Kunea na Taucoko ni Bula ena vukui Jisu Karisito

Mai vei Michelle Dennis Christensen

Ena galala, madigi, kei na vakayaco veika vovou e mai kunei ni ra sa dui gole kece na gone, na cava na vuna au a sega ni vakila kina na lomavakacegu? Na cava a yali tiko?

iVakatakilakila

dodo tiko na liga ni iVakabula vua na tina ni gonetagane kaulotu, ka veitaratara tiko kei ira era na rawa ni lewena na Lotu

Droini mai vei Dilleen Marsh

E a tuturu na wainimataqu ni‘u masuta na vakacegu ena gauna e a vakalewena kina o luvequ tagane gone duadua na nona ivolakerekere ni kaulotu. Au a vinakata dina me lako i kaulotu. Au dina saraga. Au a tovolea tikoga me‘u vakadinata vakai au ni sa dina na ka oqo.

Au lomana na noqu iVakabula ka‘u a marautaka dina na madigi nei luvequ tagane me wasea na reki e rawa ni da kunea ena vuku i Jisu Karisito. Ia, mai vuniyaloqu au a sega ni vinakata me gole. Au a kila ni na sega ni lesu dina tale mai ki vale o koya ni oti na nona kaulotu. Kevaka mada ga e mai tiko e vale, ena sega ga ni tautauvata.

Era tukuna vei au na noqu itokani ni dau totoka na gauna era sa dui gole kina na gone. Keirau a marau kei na watiqu ka nanamaki ki na galala kei na madigi eso ka sega ni tiko vei keirau ena gauna keirau a susugi iratou cake tiko mai kina na luvei keirau.

Ena galala kunei-vou oqo, au a vakaogai au sara ena vuqa na itaviqaravi eso. Keirau dau veilakoyaki kei watiqu, vulica na taba oqani ena vuku ni noqu veikacivi, qito vata kei ira na makubuqu, ka vakayacora na cakacaka ni valetabu kei na tuvakawa.

Au a kunea na marau kei na yalo ni vakayaco veika vovou. Au a kunea na vakatoroicaketaki ni bula. Au a kunea na veika vakasakiti.

Ia e a yali tiko e dua na ka. E dua na ka a sega tiko ni tiko. Ni a biubiu o luvequ tagane, a kauta vata kei koya e dua na tiki ni noqu bula ka‘u na sega ni rawa ni vakaisosomitaka.

Ni oti e dua na yabaki ena nona biubiu o luvequ tagane, e a yaco mai vei au e dua na yalo ni vuturi ka tautauvata kei na yalo kece ni vuturi ka a dau tiko vei iratou na luvequ ni ratou a se gone. A raici au mai o watiqu ka kaya, “Michelle, ena gadrevi mo veiqaravi.” Au a vakaleweivola ki na dua na madigi ni veiqaravi.

Ia, a mosi tikoga na lomaqu. A dredre dina me‘u soli au yani ki na veiqaravi se ki na dua tale na cakacaka au gadrevi kina. Ena nodra sa mai gole kece na luvequ, au vakila ni vaka ena sega vakadua ni taucoko tale na noqu bula.

Ena dua na bogi ni‘u masuta na veivuke, a tukuna vei au na Yalo ni‘u masa tiko ni yali tiko e dua na ka—ni yali na inaki. Au nanuma ni‘u a sa walia na rarawa o ya ena noqu vakaogai au ena veitaviqaravi vakasakiti taucoko oqori.

Vakasaqarai ni iSaunitaro

Ni‘u a vakasaqara voli na isaunitaro, au a kunea na itukutuku oqo mai nai tukutuku makawa kei Josefa Simici: “ni da vakayalia [e dua na ka se dua na tamata] ka da dau vagolea kina na yaloda e dodonu me da na qaqarauni sara kina. … Na noda loloma e dodonu me vakagolei vakabibi vua na Kalou kei na Nona cakacaka, mai na noda vagolea vei ira na wekada.”¹

E dua na rarama e a curu basikata na o butobuto ka tabonaka tu na lomaqu. Au a tovolea me‘u vakatawana na qara titobu ni noqu rarawa ena veika eso, ena itaviqaravi, kei na veika sotavi—veiqaravi, loloma, vakataucokotaki ni taledi. Era vinaka taucoko, ia era a sega ni vakatawana na vanua lala voli e yaloqu. Era a sega ni veivakabulai me vaka na sala au a gadreva me vakakina.

Au qai kila ni mataqali vakacegu kei na veivakacegui vaka o ya e rawa ni lako duadua ga mai vua na iVakabula, o Jisu Karisito. E vakavuvulitaka ko Jisu, “Koi au na sala, kei na vu ni dina, kei na vu ni bula” (Joni 14:6). Ena Vukuna duadua ga eda na kunea kina na reki kei na taucoko kei na sautu kei na lomavakacegu. Na Same 16:11 e kaya, “Kemuni na vakatakila mai vei au na sala ni bula: sa ka uasivi dina na marau sa tu e matamuni.”

Au a Qai Veisau Vakacava

A sega ni veisau vakasauri na bula. A sega ni vakabulai vakasauri na yaloqu. Ia au kila na vanua a dodonu me‘u vakanamata kina me na yaco.

Au a veisautaki na noqu masu. Au a tekivu kerea na Tamada Vakalomalagi me vukei au me‘u tara cake e dua na veiwekani e kaukauwa cake kei na noqu iVakabula. Ni‘u yalolailai, au na vakananuma vei au ni o Jisu Karisito e tiko e kea me baleti au, ia ena loloma soliwale ni kaukauwa ni Nona veisorovaki, ena vukei au o Koya. Sa vakanamata vakalevu cake na noqu vulica na ivolanikalou ki na kena tarai cake e dua na veiwekani kei Koya. A taura na gauna, ia au a tomana tikoga na vagolei ni lomaqu, noqu igu, kei na noqu vakanananu vei Jisu Karisito.

Ni‘u vakayacora vakakina, sa tekivu me seyavu yani na butobuto loaloa. Au a kunea na marau levu ena veicakacaka lalai ni veiqaravi ka‘u taleitaka na veisiga yadua. Na rarama kei na inuinui e a vakararamataka na noqu sala ka vakatawana na lala ni lomaqu. Na vakaliuci ni iVakabula e a solia vei au na ibalebale titobu kei na marau ni veitiki kece ni noqu bula, mai na veiqaravi ki na tiko kei na matavuvale, mai na gade ki na vakatorocaketaki ni noqu taledi. E vutuniyau cake na bula ni kena usutu na Karisito.

Na ilakolako kece ni tamata ena gauna ni veiveisau ni bula e sega ni tautauvata. Ia, na iwali ni noda rarawa sa ikoya me da vaka io ki na kaci i Karisito ena Nona kaya, “Lako mai vei au ena lomamu taucoko, kau na vakabulai [iko]” (3 Nifai 18:32). Ena Vukuna ga eda na kunea kina na veivakabulai dina, vakacegu, loloma, kei na reki.

E vakaitikotiko na dauvolaivola e Utah, Amerika.