Na Rawai ni Veilecayaki Vakayalo—Na Cava Me‘u Cakava Ena Gauna Oqo?

Ena gauna oqo ni‘u sega tiko ni kila na cava tale me‘u cakava se na cava me‘u namaka, au raica rawa na sala e dau rawarawa kina na kena vakaliuci na veivakagoleitani ni vuravura, mai na veika vakayalo. E kaya kina o Sister Rebecca L. Craven, iKarua ni Daunivakasala ena Mataveiliutaki Raraba ni Goneyalewa, “Sa sinai tu ko vuravura ena veika dauveivagolei tani ka rawa ni vakacalai ira sara mada ga na digitaki, ka vakavuna me ra vakawalena na bulataki ni nodra veiyalayalati.”¹

Au sa raici ira eso tale na itabagone qase cake era sotava tiko na dredre ni nodra ivakadinadina ni ra lesu mai na kaulotu. Au sa raica talega eso ni gauna era dau rawata kina na nodra tatadra me vaka na tauri ivola ena univesiti se vakamau, era qai dau vakasesei mai na veika e bibi duadua ni ra sega ni vakatara na kosipeli i Jisu Karisito me dua na nona tikina ena nodra ivakarau vou ni bula.

Au sa sotava oti talega na veigauna vinaka kei na veigauna ca vakayalo. Sa dau dredre ena so na gauna me tiko na veivakauqeti ka sagai me kua na vucesa ni vakasamataki na itovo vakayalo, vakabibi ni so na veivakalougataki era sega ni yaco mai ena gauna au namaka kina. Au dau vinakata tu ga me‘u toso ka torocake—au sega ni vinakata me‘u tu vakadua vakayalo. Ia ena so na gauna au vakila ni‘u vakamumuri tu ga ka sega tu na inaki.

Ia, ni‘u solia na gauna vua na Tamada Vakalomalagi kei Jisu Karisito e veisiga, vakabibi ena veisala lalai ka rawarawa (raica na Alama 37:6), au vakila na veivakacegui kei na veivakataudeitaki e kauta mai vei au na Nona kosipeli, ena gauna mada ga e yavavala tu kina ko vuravura.

O Peresitedi Russell M. Nelson e kaya: “Au vakamasuti kemuni mo ni laiva me qaqa tikoga na Kalou ena nomuni bula. Solia vei Koya e dua na iwase veirauti ni nomu gauna. Ni o kitaka vakakina, sarava na ka ena yaco ki na nomu vinaka vakayalo.”² Ni‘u nakita me‘u digitaka me‘u vakabauti Jisu Karisito e veisiga ka vakanamata ki na vei itovo vakayalo ka ra semati au vei Koya, au dau nanuma lesu na noqu veigauna bibi vakayalo ka‘u vakila ni vakavoutaki tale na inaki, na vakanuinui me baleta na siga ni mataka, kei na vakabauta.

E dua tale na gauna au a vakila kina na veilecayaki o ya ena iotioti ni noqu yabaki ena univesiti. E a dredre na bula. A donuya tiko na gauna ni matedewa levu, au a lomabibi sara ni‘u tao tu e vale ni‘u vakaotia tiko na kalasi. E a sega tu ni matata na ilakolako kei na veika veisemati ena noqu bula.

Au a sotava tale tikoga na dredre ena lotu ena gauna oqo. E vakavuqa au a dau duri ga mai na noqui davodavo ni‘u se daramaka tu ga na noqu isulu ni moce me‘u vakarorogo ki na lotu ni sakaramede ena initaneti baleta ni o ya sara ga na qavuni veivakauqeti e a tu vei au.

Ena gauna butobuto oqo, au a dolele yani vei iratou na noqu matavuvale kei na itokani ka vakamacalataka vei iratou na noqu veilecayaki kei na lomabibi. Au a vakila ni sa sega na ka me‘u vakanuinui kina me baleta na veisiga ni mataka ka‘u a sega ni kila se cava ena yaco. Oqori na gauna e ratou a tukuna kina vei au ni ratou sa masulaki au tiko ka tokoni au, dina ga ni ratou tu yani vakayawa.

Ni‘u dolele yani vei ira na noqu daulomani ka titobu tu na nodratou vakabauta ka‘u masu vua na Tamada Vakalomalagi ena veivakauqeti lailai ka tu vei au, au a vakila na veitokoni kei na loloma.

Au raica ni gauna au dau vakanamata vakatabakidua kina ki na veika au namaka tiko ka se bera ni yaco mai, na noqu vakabauta e dau vakamalumalumutaki. E yali saraga vei au na veivakalougatataki ka sa tu ena noqu bula. Ia ni‘u vakavolivoliti au ena veika vinaka, ena noqu wilika na noqu veivakalougatataki vakapeteriaki, vakarorogo ki na itukutuku mai na koniferedi raraba, kei na noqu vakayagataka na gauna vata kei ira na noqu daulomani ka ra dau vakauqeti au me‘u vinaka cake, au dau vakananuma tale na veisau veivakurabuitaki e vakayacora na kosipeli i Jisu Karisito ki na noqu bula.

