Ua Na’o Tusiga Faaeletonika: Autalavou Matutua
O Upumoni e 3 e uiga ia Iesu Keriso E Tulaga Ese i La Tatou Ekalesia
O o tatou talitonuga i le Faaola ma Lana talalelei toefuataiina ua faamalosia ai i tatou ia avea e faapei o Ia.
Keriso i Ketesemane, saunia e Heinrich Hofmann
Sa sailia e leoleo mamoe ma le au makoi lo latou Faaola, o Iesu Keriso, ina ua mavae Lona fanau mai. Sa vaai leoleo mamoe i se agelu, ma sa mulimuli atu le au makoi i se fetu (tagai i le Mataio 2:9–10; Luka 2:8–12).
O aso nei, e tele auala e mafai ona tatou aoao ai e uiga i le Faaola ma “o mai ai e ifo atu ia te ia” (Mataio 2:2).
I Le Ekalesia a Iesu Keriso o le Au Paia o Aso e Gata Ai, ua faamanuiaina i tatou ina ia aoaoina e perofeta soifua ma le Tusi a Mamona, e faaopoopo i le Tusi Paia, e uiga i lo tatou Togiola. O upumoni nei e tolu e uiga i le Faaola e tulaga ese i le Ekalesia.
1. E Ese Lona Peresona mai le Tama
A o faamatala atu Lana matafaioi o le Alo e Toatasi na Fanaua, sa fetalai Iesu, “O a’u nei ma le Tama e tasi lava i ma’ua” (Ioane 10:30). Ae o Au Paia o Aso e Gata Ai e iloa o le Tama ma le Alo e “tasi” i le faamoemoega, ae le tasi le tagata. Na tusia e Elder James E. Talmage (1862–1933) o le Korama a Aposetolo e Toasefululua: “I le uluai faa-Eleni o le ‘tasi’ o loo faaali mai i le itupa tupito, ma o lea ua faaalia ai le tasi i uiga, mana, po o le faamoemoega, ae le o se tasi o uiga patino lea semanu e manaomia ai le tulaga faatamatane.”1
A o le’i fetogia o ia i maa, sa vaai Setefano i “le Atalii o le tagata o loo tu i le itu taumatau o le Atua” (Galuega 7:56). O le Perofeta o Iosefa Samita “sa vaaia ni Tagata e toalua” i se faaaliga (Iosefa Samita—Talafaasolopito 1:17). Sa tatalo soo le Faaola lava Ia i Lona Tama.
O loo tatou tapuai pea i le Tama o lo tatou Atua ma faaaloalo i le Alo o le ao o le Ekalesia. Ae tatou te teena le talitonuga masani faaKerisiano o se “tolutasi e lotogatasi,” o se talitonuga na fetuunaia i le Aufono a Nicaea i le toeitiiti atoa le 300 tausaga ina ua mavae le Toetu o Keriso.2
2. Na te Faafesootaia i Tatou ma le Tama Faalelagi
Ona o le Pa’u o Atamu ma Eva, sa vavaeeseina ai i tatou mai le afioaga o le Atua (tagai i le Alema 42:7). Peitai, o le Togiola a lo tatou Faaola ua faafesootaia ai le va na fatuina e le solitulafono a Atamu ma toe faafoi atu ai i tatou i le afioaga o le Atua ina ia faamasinoina e tusa ai ma a tatou galuega (tagai i le 2 Nifae 2:5–10; Helamana 14:15-17). E mafai ona faamagaloina ma faamamaina i tatou mai pisia o a tatou lava agasala pe afai tatou te “faaaoga le toto togiola o Keriso” (Mosaea 4:2). Na fautua mai Keriso, “E tatau ai ona outou tatalo atu pea i le Tama i lo’u igoa” (3 Nifae 18:19), o lona uiga tatou te tatalo i lo tatou Tama Faalelagi e ala i le mana o le Faaola.
