O Oe Ea o Lo’u Tama?

Ata

meaalofa o le Kerisimasi ua afifiina

Ata na tusia e Anastasia Suvorova

I ni tausaga ua mavae, sa valaau mai ai lo’u atalii o Nelson ia te a’u i le Afiafi a o lumanai le Kerisimasi. O le vaiaso na muamua atu, sa talosagaina ai o ia e se loia e lē tautatala faaSipaniolo e auauna atu o se faamatala upu. O le tagata talosaga a le loia, o se toeaina matua e lē tautala faaPeretania, sa talosaga e [na te] tausia le fanau a lona afafine.

Ina ua mae’a le tolaulauga i le faamasinoga, sa faamanuia atu e Nelson le Kerisimasi i le tagata talosaga. Sa tali mai le tamaloa e faapea, o le Kerisimasi i lena tausaga o le a avea o se taimi faanoanoa. Sa tauivi o ia i mea tautupe e tausi ai lona aiga. E lē gata i lea, na faatoā maliu atu lona afafine e 29 tausaga le matua, ma tuua ai se fanau laiti e toalima, o le uii e na o le lua tausaga le matua. Sa i ai lo latou tamā i le falepuipui, o lea o le a tausi ai e le tagata talosaga ma lona toalua le fanau a le la tama teine.

I le ootia ai i le tulaga o le tamaloa, sa tonu ai ia Nelson ma le loia e lē totogia le la auaunaga. Ona fesili atu lea o Nelson mo igoa ma tausaga o tamaiti ma mo le tuatusi o le tamaloa.

I lena po, sa lē mafai ona moe Nelson a o mafaufau pe faapefea ona ia fesoasoani i le aiga. A o ia tootuli ma tatalo faatauanau e uiga ia i latou, sa ia lagona le musuia e tusi se tusi, e faamatalatala ai le tulaga o le aiga, faasoa atu igoa ma tausaga o tamaiti, ma talosagaina ni foai o meaalofa. O le aso na sosoo ai sa ia tufatufaina atu ai kopi o le tusi i faamasino, loia, ma isi tagata faigaluega i le falefaamasino.

Sa matuā maoa’e le tali mai lea na vave ona tumu ai le keli ma nofoa o lana taavale i meaalofa. O i latou sa leai se taimi e faatau ai ni meaalofa na foai atu ni tupe mo le aiga.

“Mama,” na fai atu ai Nelson, “e toatele tagata lelei i le lalolagi. Maimau pe ana mafai ona e vaai i le ala na latou tali mai ai! Sa ou talosagaina na o le tasi se meaalofa mo tamaiti taitoatasi, ae e tele isi meaalofa na foai mai.”

Na taunuu Nelson i le fale o le aiga i le Aso na sosoo ma le Kerisimasi. Sa matuai fiafia tamaiti a o latou fesoasoani ia te ia e la’u mai meaalofa mai lana taavale. Ua na o le lūlū o ulu o le latou tamāmatua ma tināmatua i le lē talitonu.

Ina ua saofai Nelson e malolo mo se minute a o le’i alu ese atu, sa alu atu le tamaitiiti e lua tausaga ma oso i luga o ona vae. Ona, pa’i atu lea ma le agaalofa i foliga o Nelson, ma fesili atu, “O oe ea o lo’u tama?”

O lena mea, sa tagi ai Nelson, faafetai ia i latou o ē sa fesoasoani e faafiafiaina le Kerisimasi a le aiga.

“Mama,” na ia fai atu ai, “e leai se olioli sili atu nai lo le auauna atu i isi. Ou te faafetai i le avea ai ma se meafaigaluega i aao o le Atua e faamanuia ai lenei aiga lelei.”

O le olioli o Nelson o se ātaāta lea o le aoaoga a le Faaola e faapea “e sili le manuia o le na te foai atu, i le manuia o le na te talia mai” (Galuega 20:35).