O Le Vavega o le Totini Lanumeamata o le Kerisimasi

Ata

o se totini lanumeamata o le Kerisimasi

Ia Fepuari a o tapena la’u fale taavale, sa ou filifili ai e foai atu se uta o mea teuteu o le Kerisimasi, talu ai ona ua matutua la’u fanau. Pe a ma le lua vaiaso talu ona momoli ese atu nei mea i se faleoloa o oloa ua faaaoga, sa ou ta’ua ai lea foai i la’u tama teine, o Kimi. Sa ia alaga mai, “Tina, ou te faamoemoe, o loo i ai pea ia oe la’u totini lanumeamata o le Kerisimasi?” Ma le faanoanoa, sa ou ta’u atu ia te ia na faatoa uma ona ou foaia ese!

Sa ou faia ni totini mo le ma fanau laiti e toaono e faaaoga ai fasi i’e momi manifinifi. Sa tusia o latou igoa i le siliva ilaila i le pito i luga. Sa naunau lava Kimi e manao i se totini lanumeamata o le Kerisimasi e ui lava ina mumu isi tagata uma. Ou te le’i iloaina ina ua mavae nei tausaga uma, sa taua lava lena mea ia te ia. Sa ou lagona le faanoanoa ona ua ou foaia ese lana totini, o lea sa ou filifili ai e valaau i le faleoloa e vaai pe mafai ona toe aumai ia te a’u.

Sa fesili mai Tara, le pule, pe sa tuu i totonu o se taavale siliva po o se taavale lanumoana. Ou te le’i iloa ona sa ave atu e se tagata faigaluega ia pusa ma taga mai tua o la’u taavale, ma ou te le’i gauai atu po o a taavale toso sa tuu i ai. Sa ia ta’u mai ia te a’u e tusa ma le selau taavale toso siliva ma le 68 taavale toso lanumoana ua tutumu tau i luga ma e le’i teuina i se faasologa patino! Na fai mai Tara, i tausaga uma sa faigaluega ai iina, na te le’i iloaina lava se tasi na maua se mea ina ua uma ona latou foaia sese atu. Ae o le a fiafia o ia ma te o e tilotilo i totonu o le potu e faavasega ai.

Sa ou tietie atu i le faleoloa ma se tatalo faifai pea i lo’u loto o le a fesoasoani mai le Tama Faalelagi ia te a’u e sue le totini lanumeamata o le Kerisimasi, ma faailoa atu o le a taua tele i la’u tama. Aua, ua poloaiina i tatou, ia “tagi atu ia te Ia i o outou fale, ioe, mo lo outou auaiga uma. … Ia tuu o outou loto ia faatumuina, ia tuuina atu pea ia te ia i le tatalo e le aunoa, mo lo outou manuia, ma le manuia foi o i latou o e ua siomia outou” (Alema 34:21–27).

E pei ona aoao mai Elder Juan A. Uceda o le Fitugafulu: “I lena lava taimi tatou te faapea atu ai, ‘Tama oi le Lagi,’ Na te faafofoga mai i a tatou tatalo ma e mafaufau ia i tatou ma o tatou manaoga. Ma o lea e fesootai mai ai Ona mata ma Ona taliga ia te oe i le taimi nei. … O le a Ia silasila mai ia te oe i fofoga o le alofa ma le alofa mutimutivale—le alofa ma le alofa mutimutivale lea e le mafai ona tatou malamalama atoatoa i ai. Ae e ia te Ia le alofa ma le alofa mutimutivale i le taimi lava e te faapea atu ai, ‘Tama oi le Lagi.’”¹

Sa amata ona ou tilotilo i aitema o le Kerisimasi i luga o fata i le vaega autu o le faleoloa, ae sa le’i i ai iina le totini. Sa ou feiloai ia Tara, ma sa ma savavali faatasi i totonu o le potu e faavasega ai oloa.

O fea e amata ai! A o ma savavali atu i le laina i le mavae ai o laina o taavale siliva o loo felavasai solo i o ma’ua luga, sa ou taumafai e vaai vave i mea o i totonu o taavale taitasi. Sa uu mai e Tara se taavale toso ma faataavale i luma ina ia mafai ona ou vaai i le itu o le taavale toso sa i ona autafa. Sa ou tilotilo i luga ma iloa vave se pusa pepa malo ma la’u tusilima i autafa (“moli eletise ma le maa fetuunai”). Sa tuu mai i lalo e le sikulati, ae o totonu sa na o le ogaumu Take lea sa ou foaia atu.

Sa ou savalivali taamilo i le taavale toso e tau atu i le isi itu. I luga o se isi pusa, sa ou vaaia ai le totini ie lanumeamata o le Kerisimasi o loo lala mai i fafo o se taga pepa iila paepae. I le maofa o tagata uma, sa matou mauaina le mea sa ou sailia!

Na fai mai Tara, “E tatau ona e pueina se ata mai le fogafale i luga ina ia mafai ai e Kimi ona vaai i le telē o le mea na faatoa tupu!”

Mai nofoaga uma sa ono mafai ona matou tilotilo i ai, sa tatou o sa’o lava i le mea na tatau ona tatou i ai. Atonu e fai mai ni isi o le ’laki”. Leai. “Faafuasei?” E leai. O se faamaoniga o loo i ai so tatou Tama Faalelagi agalelei ma agaalofa o lē e tali mai e oo lava i tatalo e sili ona le taua ae mai le loto e tusa ai ma Lona atamai ma le finagalo? E mautinoa lava! E ui e le o tatalo uma e tali vave mai pe i le ala sa tatou faamoemoe i ai, ae o se vavega lenei mo i matou i lena aso!

O lea la, o tausaga taitasi a o matou faamanatuina le soifua mai o lo tatou Faaola, e tautau i luga o le magalafu a Kimi o le a avea ma se faamanatu malū o le vavega o le totini lanumeamata o le Kerisimasi—o se faamaoniga o le alofa o le Tama Faalelagi mo Ana fanau.