“Na Cava e a Sega ni Veisautaka Kina na Noqu Bula na Kalou?,” Liaona, Janu. 2024.
iTabagone Qase Cake
Na Cava e a Sega ni Veisautaka Kina na Noqu Bula na Kalou?
Ni yaco na noqu vakamau me sa ca mai, au a vulica na kena kaukauwa na galala ni digidigi.
Ni‘u a yabaki 23, au a vauci ena valetabu vua na tagane ka a dau lewe tu ni noqu tadra. Au sega ni nanuma rawa e dua na siga marautaki vakalevu vei au ena noqu bula taucoko me vaka na siga oya.
Ia na veika kece au dau namaka tu me baleta na noqu bula sa tekivu me kasere vakatotolo sara. Sa tubu cake tikoga na nona dau vakalololomataki au vakayago ka vakayalo talega na watiqu.
Au a vakila na veilecayaki kei na mosi. Au sega ni kila se cava na vuna e a sega ni yaco kina e dua na veisau ki na noqu bula vakawati mai na noqu yalodina. Au a veiqaravi vakadaukaulotu tudei, au a maroroya na noqu veiyalayalati, au a muria na ivakaro, ka veiqaravi sara mada ga vaka-liga ni cakacaka ni valetabu. Ia se mani vakacava na levu ni noqu saga me‘u toro voleka vei Jisu Karisito, na noqu vakawati sa qai yaco me dredre ga mai.
Ni‘u railesu, au qai kila ni dina ga ni au a vakasamataka ena masumasu me‘u vakamautaka na watiqu ka vakabauta ni rawa ni keirau na vakameautaka na leqa ena basika, ia au a vakawalena na ivakatakilakila ni leqa a tiko, ka qai basika e muri ena neirau bula vakawati.
Kunei ni iSaunitaro
Ni oti e lima na yabaki ni galili kei na bula vakalolomataki, na noqu veiwekani kei na Tamada Vakalomalagi kei Jisu Karisito e a sa tekivu vakaleqai tiko mai. Na veika au a namaka me baleta na noqu bula e a vakasesei ka sega ni yaco.
Au a vakila ni‘u sa kavoro.
Ena gauna e matata kina ni sega ni via veisau o watiqu, au sa tekivu kerea vua na Kalou me sereki au mai na kequ ituvaki se me vakaraitaka vei au na sala dodonu me‘u muria. Ia ni ra sega ni yaco mai na isaunitaro au a gadreva, au sa tekivu beitaka na Tamada Vakalomalagi ni sa iKoya e a vakavuna na noqu mosi.
Au a lako tikoga ki lotu ka maroroya na noqu veiyalayalati, ia a vakasinaiti tu na yaloqu ena yaloca ni sega na veidusimaki.
Ia ena dua na siga au a qai kila ni a tu ga vei au na isaunitaro me baleta na noqu ituvaki—oya me‘u na vakayagataka na noqu galala ni digidigi me‘u cakacakataka ka veisautaka kina na noqu ituvaki. Ka‘u a kila tu na vakatulewa cava ena vinaka duadua vei au me salavata kei na icavacava ni noqu inakinaki ni lesu vua na Tamada Vakalomalagi.
Au sa mani nanuma me‘u kalawa yani ki liu: au a vosa vei watiqu, ka a veivakurabuitaki, na neirau tinia na neirau vakawati ena duavata.
Na Kaukauwa ni Digidigi
Na veika dredre oqo a vukei au me‘u vulica na kaukauwa kei na bibi ni isolisoli va-Kalou ni galala ni digidigi.
