatu faapitoa o Lana Togiola ua faia e le lausakete o le laau mo au.