“Na Noqu iYau Levu Duadua,” Liaona, Janu. 2024.
Domodra na Yalododonu Edaidai
Noqu iYau Talei Cecere Duadua
Na noqu vakalecaleca me‘u dua na Yalododonu Edaidai e a tuberi au sara me‘u papitaiso ka sotava e dua na bula vou ena kosipeli i Jisu Karisito.
Droini mai vei Ben Simonsen
Na noqu cakacaka vaka daunivakasasaqa e a tiki bibi ni noqu bula. Au wavokita na vuravura ena vakasasaqa ena vei otela lelevu kei na waqa ni saravanua. Au a lewena e dua na timi ni dauvakasasaqa rogo ka rawati e vuqa na icocovi ni veisisivi ni vakasasaqa e vuravura.
Ena dua na gauna, au a tu tani tu mai vale me tolu na yabaki. E dau qiriti au mai o tinaqu ena matatagitagi ka tukuna vei au me‘u lesu ki vale.
Ena dua na siga mai Milan, Itali, au a konitaraki tiko kina me‘u vakasasaqa ena dua na otela, au a sotavi rau kina na daukaulotu ena dua na ikelekele ni sitima ni vanua osososo. E rau a wasea vei au na veika me baleta Na Lotu i Jisu Karisito ni Yalododonu Edaidai kei na so na ivakavuvuli ni kosipeli. Au taleitaka vakabibi na veika e rau a vakavulica vei au me baleta na matavuvale.
Rau a solia vei au na daukaulotu e dua na iVola i Momani ka kerei au me‘u masulaka. E rau a solia talega vei au e dua na ivolalobi ni idusidusi ni ivakarau ni masu.
Au a lesu ki na noqu otela ena marau, gole ki na noqu rumu, masu, ka tekivu me‘u wiliwili. Na levu ga ni noqu wilika na iVola i Momani, na levu ni noqu gadreva me‘u wilika tikoga. E ka ni rarawa, ni noqu cakacaka e a vakadredretaka na noqu raici rau tale na daukaulotu. Ni sa mai cava na noqu konitaraki ena otela, au a lesu i vale ki Bari, ka‘u tekivu vakasasaqa ena dua tale na otela.
Dua na siga ena vale ni kana ni otela, e dua tale na dauvakasasaqa e a saga me veibuku kei na so na yalewa cakacaka e kea, ena so na inaki cala. E a cudru o koya baleta ni o ira na yalewa, ka ra Yalododonu Edaidai, era a sega ni via lako vata kei koya.
Ni‘u nanumi rau na daukaulotu keitou a sota mai Milan, au tukuna vua na dauvakasasaqa ni sa tu na dodonu vei iratou na yalewa me ratou vakasuka na nona kerekere.
“O iko beka e dua talega na Momani?” a taroga.
Baleta ni‘u taleitaka na ivakavuvuli rau a vakatavulica vei au na daukaulotu ka baleta ni‘u kila ni donu na noqu totaki iratou na yalewa, au sauma, “Io.”
Ena gauna a raici iratou tale kina na yalewa o daunivakasasaqa, e a tukuna vei iratou ni‘u Yalododonu Edaidai. E ratou a marau sara ga. Ena gauna ni vakasigalevu, e ratou a tekivu tarogi au me baleta na Lotu mai Milan. Au a tukuna vei iratou me baleta na siti kau a sotavi rau talega kina e kea na daukaulotu. Ena gauna ni neitou vakasigalevu, au a taura mai e dua na bilo waini ena teveli.
“Na cava o cakava, o gunu waini tiko? a taroga e dua vei iratou na yalewa.
“E dua beka na kena leqa?” Au a kaya.
“O bulabula tiko ena lotu?” a taroga yani e dua tale.
“Baleta na cava?” Au a kaya.
“O a vakaisulu cava ena siga o a papitaiso kina?” e rautou taroga.
“Au sega ni nanuma rawa,” au kaya vei iratou. “Au a se qai vula dua ga.”
E ratou a cudru vakalevu baleta ni ratou nanuma ni‘u veiwalitaki iratou tiko. Au vakadeitaka vei iratou ni sega. Au sa qai vakadodonutaka ni‘u sega ni lewe ni Lotu, ia au tukuna vei iratou ni‘u taleitaka na iVola i Momani kei na ivakavuvuli ni kosipeli au sa vulica. Au a qai taroga se na rawa vakacava me‘u vulica eso tale na ka me baleta na nodratou lotu.
Vakalailai ga e ratou sa vakaveikilaitaki au sara na yalewa vei rau na daukaulotu. A dredre me ratou vakabauta ni‘u a vakacavara na lesoni ka papitaiso sara.
iTaba ni matavuvale lolomataki mai vei dauvolaivola
E a veisau na noqu bula ni‘u sa papitaiso. Au vulica ni sega ni rawa ni dua na yavamu e vuravura ka dua na yavamu ena kosipeli. Au vulica ni cakacaka e sega ni ka bibi duadua ena bula oqo. Au vulica ni Turaga kei na noqu matavuvale e ratou liu. Kena itinitini, au sa qai kila na rarawa a vakila o tinaqu ena gauna ni noqu yali voli, ka‘u a kerei koya me vosoti au.
Au sa mai tinia yani na noqu veilakoyaki voli e vuravura, au a vakamau ena Valetabu e Bern Switzerland, tekivuna e dua na matavuvale, ka cakacaka vaka daunivakasasaqa ena dua na valenibula e noqu vanua, ka vakayagataka na noqu taledi me‘u vukei ira na tauvimate me ra vakabulai. Ia oqo au sa liutaka tiko na tabana ni veivakacakacakataki e valenibula. Na noqu cakacaka e noqu vanua e solia vei au na gauna me‘u vakanamata kina ki na noqu matavuvale kei na veikacivi ni Lotu.
Mai na siga au a lako kina ki valetabu ka ciqoma na noqu edaumeni ni oti e rua na yabaki mai na noqu papitaiso, au taleitaka na bibi ni valetabu kei na cakacaka e kea. Ni mate o tamaqu ni oti e va na yabaki ki muri, au a rarawa dina. Au dau raici koya cake tu. Au vakavinavinaka ki na kosipeli i Jisu Karisito, au kila ni se bula tiko o koya.
Ni‘u curu yani ki na rumu vakasilesitieli ni‘u vakayacora oti na cakacaka ni veisosomitaki nei tamaqu, au a vakila na nona imoko. Ena gauna o ya, au kila ni sa ciqoma o tamaqu na kosipeli kei na loloma ni Turaga vei ira na Luvena.
Sa noda na Yalododonu Edaidai na veivakalougatataki me da kila na kosipeli dina. Au vakavinavinakataka na kena veisautaka na noqu bula. Na kosipeli sa ikoya na vanua au kunea kina na marau dina. Na kosipeli kei na noqu matavuvale sa noqu iyau talei cecere duadua.