O Lo’u Faaola o Mea Uma ia Ia te A’u

Sa masani ona ou vaai i faifeautalai faamisiona i le matou atunuu i Sierra Leone, ae ou te le’i masani ai ona sa ese o’u talitonuga. Mulimuli ane, ina ua ou feiloai ia i la’ua i se fale faatali pasi i Uosigitone, D.C., sa amata ona la’ua ta’u mai ia te a’u e uiga i le Faaola ma Lona alofa ia te a’u. Sa la’ua valaaulia a’u i le lotu, o lea sa ou alu ai.

O le mea muamua na ou iloa ai o le nofoaga lenei e tatau ona ou i ai o le faafeiloaiga mai a tagata o le Ekalesia. Sa fusi mau a’u e se tamaitai lea na ou lagonaina ai i lo’u mafaufau, “E talia oe iinei. E mafai ona e toe sau.” Sa ou fai atu, “Ua lelei.”

E oo mai le Agaga faatasi ma faifeautalai pe a la’ua ulu atu i lou fale, ma e la te tuua ai mo oe. E galue le Agaga ia te oe ma suia oe. O lo’u suiga na oo mai i le moni o mea na ta’u mai e faifeautalai ia te a’u ma le alofa sa ou lagonaina.

Na aoao mai faifeautalai e faapea e alofa le Tama Faalelagi ia te a’u, o a’u o Lona afafine, ma e finagalo o Ia ia faatasi aiga uma e faavavau. Sa masani ona ou talitonu afai e te oti, e eseese auala e te alu ai ma e tuueseese tagata uma. Ae i le Ekalesia, tatou te talitonu e te toe vaai i lou aiga. O lena mea na ootia ai lo’u loto. Sa ou manao i lena mea mo a’u, ma sa ou manao i lena mea mo lo’u aiga.

Sa tatau ona ou telefoni atu i la’u fanau e toatolu o loo i le aiga ma ta’u atu ia i latou. Sa ou manao e faasoa atu le alofa na faaali mai e Keriso ia te a’u.

“Sa ou feiloai i nisi o faifeautalai iinei,” sa ou fai atu ai ia i latou. “Sa la’ua aoaoina a’u i le mea lenei. Sa la’ua aoaoina a’u e faapea.” Sa ou fai atu ia i latou e ō e sailiili e uiga i le Ekalesia.

Ua i ai uma la’u fanau i le Ekalesia i le taimi nei, na papatisoina i Sierra Leone. Na manao foi le toatasi e alu i se misiona. O le agalelei lena o Keriso. Ua o mai foi isi tagata o le aiga i le Ekalesia, ae o nisi e mumusu. O loo o’u tuuina atu pea Keriso ia i latou.

Ata

O Umu Sesay o loo tu i luga o se auala savali

O Lou Aiga Fou

Ua ou misia la’u fanau, ma ua latou misia a’u. Ae sa ou ta’u atu ia i latou, “Ou te lē o i Sierra Leone, ae o loo i ai le Ekalesia iina. O le Ekalesia o lo’u aiga fou lea.” O loo tuputupu a’e Le Ekalesia a Iesu Keriso o le Au Paia o Aso e Gata Ai iina. Ina ua ou faalogo ua matou mauaina se malumalu i Sierra Leone, sa ou tu i luga ma osooso. E matuā filemu lava le malumalu. O le a avea ma fale aupito sili ona matagofie i le atunuu atoa.

Talu ona ou auai i le Ekalesia, ua matuā faamanuiaina ai lava a’u. Ua mafai ona ou faia ni mea i le taimi nei ou te le’i iloaina lava e mafai ona ou faia. Ua mafai ona ou taitaia musika. Ua mafai ona ou aoao atu tamaiti i le Peraimeri. Ou te alofa ia i latou, ma e alolofa foi i latou ia te a’u. Ua mafai ona ou pese i le aufaipese. Sa ou pese foi i le aufaipese i le taimi o le sauniga o le taeao o le Aso Sa o le faapaiaga o le Malumalu o Uosigitone D.C. ia Aokuso 2022. Ou te le’i manatu lava o le a ou i ai faatasi i le malumalu ma Peresitene Russell M. Nelson, ma pese mo ia. Ae sa tupu. Sa o se faamanuiaga matagofie le i ai faatasi ma le perofeta.

O se tasi o mau ou te fiafia lava i ai o le 2 Nifae 28:30: “Ou te tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o.” O le ala lena na aumai ai a’u e le Atua—o sina mea itiiti i sina mea itiiti.

Ou te lē malamalama i mea uma, ae o loo o’u aoao i aso uma. O aso uma lava e tuuina mai ai e le polokalama o le Potutusi o le Talalelei a le Ekalesia ia te a’u se mau. Ou te faitauina ma mafaufau loloto i ai ae ou te le’i alu i fafo. Ona ou tatalo lea i le Tamā Faalelagi. O le ala lena ou te ola ai i lo’u olaga, o le aoaoina o sina mea itiiti i taimi uma. O se faamanuiaga le iloa ai o le ala e tatau ona tatou ola ai, e tusa lava po o a o tatou tulaga, e tusa lava pe tatou te mauoa pe matitiva.

I le avea ai ma tagata soifua, o nisi taimi tatou te mananao ai e sē ese, ae afai tatou te faatagaina o Ia, e toe aumai i tatou e Iesu i lo tatou Tama Faalelagi. Ua Ia tuuina mai ia i tatou Lana talalelei i se auala faigofie. E fesoasoani o Ia ia i tatou i luga o le ala. Afai tatou te mulimuli ia te Ia, o le a lelei mea uma.

E ofoofogia Iesu. O Ia o mea uma ia te a’u. Ou te alofa ia te Ia. Na te faia ia ou lagona le alofaina ma le faatauaina, e pei o se afafine o le Tama Faalelagi. E mafai e Iesu ona suia oe pe a e latalata atu ia te Ia—o le ala e te tautala ai, o le ala e te faia ai mea, e oo lava i lau aganuu.

Ata

O Umu Sesay o loo ataata

Sa maua a’u e faifeautalai, ma sa ou taliaina Iesu i lo’u olaga. Ua ou fiafia na ou maua o Ia. Ua Ia faia a’u o se tagata fou. Ua mavae atu mea tuai. (Tagai 2 Korinito 5:17.)

Ou te lē iloa po o le a le mea o loo i le lumanai mo a’u. E silafia e le Tama Faalelagi lena mea. O la’u fuafuaga o le maua lea o le a’otauina atili ma faatutū ni sini i le Alii—ia faapei o Ia, savali e pei o Ia, talanoa e pei o Ia, ma latalata atili atu ia te Ia. O le ala lena e finagalo ai o Ia ia tatou avea ai.

Ou te tulimata’i atu e toe feiloai ia te Ia.