E a vakavuvulitaka o Peresitedi Dallin H. Oaks, na iMatai ni Daunivakasala ena Mataveiliutaki Taumada: “Ni da rai lesu, eda rawa ni raica na duidui levu e sa cakava ki na noda bula na noda digidigi eso. Eda na digidigi ka vakatulewa vakavinaka cake kevaka eda raica na veidigidigi eso ka vakasamataka vagumatua se era na veimuataki ki vei. Ni caka vakakina, eda na muria na ivakasala nei Peresitedi Russell M. Nelson me da tekivu vakasamataka tu na icavacava. Vei keda, na icavacava sa ikoya na tiko ga ena salatu ni veiyalayalati ni valetabu ki na bula tawamudu, na isolisoli uasivi vakataucoko ni Kalou.”1
Au qai kila ni Tamada Vakalomalagi ena sega ni vakasugusugu ki na nona galala ni digidigi e dua—a vakatara o Koya me‘u cakava na noqu vakatulewa ga vakai au ena noqu vakamautaki watiqu. Ena sega talega ni vakasaurarataki watiqu me veisau, dina ga ni‘u a maroroya tiko na noqu veiyalayalati, baleta ni vakamau tawamudu e taura na sasaga vakayalo ka vakayago talega mai vei rau ruarua ni rau muri Jisu Karisito.
Ni da sotava na dredre, sa rawa ni da vakayagataka na noda galala ni digidigi me veisautaka na noda rai, noda itovo, kei keda sara mada ga. Oqori na isolisoli va-kalou ni galala ni digidigi. E vinakata na Tamada Vakalomalagi me da vakasaqarai Koya kei na Yalo ka qai nuitaki keda me da cakava na vakatulewa vinaka duadua me baleta na noda bula.
Rai vua na iVakabula
Taumada au a namaka me‘u vakabulai ka toso tani vakatotolo mai na noqu vakalolomataki, ia na kena yaco esa berabera sara ka dredre. Mai na veivakasala eso ni bula, vakarorogo ki na nodra itukutuku na parofita, wili ivolanikalou, masu, ka vakila na loloma kei na veitokoni mai vei ira na itokani kei na matavuvale, au vakanuinui ni na vinaka cake na veisiga i mataka. Ni‘u vakayagataka na noqu galala ni digidigi me‘u kunea na veivakabulai, au rai ki liu ka namaka e dua na bula e tiko kina na veivosoti kei na veimaliwai totoka kei ira na tani, ka vakakina kei na iVakabula.
Ni vakalevutaki na noqu kila vakavinaka na kena vakayagataki na galala ni digidigi ena noqu bula, sa vuki na noqu rarawataka na Kalou ki na kila-ka, ka rawa ni vakabulai na noqu veiwekani kei Koya.
Oqo dina na ibalebale ni kosipeli—me da digitaka vakai keda me da lako mai vei Karisito, bulataka na ivakasala mai vei ira na parofita ka ra vakauqeti keda me da vakayagataka na noda galala ni digidigi me da vakararavi vua na Turaga, ka tara cake e dua na bula totoka, sinai ena vakabauta.
Me vaka a vakatavulica o Sister Camille N. Johnson, na Peresitedi Raraba ni iSoqosoqo ni Veivukei: “ Na ivakavuvuli cecere ni bula galala, sa dina sara, e vakatara me da vola ga na keda italanoa. … Ia sa tu vakarau o Jisu Karisito me vakayagataki keda me da iyaya ni cakacaka vakalou … me vola na italanoa naba dua … [ke da] vakabauta me da laiva Vua, me na vola na [keda] italanoa.2
Na noqu tinia na noqu bula vakawati e a dua vei ira na gauna mosimosi duadua au se qai bau sotava. Ia au sa vulica ni gauna eda sotava kina na veivakatovolei sega ni namaki ni bula, sa rawa ni da vakasaqara na veidusimaki vakayalo ka cakava na digidigi ka na tosoi keda ki liu ena salatu ni veiyalayalati. Ena noda muria na Tamada Vakalomalagi kei Jisu Karisito, sa rawa ni da na dau nuitaka tikoga me yaco mai na veika vinaka kei na Nodrau veivakalougatataki yalataki ni vakacegu kei na reki.
E vakaitikotiko mai Chile o dauvolaivola.