“O au beka na dau ‘Toni’ se na dau ‘Nunu’?,” Liaona, Janu. 2024.
Lako Mai, Mo Muri Au
O au beka na dau “Toni” se na dau “Nunu”?
Ena tadra nei Liai me baleta na vunikau ni bula (raica na 1 Nifai 8), na cava na vuna o nanuma kina ni so na tamata era a biuta na vunikau ka so tale era a tiko ga e yasa ni vunikau me ra kania na vuana? Eso vei ira na tamata era kania na vuanikau era a lutu tani, era madua ni ra vakalialiai mai vei ira na tamata ena vale levu ka vakaitamera. E dua na duidui bibi vei ira na ilawalawa oqori sa ikoya na ka era a cakava ni bera ni ra yaco ki kea: na ivakarau ni nodra tautauri toka ki na ititoko kaukamea—oya na vosa ni Kalou.
Kukube se Tautauri Matua
A raici ira eso o Liai ni ra “sasaga tikoga ki liu … ka kukube matua tikoga ki na itautauri kaukamea” kei ira “era sasaga tikoga me ra toso ki liu ka taura matua tikoga na itautauri kaukamea” (1 Nifai 8:24, 30; vakabibitaki na ikuri).
A dikeva o Elder David A. Bednar ena Kuoramu ni iApositolo Le Tinikarua ni tolu na iwasewase e ratou a tekivu ena sala, ia e rua ga na iwasewase e rau a tautauri tokaga ki na itautauri kaukamea:
“[Na ikarua ni iwasewase] e tiko talega vei ira na kalougata ni ititoko kaukamea, ka ra sa vakukube toka kina! … Na vakukube ki na ititoko kaukamea e kena ibalebale vei au ni oqo na ‘kacabote’ vakagauna ni vuli se vakataratara tu ga vakagauna, ka sega ni vakavolivoliti koya ena vosa ni Kalou. …
“O ira na ikatolu ni wasewase era sasaga talega yani ena vakabauta kei na yalodina; ia, e sega ni vakaraitaki ni ra lakosese. … E rairai ni ikatolu ni iwase ni tamata oqo era cakava tikoga na wiliwili kei na vulici kei na vakasaqaqara ena ivolanikalou. … Oqo na ilawalawa e dodonu me daru saga me daru lewena.”1
Eda dau “Toni” se da dau “Nunu” ni da vulica na vosa ni Kalou? E dina ga ni rau na suasua ruarua o koya e toni kei koya e nunu, ia o ira era nunu ena dei ka duatani na veika era na vakila ka rawa ni na kauta tikoga mai na marau.