Ua Na’o Tusiga Faaeletonika
Sa Avea Simi ma a Matou Kerisimasi
E alala le tusitala i Iuta, ISA.
Ou te le’i vaai i le taua o le faia o lenei asiasiga i le Kerisimasi. Ae oka se aafiaga o lena mea!
Ao faasolo ina faaiuiu fiafiaga masani faaleaiga o le Vaeluaga o le Kerisimasi, sa ou lagonaina le lagona fiafia foi lea o le-tuai-na-oo-mai-le-taeao.
Sa valu o’u tausaga ma o le tamaitiiti aupito matua o fanau a fanau a lo’u aiga lautele toatele. O nai minute uma lava, e tatala ai e se matua, alii po o se tamaitai o le aiga le faitotoa ma alaga i le faalogoina o leo tau le lagona o logo. Sa tau le mafai ona ou faatali mo le taunuu mai o Santa! Ae sa tauanau pea e Tamamatua le alu muamua o pesepesega—o se tu masani faaleaiga. “O le a le sau lava Santa!” Sa ou mafaufau ai.
A o matou feosofi i totonu o a matou taavale sa ufitia i le aisa, sa matou iloa ai sa sili atu ona tuai nai lo le taimi sa masani ona matou o ese ai. O le nuu itiiti sa matou nonofo ai i Idaho sa matua filemu lava ma malulu. Sa popole nisi o tagata o le aiga e le tatau ona alu se matou pesepesega ua tuai, ae sa finau mai lo’u tamamatua e tatau ona matou e asiasi i ni fale se lua.
A o matou tietie atu i lalo o le tamai ituala, na ufitia i laau, sa le mafai ona matou vaaia se faaiteite o se malamalama i totonu o le tamai fale ogalaau e anaina e le “Toeaina o Simi.” O Simi o se uo lelei, ma sa ese le lotoalofa. Talu mai lava ona ou manatua, o ia o se tane ua maliu lana ava.
“E mautinoa lava o le a le popole Simi pe afai tatou te le afe atu!” O la’u tomumu lea. O le a misi moni lava i tatou e Santa Claus!
Ae sa finafinau pea lo‘u tamamatua lelei: “Tau lava o le potopoto filemu i tafatafa o le faamalama o le potumoe ma amata i le ‘Peteleema e, le Aai.’”
Sa lei seki lelei o matou leo i le taimi muamua, ae o le malosiaga e i ai lea i le numera toatele, ma sa le’i umi ae malena a’e le musika i se fati matagofie ma le ogatasi.
Ua sulugia ou ala
I le sulu e fa‘avavau.
O tausaga o fa‘amoemoe
Taulau i ā te oe.
Sa leai lava se malamalama i le fale o Simi, ae sa faaauau pea ona matou pepese.
Sa matala le faitotoa o le fale.
I le susulu o le masina, sa mafai ona matou vaaia loimata o tafe ifo i foliga o Simi. A o ia opoina i matou uma, sa tagi—sa matuai tagi lava. Ina ua mavae sina taimi, sa ia soloia loimata o le olioli mai ona foliga ma faimai ia i matou, “Sa ou faatalitali i le tausaga atoa mo outou tou te omai. O outou o la’u Kerisimasi. Ma ina ua oo le uati i le 9:30, sa ou manatu ua galo a’u. Sa matuai o’u le fiafia lava. Sa ou alu e moe, aua sa leai se mafuaaga e toe ala ai pea.”
Sa faatumulia o matou loto. A o avatu i matou e Simi i totonu o lona fale ma ki le moli, sa mafai ona matou iloa ai e moni lava sa ia faatalia mai i matou. Sa matagofie le setiina o lana laulau o le umukuka, ma sa i ai mea uma mai i le keke Kerisimasi ma kuki, i aano o manu malulu na tipi ma faatali mai matou te aai ai. Sa faitauina ma le faaeteete ipuinu ma faatumuina ma le alofa i le sua o apu suamalie, ina ia “le misi ai se tasi o outou,” na faaopoopo mai ai Simi.
Faimai Simi sa avea i matou ma ana Kerisimasi? Ae e leai. Sa avea Simi ma a matou [Kerisimasi].
O le meaalofa o le alofa sa matou mauaina i lena vaeluaga o le Kerisimasi malulu sa sili atu ona matagofie nai lo se isi lava mea na mafai ona tuua e Santa i lalo o la matou laau Kerisimasi. Ma o se faamanatu e finagalo le Alii ia tatou auauna atu i Ana fanau e pei ona Ia faia—taitoatasi, ma aumaia Lona alofa faatasi ma i tatou (tagai i le 3 Nifae 11:15–17; 17:21).