I le Ekalesia, tatou te osia feagaiga—maliega lea tatou te folafola atu ai e mulimuli i poloaiga ma ua folafola mai e le Tama Faalelagi e faamanuia i tatou. O le faataitaiga atoatoa a Keriso ua faaali mai ai ia i tatou le ala e faamamalu ai nei feagaiga ma faalatalata atili atu ai i le Atua. I la tatou feagaiga o le papatisoga, mo se faataitaiga, ua tatou folafola atu e “manatua pea o ia ma tausi i ana poloaiga …, ina ia [tatou] maua pea lona Agaga e faatasi ma i [tatou]” (Mataupu Faavae ma Feagaiga 20:77).
Na fetalai Iesu, “O a’u nei le ala, ma le upu moni, ma le ola: e le alu atu lava se tasi i le Tama, pe a le ui mai ia te a’u” (Ioane 14:6). O Ana poloaiga ma faataitaiga ua faaali mai ai ia i tatou po o ai e finagalo le Atua ia avea ai i tatou. O le matafaioi a Keriso i le avea ai ma Puluvaga e le faavaivaia ai lo tatou sootaga ma le Tama Faalelagi. Nai lo lena, ua faaali mai e lo tatou Puluvaga i ai tatou le ala e maua ai se sootaga malosi atu ma le Tama (tagai i le Mataupu Faavae ma Feagaiga 45:3–5).
3. Sa Togiola o Ia i luga o le Satauro ma i le Faatoaga
E toatele Kerisiano e manatu i le satauro o se faatusa aupito maualuga o le alofa e le muta o Keriso. Peitai, e le o se mea masani lenei i Kerisiano Au Paia o Aso e Gata Ai, aua “o la tatou faamamafa [ua] i ai i le vavega atoa o le misiona a Keriso.”3 O Lana Togiola “e aofia ai Lona puapuagatia i le Faatoaga o Ketesemane ma Lona puapuagatia ma le maliu i luga o le satauro, ma na faamutaina i Lona Toetu.”4
O nei mea e tolu na tutupu ua maua ai le atoaga o le taulaga togiola a lo tatou Togiola. I le Faatoaga o Ketesemane, sa Ia mafatia ai i “tiga ma puapuaga ma faaosoosoga” (Alema 7:11) e faataunuu ai le valoaga a Isaia o le a “manu’a o Ia ona o a tatou solitulafono” ma “ua momomo o ia ona o a tatou amio leaga” (Isaia 53:5).
Tatou te le amanaia le tiga o le oti faaletino i le satauro. Peitai, ua tatou iloa foi o le faamaligiina o le toto “e faamagalo a’i agasala” (Mataio 26:28) ma “faaumatia e ia le oti e faavavau” (Isaia 25:8) e ala i le Toetu e sili mamao atu nai lo le toilalo puupuu o le oti i lima o tagata agasala.
O Iesu Keriso O Le Ala
I le avea ai ma Au Paia o Aso e Gata Ai, tatou te le faaaogaina nei eseesega e vaai maualalo ai ia i latou o isi faatuatuaga; tatou te faaaloalogia o latou talitonuga, e pei lava ona tatou faamoemoe latou te faaaloalogia o tatou talitonuga. E mafai ona tatou vaai atu i o tatou talitonuga eseese ma le lotofaafetai mo upumoni faaopoopo “manino ma pele” (1 Nifae 13:34–35) ua tatou maua ai le faafetai i le talalelei toefuataiina, le Tusi a Mamona, ma afioga a le Alii lava Ia e ala mai i Ana perofeta ma aposetolo.
Afai e i ai se mea se tasi o o tatou talitonuga o se Au Paia o Aso e Gata Ai ua aoaoina ai i tatou, o le, e silafia patino i tatou e Iesu Keriso. E alofa o Ia ia i tatou taitoatasi. Tatou te iloa “o Ia o le malamalama, o le ola, ma le faamoemoega o le lalolagi. “O Lona ala o le auala e tau atu i le fiafia i lenei olaga ma le ola e faavavau i le lalolagi a sau.” I le taimi o le Kerisimasi—ma le tausaga atoa—e mafai moni lava ona tatou faapea atu, faatasi ai ma o tatou perofeta o aso nei, “Ia faafetaia le Atua mo le meaalofa lē mafaatusālia o Lona Alo paia.”5