Kevaka mada ga e sega ni matata vei iko na sala ki liu ena so na gauna, se sega ni yaco tiko na veika o nakita, e sa levu tu ga na veika vinaka e tiko ena nomu bula kei na levu ni madigi e tu me vukei iko mo toso ki liu ena salatu ni veiyalayalati. Ena dau levu tu na ka me da vulica ka levu na vanua me da tubu kina, vakauasivi vakayalo. Masuta na Tamada Vakalomalagi me veidusimaki. Ena vukei iko o Koya mo vakasaqara ka kunea na veivakauqeti vinaka kei na madigi ni tubu kei na vuli e wavoliti iko tu (raica na Yavu ni Vakabauta 1:13).

iVakatakilakila

marama uabula ena bavelo

Sasaga Tikoga

Na noda bula vakayalo yadua ena dau vaka na ua—so na gauna ena tubu cake ka so na gauna ena lutu sobu. Ena so na gauna eda na vakila beka na noda dei ena noda vakabauta kei na noda rekitaka na kosipeli. Ia ena so tale na gauna, eda na saga dredre me da kila na vanua me da na gole tale kina. Eda na sotava beka na dredre ni yaco mai na bolebole, basika mai na taro, se vakaberai na veivakalougatataki, vakabibi ni da solia tiko na noda vinaka duadua me da bulataka na kosipeli. Ena veigauna dredre vakaoqo, au dau raici ira na tamata ni ra digitaka e dua vei rau na sala oqo: e dua era na yacova kina na iVakabula, kei na dua ena sega ni vakakina.

Ena so na gauna au dau vakatauvatana na veigauna vakaoqo ki na italanoa kei Mosese kei na gata parasa (raica na Tiko Mai Na Lekutu 21:8–9). Ni ra gadreva vakatotolo na Isireli me ra vakabulai ni oti na nodra laukati mai na gata weli gaga, a solia vei ira o Mosese e dua na sala rawarawa me ra vakabulai kina: rai ga ki na gata parasa ka matataki Jiova. O ya na ka ga me ra cakava. Ni ra raica ga era na bula. Ia e vuqa era a digitaka me ra kakua ni raica ka ra mani mate kina. (Raica na 1 Nifai 17:41.)

Na italanoa oqo e vakavuna me‘u vakasamataka na noda dau colata tu na icolacola gaga kei na yaloca ni sega ni dau yaco na veika eda namaka ena so na gauna, ka ni tu sara ga e matada na kena iwali!

Na idola ki na vakilai ni inuinui, vakacegu, kei na vakabauta na noda veisiga ni mataka sa ikoya me da rai ga vei Jisu Karisito (raica na Ilamani 8:14–15; Joni 3:14–17).

Au dau beitaki au tu ga vakataki au ni‘u dau caka cala. Ia baleta ni‘u sa saga vakaidina me‘u vulica na veika e baleti Rau ka vakadinati Rau na Tamada Vakalomalagi kei Jisu Karisito, au kila ni rawa ni‘u dau nuitaki Rau me baleta na veivosoti, tubu, kei na veivakabulai ena veigauna dredre. Au kila ni gauna au rai kina vei Rau ena masu, vulica na Lako Mai, Mo Muri Au, vakayagataki gauna ena valetabu, ka vakalevulevuya na noqu veikacivi, au vakila e dua na yalo ni vakavinavinaka kei na veivakavoui.

Ni‘u vakasaqarai Rau, au kunea kina na i balebale dina ni kosipeli i Jisu Karisito: e dua na ivakaruru e vakarautaki tu kina na veivakacegui, veitaqomaki, kei na veivakabulai mai vei ira na gata kei vuravura.

O Elder Jeffrey R. Holland ena Kuoramu ni iApositolo Le Tinikarua a vakadinadinataka ena loloma: “‘E dua na rarama uasivi sara ni vakanuinui,’ ka sucu mai na noda lomana na Kalou kei na tamata kecega—oqori na ka keimami vinakata vei kemuni. … E salavata mai kei na inuinui ramase o ya na vakasolokakana ni Kalou ni lomani iko, ni o Karisito sa nomu iVukevuke, ni kosipeli e dina. Na kena rarama ena vakananuma vei iko ni ena kosipeli ena tiko kina e veigauna—e veisiga, e vei auwa—e dua na madigi vou, bula vou, yabaki vou. Sa dua dina na cakacakamana! Sa qai dua na isolisoli totoka! Ena vuku ni isolisoli i Karisito, na veika uasivi ni bula sa noda ke dei tiko na noda vakabauta ka sasaga tikoga ka vakanuinui tikoga.”³

Na gauna vaka itabagone qase cake ena kauta mai e levu na veisau, levu na veilecayaki, kei na kena sega ni dau yaco mai na ka eda namaka ena so na gauna. Ia na kosipeli i Jisu Karisito e dau matata ka dei tu ga. Kei na Nona yalayala kei na Tamada Vakalomalagi era sa dei tu ni da tikoga ena salatu ni veiyalayalati. Ena so na gauna ena rawa ni vakadredretaka na vuravura na noda vakanamata tikoga Vua. Ia ni da taura e dua na ikalawa e tosoi keda vei Koya, sa dua na toso qori. Ni da toso tiko vei Karisito, eda na sega vakadua ni veilecayaki—eda sa toso tiko ki na inuinui, vakacegu, kei na reki.