Na Noda iSolisoli Uasivi Duadua

iVakatakilakila

lomanibai ni valetabu

Rauta ni rua na macawa ni bera na vakatabui tale ni Valetabu e Washington D.C. ena Okosita ni 2022, keirau a raica kei noqu boso ni dua na vunikau ena sala ki na valetabu ni a rairai tauviame tu. E a sega tu na drauna e loma ka so na tabana e a rairai gogo tu.

Me vaka ni‘u ivakatawa ni lomanibai, au a kauwai ni sa vakarau tu na rara totoka ni valetabu vakavo ga na vanua lailai oya. Na vunikau e a tiko e yasa ni ivurevure ni wai volekata na icurucuru ki na valetabu.

E a tubu voleka toka e dua na vunikau bulabula, ka keirau veitalanoataka na kena rawa ni sosomitaki na vunikau tauvimate mai na kena ka bulabula. Ia taumada keirau na kauta tani na sala kei na co ka qai tosoya na isuisui ni wai kei na wa vakalivaliva ka dodo tu ena iwase ni vanua oya. Na noqu rere levu duadua sa ikoya ni kevaka keirau na cavuta tani na vunikau tauvimate, tea kina na kena isosomi, e sa na lailai na gauna me vakavinakataki kina na vanua e wavolita na vunikau me vakarau tu ki na vakatabui tale ni valetabu.

Ni‘u tukuna vei watiqu, o Carolyn, ni keirau na tosoya na vunikau, a sauma o koya: “Samaka laivi ga na tabana gogo, au na qai kerei ira na taciqu keimami dau vulica vata na ivolanikalou me keimami masulaka. Na lomanibai ni valetabu sa nona na Turaga. Ena vakalougatataka o Koya na vunikau.”

E tiko e dua na ilawalawa itokani nei Carolyn ka vakatokai ira o koya me ra tacina-ni vuli-ivolanikalou—era lewe ni Lotu ka ra a dau lewe tu ni tabanalevu oya. Era dau vulica vata na Lako Mai, Mo Muri Au me yacova ni ra sa toki taucoko, ia era dau veitaratara tikoga. Ni gadrevi na veimasulaki, era na veiqiriti vakai ira.

Ni tukuna oti vei ira o Carolyn me baleta na vunikau tauvimate, era a tukuna vei ira na luvedra kei na lewe ni matavuvale tale eso. A sega ni kila o Carolyn se lewe vica era a masulaka na vunikau, ia a vakabauta ni na rogoca na Tamada Vakalomalagi na nodra masu.

Ena loma ga ni vica ga na siga, sa solia tale mai na vunikau na drauna vou, ka ra vakatawana na vanua a lala tu. “E dina sa totoka mai na kena irairai,” a kaya o Carolyn. A vakauta na itaba ni vunikau vei ira na tacina-ni-vuli-ivolanikalou, ka tukuna vei ira, “Raica na sala a saumi keda kina na Turaga!”

Au kila ni ra a masulaka tiko na vunikau na tamata, ka‘u a sega sara ni kurabui kina. Au a kila talega ni o Peresitedi Russell M. Nelson ena vakarau vakalougatataka na valetabu kei na kena lomanibai ena gauna ni nona masu ni veivakatabui. Ena vinaka na vunikau.

Keirau vakavinavinaka ni a rokova na Turaga na neirau isolisoli kei na vakabauta.