Na Walesi Donu ni Veitaratara

iVakatakilakila

waqavuka lalai kei na tawa ni veitaratara mai dakuna

Droini mai vei Roger Motzkus

Ena dua na yakavi donuya na noqu vuli tiko vaka kenadau ni veiqaravi ni vuka e macawa ena rara ni waqavuka e Tijuana, Mexico, keirau a raica kei noqu qasenivuli ni dua na kabu vavaku mai wasawasa esa ubia tu na rara ni waqavuka kei na dua na iwase levu ni siti. Ia, na yawa ni vanua e rawa ni laurai, e a tiko ena loma ni iyalayala e vakatarai me ra ro ka vuka kina na waqavuka.

Sega ni dede, keirau a raica ena reida e dua na waqavuka lailai na Cessna 172 mai na ceva ni vakamuri baravi mai, ka vuka tiko ena lawa ni vuka ena raica (VER). Ena lawa ni VER, o ira na pailate era na vakayagataka na ivakatakilakila eso e dela ni qele me ra yacova kina na vanua era vuka tiko kina.

E ka ni rarawa, ni mai yali na pailate ena kabu. Ni vuka wavoki voli e yasa ni baravi, a tovolea o koya me kila na vanua e tiko kina ni veidutaitaki kei na rara ni waqavuka, ia a vakataotaki na nona rai ena vuku ni kabu. Au a tarogi noqu qasenivuli se cava e rawa ni keirau cakava me keirau vukei koya kina.

“E na gadrevi vua me tiuni mai ki na walesi ni veitaratara kei na tawa me tarai kedaru kina,” a sauma mai. “Ke sega, e daru na sega ni cakava rawa e dua na ka me baleti koya.”

Au sega ni kila na vuna a sega ni veitaratara mai kina vei keirau na pailate ka yali tiko oqo. A leqa beka na nona retio? E a nanuma beka o koya ni rawa ni drovaka na veika rerevaki vakaikoya?

Sa sivi yani e vica na miniti. E muri, sa qai tiuni donu na pailate ki na walesi ni veitaratara kei na tawa. Ena domo ni lomaleqa, e a kere veivuke mai. Ena gauna vata ga oya keirau sa dusimaki koya sara mai ki na rara ni waqavuka. E dodonu me nuitaka na neirau idusidusi kei na nona iyaya ni vuka.

E a sega ni vakamacalataki rawa na neirau reki ena neirau raica ni sa botea mai na kabu na waqavuka ni oti e vica na miniti ka mai ro vakavinaka yani.

Ena ilakolako ki vale, au a vakasamataka vakatitobu na veika a sotava o pailate. Na nona kaci mai ena walesi ni veitaratara donu a yaco kina e dua na duidui ena nona rawata na veivuke mai na vuka wavoki voli—se e rawa ni yaco e dua na ke e ca sara.

Me vakataki pailate oqo, au dau mai yali ena so na gauna ena “dua na kabu ni butobuto” (1 Nifai 8:23). Ni‘u gadreva na veituberi ni Kalou, e dau wawa ena vosota o Koya me rogoca na domoqu.

Me vaka ga na noqu rawa ni raica na waqavuka ka yali tiko ena reida, sa raici keda vakakina na Tamada Vakalomalagi kei na noda vei bolebole eso. Au vakavinavinaka ni dau dusimaki keda o Koya. E dau vakarautaka o Koya na veivuke, ena masu, ena ivolanikalou, o ira na parofita bula, kei na isolisoli ni Yalo Tabu. Ena tuberi keda tani o Koya mai na veika rerevaki vakayago ka vakayalo, kevaka eda tiuni ki na walesi donu ni veitaratara, kerea na veidusimaki, ka vakarorogo ki na Domona.